Refrigerator: ఫ్రిజ్‌లో పెట్టిన ఆహారపదార్థాలు త్వరగా చెడిపోతున్నాయా? అలా కాకూడదంటే ఇలా చేయండి

ఫ్రిజ్‌లో పెట్టినా సరే.. ఆహార పదార్థాలు, కూరగాయలు చెడిపోతూ ఉంటాయి. అందుకు కారణం టెంపరేచర్. అసలు ఫ్రిజ్ లో ఎంత టెంపరేచర్ ఉంచాలో తెలుసా?

పండ్లు, కూరగాయలు, కూల్ డ్రింక్స్ ఇలా అన్ని ఫ్రిజ్ లో పెట్టుకుని తినడం అందరికీ ఉన్న అలవాటే. అయితే, కొన్ని ఆహార పదార్థాలు ఒకటి లేదా రెండు రోజుల తర్వాత వాటిని తినడానికి చూస్తే అవి చెడిపోయి కనిపిస్తాయి. ఇలా అందరి ఇళ్ళల్లో జరుగుతుంది. అందుకు కారణం ఫ్రిజ్ లో ఉష్ణోగ్రత. ఫ్రిజ్ లో ఉష్ణోగ్రత చాలా ఎక్కువ లేదా తక్కువగా ఉండే ఆహారం త్వరగా చెడిపోయే అవకాశాలు ఉన్నాయి.

అసలు రిఫ్రిజిరేటర్ ఉష్ణోగ్రత ఎంత ఉండాలి?

వేస్ట్ అండ్ రిసోర్సెస్ యాక్షన్ ప్రోగ్రాం (WRAP) ప్రకారం యునైటెడ్ కింగ్‌డమ్‌లోని సగం కుటుంబాలు తమ రిఫ్రిజిరేటర్‌లను అవసరమైన ఉష్ణోగ్రత కంటే ఎక్కువ - 7 డిగ్రీల సెల్సియస్‌లో ఉంచుతున్నాయి. అలా చేయడం వల్ల ఆహార పదార్థాలు త్వరగా చెడిపోవడం లేదా కుళ్లిపోవడం జరుగుతుంది. WRAP ప్రకారం రిఫ్రిజిరేటర్ ఉష్ణోగ్రత 0 నుంచి 5 డిగ్రీల సెల్సియస్ మధ్య ఉండాలి.

మరీ వెచ్చగా ఉండకూడదు

వివిధ పరిశోధనల ప్రకారం ఫ్రిజ్ లో నిల్వ చేసే ఆహారాన్ని 5 డిగ్రీల సెల్సియస్ కంటే ఎక్కువ ఉష్ణోగ్రత వద్ద నిల్వ చేయకూడదు. కానీ చాలా మంది ఉష్ణోగ్రతని ఎక్కువగా సెట్ చేసి పెట్టుకుంటారు. ఇది ఆహార పదార్థం నిల్వ ఉంచేందుకు తగిన విధంగా ఉండదు. ఫ్రిజ్ ని డేంజర్ జోన్ లోకి తీసుకెళ్తుంది. ఆహారం త్వరగా చెడిపోతుంది. ఆ విషయం పదార్థాలు చెడిపోయేదాక మనకి కూడా తెలియదు.

మరీ చలి కూడా ఉండకూడదు

చల్లగా ఉన్న ఉష్ణోగ్రత సెట్ చేయడం వల్ల కూడా ఆహారం త్వరగా పాడైపోవడానికి దారితీస్తుంది. అధిక ఉష్ణోగ్రత వద్ద వృద్ధి చెందే బ్యాక్టీరియా ఆహార పదార్థాల మీద చేరి అవి త్వరగా చెడిపోయేలా చేస్తాయి.

సీజన్లలో మారుస్తూ ఉండాలి

భారత్ వంటి దేశాల్లో సీజన్ కి అనుగుణంగా ఉష్ణోగ్రత మార్చుకుంటూ ఉండాలి. శీతాకాలం లేదా వేసవి కాలంలో ఒక్కోరకంగా టెంపరేచర్ సెట్ చేసుకోవాలి. సీజన్ మారే టైమ్ లో ఉష్ణోగ్రత మార్చేటప్పుడు ఫ్రిజ్ ని తప్పనిసరిగా శుభ్రం చెయ్యాలి. లేదంటే అందులోని బ్యాక్టీరియా వాటికి వ్యాపిస్తుంది.

రిఫ్రిజిరేటర్ ఉష్ణోగ్రత కొలవడం ఎలా?

అందరూ ఫ్రిజ్ కొనుగోలు చేసేటప్పుడు టెంపరేచర్ సర్దుబాటు ఉందో లేదో సెట్టింగ్స్ ఎలా ఉన్నాయో చెక్ చేస్తూనే ఉంటారు. ఇప్పుడు మరిన్ని ఆధునిక ఫీచర్లతో ఫ్రిజ్ లు అందుబాటులోకి వచ్చాయి. ఇవి రిఫ్రిజిరేటర్ల వినియోగాన్ని పరిమితం చేస్తున్నాయి. దాని వల్ల కరెంట్ కూడా ఆదా అవుతుంది. ఒక వేళ ఫ్రిజ్ టెంపరేచర్ ఎంత ఉందో మీ ఫ్రిజ్ చూపించకపోతే దాన్ని తెలుసుకునేందుకు మార్గం కూడా ఉంది. ఇది చెక్ చెయ్యడానికి మార్కెట్లో థర్మామీటర్ ఉంటుంది. దీన్ని ఫ్రిజ్ లో పెడితే 1-2 డిగ్రీలోపు రీడింగ్ ని అందిస్తుంది. అది ఫ్రిజ్ కి సరైన ఉష్ణోగ్రత. దీన్ని కొలిచేందుకు థర్మామీటర్ ని రిఫ్రిజిరేటర్ మధ్యలో ఉంచాలి. ఖచ్చితమైన రీడింగ్ కోసం ఫ్రిజ్ డోర్ వేసి కనీసం 6-7 గంటల పాటు వేచి ఉంచాలి. రీడింగ్ గమనించిన తర్వాత ఉష్ణోగ్రత సెట్ చేసుకోవచ్చు.

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.