World Vegan Day: ఆరోగ్యం కోసం వీగన్లుగా మారాలనుకుంటున్నారా? అయితే మీరు తినాల్సినవి ఇవే

World Vegan Day: వీగన్లగా మారుతున్న వారి సంఖ్య కొంచెం కొంచెంగా పెరుగుతోంది.

World Vegan Day: మొన్నటి వరకు శాకాహారం, మాంసాహారం... అనే రెండు వర్గాలే ఉండేవి. ఇప్పుడు మధ్యలో వీగనిజం కూడా వచ్చింది. సంపూర్ణ ఆరోగ్యం వీగన్లుగా మారుతున్న వారి సంఖ్య పెరుగుతోంది. కానీ వీగనిజం పాటించడం అంత సులువు కాదు. కేవలం మొక్కల ఆధారిత ఆహారాన్ని మాత్రమే స్వీకరించాలి. వీగనిజం పుట్టుక ఇప్పటిది కాదు, కానీ ఈ మధ్యనే ఎక్కువ మంది పాటించడం ప్రారంభించడం వల్ల ఎక్కువగా ఈ పేరు వినిపిస్తోంది. 

వీగనిజం ఎప్పుడ మొదలైంది?
బ్రిటన్‌కు చెందిన ప్రముఖ న్యాయవాది డోనాల్డ్ వాట్సన్. ఆయన 1944లో వీగన్ సొసైటీని స్థాపించాడు. మాంసం తినడం నివారించాలన్న కారణంగా దీన్ని మొదలుపెట్టాడు. కానీ మొదట్లో దీన్ని చాలా తక్కువ మందే అనుసరించడం మొదలుపెట్టారు. 2010 నుంచి మాత్రం ఎక్కువమంది వీగన్లుగా మారసాగారు. ముఖ్యంగా సెలెబ్రిటీలు వీగన్లుగా మారేందుకు ఇష్టం చూపించడంతో దీనికి మంచి పేరు వచ్చింది. వీగన్ అనే పదాన్ని తొలిసారిగా వాడింది కూడా డోనాల్డ్ వాట్సనే. నిజానికి 1806లోనే డాక్టర్ విలియం లాండే అనే వ్యక్తి కేవలం మొక్కల ఆధారిత ఆహారాన్నే తీసుకోవడం ప్రారంభించాడు. కానీ మిగతా వారికి ఆయన ప్రచారం చేయలేదు. వీగనిజం అనే పదం కూడా పుట్టలేదు.  

ఎంత మంది?
ప్రపంచంలో గణాంకాల ప్రకారం వీగన్లుగా మారిన వారి సంఖ్య ఏడో కోట్ల నుంచి ఎనిమిది కోట్ల మంది దాకా ఉన్నారు. అంటే ప్రపంచంలో ఉన్న జనాభాలో ఒక శాతం మంది కన్నా తక్కువన్నమాట. కానీ వీరి సంఖ్య కొంచెం కొంచెంగా పెరుగుతూ వస్తోంది. ఈ డైట్ పాటించాలంటే పాలు, పెరుగు కూడా తినకూడదు. అందుకే వీగన్లను తక్కువ మంది పాటిస్తున్నారు. జంతువుల నుంచి వచ్చే ఈ ఆహారాన్ని కూడా వీరు తినరు, తాగరు. 

ఏం తినాలి?
మొక్కలు, చెట్ల నుంచి వచ్చే పండ్లు, కూరగాయలు, బఠానీలు, బీన్స్, కాయ ధాన్యాలు, పప్పులు, గింజలు, బియ్యం వంటివి తినాలి. కూరగాయల నుంచి తీసిన నూనెలనే వాడాలి. ఇక ఆవు, గేదె పాలు తాగకూడదు కాబట్టి సోయా, కొబ్బరిపాలు, బాదం పాలపై ఆధారపడాలి. చివరికి తేనె కూడా తినకూడదు. ఎందుకంటే తేనెను తయారుచేసేవి కూడా జీవులే కదా అందుకు. 

లోపాలు...
వీగన్ ఆహారాన్ని స్వీకరించేటప్పుడు కొన్నిరకాల ఆహార లోపాలను చెబుతున్నారు వైద్యులు. శరీరానికి అన్ని రకాల పోషకాలు అందుతాయో లేదో సందేహమేనని అంటున్నారు. ప్రొటీన్, ఆరోగ్యకరమైన కొవ్వులు, బీ కాంప్లెక్స్‌లు, ఖనిజాలు వంటివి పుష్కలంగా ఉన్న ఆహారాలను కచ్చితంగా తినాలి. లేకపోతే శరీరంలోని చాలా వ్యవస్థలపై ప్రభావం కనిపిస్తుంది. వీగనిజం పాటించే వారిలో సరైన పోషకాలు అందకపోతే మెదడు, థైరాయిడ్ సమస్యలు రావచ్చని చెబుతున్నారు. కాల్షియం లోపం, అయోడిన్ లోపం వంటివి తలెత్తకుండా చూసుకోవాలి. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.