Joint Pains Increase During Winter : చలికాలం వచ్చిందంటే చాలు సీజనల్ వ్యాధులతో పాటు ఎక్కువమందిని ఇబ్బంది పెట్టే సమస్య కీళ్ల నొప్పులు. దీని గురించి ఫోర్టిస్ హాస్పిటల్ సీనియర్ ఆర్థోపెడిక్ సర్జన్ డాక్టర్ ధనుంజయ్ గుప్తా కొన్ని విషయాలు తెలిపారు. ప్రతి సంవత్సరం ఆయన వద్దకు వెళ్లే రోగులు ఒకే ప్రశ్న ఎక్కువగా అడుగుతారట. "శీతాకాలంలో నా కీళ్ల నొప్పులు ఎందుకు పెరుగుతాయి?" ఎక్కువమందికి దీని గురించి డౌట్ కూడా ఉంటుంది. చల్లని వాతావరణానికి, కీళ్ల నొప్పులు పెరగడానికి మధ్య సంబంధం ఏంటి అనే ప్రశ్నకు చాలా శారీరక కారణాలున్నాయి అంటున్నారు ధనుంజయ్. చలికాలంలో ఆర్థరైటిస్ రాకపోయినా.. దాని లక్షణాలను ఖచ్చితంగా తీవ్రతరం చేస్తుందని చెప్తున్నారు.
బారోమెట్రిక్ ప్రెజర్
కీళ్ల నొప్పులకు ముఖ్య కారణం బారోమెట్రిక్ ప్రెజర్ తగ్గడం. ఇది చల్లని వాతావరణానికి ముందు, ఆ సమయంలో జరుగుతుంది. బయటి వాతావరణం తగ్గినప్పుడు.. కీలు లోపలి కణజాలాలు కొద్దిగా విస్తరిస్తాయి. ఆర్థరైటిస్ ఉన్న కీళ్లలో, రక్షిత మృదులాస్థి ఇప్పటికే అరిగిపోతే.. ఈ విస్తరణ బహిర్గతమైన నరాల చివరలపై ఒత్తిడిని పెంచుతుంది. దీనివల్ల నొప్పి, బిగుసుకుపోవడం జరుగుతుంది.
వెచ్చదనం లేకపోవడం
చల్లని ఉష్ణోగ్రతలు రక్తనాళాల సంకోచానికి కూడా దారితీస్తాయి. దీనివల్ల రక్తనాళాలు సహజంగా బిగుసుకుపోవడం, రక్త ప్రవాహం తగ్గడం జరుగుతుంది. దీనివల్ల కండరాలు, కీళ్ల చుట్టూ ఉన్న కణజాలాలలో వెచ్చదనం, వశ్యత తగ్గుతుంది. ఈ సహాయక నిర్మాణాలు బిగుసుకుపోయి.. కీలు దాని సాధారణ కదలికలను కోల్పోతుంది. అసౌకర్యాన్ని తీవ్రతరం చేస్తుంది. ఆస్టియో ఆర్థరైటిస్, రుమటాయిడ్ ఆర్థరైటిస్ లేదా గతంలో గాయాలైన రోగుల్లో ఈ మార్పు తీవ్రంగా ఉంటుంది.
శారీరక శ్రమ తగ్గడం
శీతాకాలంలో శారీరక శ్రమ తగ్గడం కూడా ఒక కారణం. పగటి సమయం తక్కువగా ఉంటుంది. పైగా ఉష్ణోగ్రతలు కూడా తగ్గుతాయి. ఈ అసౌకర్యం వల్ల ఎక్కువ యాక్టివ్గా ఉండరు. కీళ్లకు కదలిక అవసరం. ఇది మృదులాస్థికి పోషణనిస్తుంది. సైనోవియల్ ద్రవాన్ని ప్రసరింపజేస్తుంది. శారీరక శ్రమ తగ్గినప్పుడు.. బిగుసుకుపోవడం సహజంగా పెరుగుతుంది.
విటమిన్ డి లోపం
సూర్యరశ్మి తక్కువగా ఉండడం వల్ల శీతాకాలంలో విటమిన్ డి స్థాయిలు కూడా తగ్గుతాయి. విటమిన్ డి లోపం కండరాలు, ఎముకలను బలహీనపరుస్తుంది. పరోక్షంగా కీళ్ల నొప్పులను తీవ్రతరం చేస్తుంది. కాబట్టి రోజూ కాసేపు ఎండలో ఉండాలి. లేదా సప్లిమెంట్స్ తీసుకోవచ్చు.
చలికాలంలో తీసుకోవాల్సిన జాగ్రత్తలు
శీతాకాలంలో కీళ్ల నొప్పులు రాకుండా ఉండాలంటే.. వెచ్చగా ఉండటం అవసరం. లేయర్లుగా దుస్తులు ధరించాలి. హీటింగ్ ప్యాడ్లు, గోరు వెచ్చని నీటితో స్నానాలు చేస్తే రిలీఫ్ ఉంటుంది. ఇంటి లోపల ఉష్ణోగ్రతలను కంట్రోల్ చేసుకునేందుకు హీటర్స్ వంటివి వాడుకోవచ్చు. నడక, స్ట్రెచింగ్ లేదా యోగా వంటి మితమైన శారీరక శ్రమ బిగుసుకుపోవడాన్ని నివారిస్తుంది. విటమిన్ డి, ఒమేగా-3 కొవ్వు ఆమ్లాలతో సహా పోషకాహారం తీసుకుంటే మంచిది.
గమనిక: ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.