Sunday Special Breakfast : ఉదయాన్నే టేస్టీగా, క్రంచీగా, తేలికగా చేసుకోగలిగే ఫుడ్ గురించి చూస్తుంటే మీకు పెసరపప్పు పకోడి చాలా బెటర్ ఆప్షన్. దీనిని తయారు చేయడం తేలికే. పైగా ఇది ఆరోగ్యానికి కూడా చాలా మంచిది. ప్రోటీన్ రిచ్ బ్రేక్ఫాస్ట్గా దీనిని తీసుకోవచ్చు. పైగా వీటి టేస్ట్ పెద్దల నుంచి పిల్లలవరకు అందరికీ నచ్చుతుంది. సండే రోజు మీ ఫ్యామిలీకి కమ్మటి బ్రేక్ఫాస్ట్ అందించాలనుకుంటే కచ్చితంగా ఇది ట్రై చేయవచ్చు. దీనిని ఎలా తయారు చేసుకోవాలో.. కావాల్సిన పదార్థాలు ఏమిటో ఇప్పుడు తెలుసుకుందాం.
కావాల్సిన పదార్థాలు
పసుపు పెసర పప్పు - అర కప్పు
పచ్చని పెసర పప్పు - అర కప్పు
ఉప్పు - రుచికి తగినంత
ఉల్లిపాయ - 1
పచ్చిమిర్చి - 2
క్యారెట్ -1
కరివేపాకు -1 రెబ్బ
కారం- అర టీస్పూన్
జీలకర్ర - అర టీస్పూన్
కార్న్ఫోర్ల్ - 2 టేబుల్ స్పూన్స్
నూనె - డీప్ ఫ్రైకి సరిపడేంత
తయారీ విధానం
ముందుగా రెండు పప్పులను కలిపి వండేందుకు ఓ రెండు మూడు గంటల ముందు నానబెట్టాలి. వండి సమయానికి ఆ రెండింటిని మిక్సీ జార్లో తీసుకుని గ్రైండ్ చేయాలి. అవి మెత్తగా గ్రైండ్ కాకుండా కాస్త కచ్చా పచ్చాగా ఉండేలా చూసుకోవాలి. అప్పుడే పకోడి కరకరలాడుతూ ఉంటుంది. ఇప్పుడు ఈ పిండిని ఓ వెడల్పాటి గిన్నెలోకి తీసుకోండి. ఉల్లిపాయ, క్యారెట్, పచ్చిమిర్చి, కరివేపాకును బాగా కడిగి.. సన్నగా తరుగుకోవాలి.
ముందుగా తయారు చేసుకున్న పిండి మిశ్రమంలో కట్ చేసిన ఉల్లిపాయ, పచ్చిమిర్చి, కరివేపాకు, క్యారెట్ వేసి బాగా కలుపుకోవాలి. దానిలో ఉప్పు, జీలకర్ర, కారం వేసి కలపాలి. పిండి విడిపోకుండా, మరింత క్రంచీగా ఉండేందుకు కార్న్ఫ్లోర్ వేసుకుని బాగా కలపాలి. ఇప్పుడు స్టౌవ్ వెలిగించి.. కడాయి పెట్టి.. డీప్ ఫ్రైకి సరిపడేంత నూనెను వేయాలి. అది కాగిన తర్వాత.. పెసరపప్పు మిశ్రమాన్ని కొంచెం కొంచెంగా తీసుకుని పకోడిలా వేసుకోవాలి. స్టౌవ్ మంటను మీడియంలో ఉంచి.. వాటిని గోల్డెన్ కలర్ వచ్చే వరకు వేయించాలి. వేగిన వాటిని పక్కకు తీసి పెట్టుకోవాలి. మిగిలిన పిండితో కూడా అలాగే వేసుకోవాలి. అంతే వేడి వేడి పెసరపప్పు పకోడి రెడి.
పెసరపప్పు పకోడిని నార్మల్గా చట్నీ లేకుండా తినేయొచ్చు. లేదంటే గ్రీన్ చట్నీ, సాస్తో కలిపి లేదా టీకి తోడుగా కలిపి కూడా తీసుకోవచ్చు. కేవలం బ్రేక్ఫాస్ట్గానే కాకుండా స్నాక్స్గా కూడా వీటిని తీసుకోవచ్చు. పైగా ఇవి ఆరోగ్యానికి చాలా మంచివి. వీటితో మరో బెనిఫిట్ కూడా ఉంది. ఈ పెసరపప్పు పకోడి మిగిలిపోతే.. దానితో మీరు కమ్మటి కర్రీ కూడా చేసుకోవచ్చు. ఇవి పూర్తిగా ప్రొటీన్ రిచ్ ఫుడ్. కాబట్టి అందరికీ మంచి హెల్తీ ఫుడ్ అవుతుంది. మధుమేహమున్నవారు కూడా దీనిని హ్యాపీగా తినొచ్చు. పిల్లలు కూడా ఇలాంటి టేస్టీ, క్రంచీ రెసిపీలు బాగా ఇష్టపడతారు.
గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.