Sleeping Issues in Young People : ఇటీవలి కాలంలో యువతలో నిద్ర సమస్యలు గణనీయంగా పెరుగుతున్నాయని నిపుణులు చెబుతున్నారు. ముఖ్యంగా టెక్నాలజీ వినియోగం, ఒత్తిడి, అసమతుల్యమైన జీవనశైలి కారణంగా చాలా మంది యువత సరిగ్గా నిద్ర పొవడం లేదని పరిశోధనలు సూచిస్తున్నాయి. దీంతో యుక్త వయసులోనే దీర్ఘకాలిక వ్యాధుల బారిన పడుతున్నారని.. ఇది చాలా ప్రమాదమని పరిశోధకులు చెప్తున్నారు.
Indian Council of Medical Research నివేదికల ప్రకారం.. నగరాల్లో నివసించే యువతలో ఈ నిద్రలేమి సమస్యలు ఎక్కువగా కనిపిస్తున్నాయి. దీనికి చాలానే కారణాలు ఉన్నాయంటున్నారు. అలాగే ఈ సమస్యను చాలామంది విస్మరించి మరింత ప్రమాదకరంగా పరిస్థితిని మార్చుకుంటున్నారని చెప్తున్నారు. ఇంతకీ ఆ కారణాలు ఏంటో.. వైద్యుడిని ఎప్పుడు సంప్రదించాలో ఇప్పుడు చూసేద్దాం.
యువతలో నిద్ర సమస్యలకు కారణాలు
- స్క్రీన్ టైమ్
మొబైల్ ఫోన్లు, ల్యాప్టాప్లు, టాబ్లెట్లు వాడటం వల్ల రాత్రిళ్లు ఎక్కువసేపు మేల్కొంటున్నారు. స్క్రీన్ నుంచి వచ్చే బ్లూ లైట్ మెదడుకు నిద్ర సంకేతాలను ఆలస్యం చేస్తుంది.
- పని, ఒత్తిడి
కార్పొరేట్ ఉద్యోగాలు, పోటీ పరీక్షలు, చదువు ఒత్తిడి వల్ల యువతలో మానసిక ఒత్తిడి పెరుగుతోంది. ఇది నిద్ర నాణ్యతను ప్రభావితం చేస్తుంది. దీంతో చాలామంది నిద్రకు దూరమవుతున్నారు.
- భోజన సమయాలు
రాత్రిళ్లు ఆలస్యంగా తినడం.. మసాలా ఎక్కువగా ఫుడ్ తీసుకోవడం వల్ల కూడా నిద్రకు ఇబ్బంది కలుగుతుంది. కాఫీ లేదా ఎనర్జీ డ్రింక్స్ కూడా నిద్రకు భంగం కలిగిస్తాయి.
- ఫిజికల్ యాక్టివిటీ
వ్యాయామం చేయకపోవడం, ఎక్కువసేపు స్క్రీన్స్ ముందు కూర్చోవడం, పడుకుని మొబైల్ స్క్రోల్ చేస్తూ శరీరానికి ఏ మాత్రం శ్రమని ఇవ్వకపోవడం వల్ల కూడా నిద్రను దూరం చేసుకుంటున్నారు.
- సోషల్ మీడియా
సోషల్ మీడియా స్క్రోలింగ్ వల్ల చాలా మంది రాత్రుళ్లు ఆలస్యంగా నిద్రపోతున్నారు. దీంతో స్లీప్ సైకిల్ మరింత డిస్టర్బ్ అవుతుంది.
నిద్రలేమి వల్ల వచ్చే సమస్యలు
నిద్ర సరిపోకపోతే శరీరంపై తీవ్ర ప్రభావం ఉంటుంది. దీర్ఘకాలిక సమస్యల ప్రమాదం రెట్టింపు అవుతుంది. ఏకాగ్రత తగ్గడం నుంచి మొదలుకొని.. మూడ్ స్వింగ్స్, అలసట, జ్ఞాపకశక్తి తగ్గడం వంటి సమస్యలు వస్తాయి. దీర్ఘకాలంలో ఇది Insomnia వంటి సమస్యలకు దారితీయవచ్చు. మధుమేహం, బీపీ, గుండె సమస్య ప్రమాదం రెట్టింపు ఉంటుంది.
వైద్యుడిని ఎప్పుడు సంప్రదించాలంటే..
నిపుణుల ప్రకారం.. రెండు వారాలకంటే ఎక్కువ కాలం నిద్ర పట్టకపోవడం, రాత్రుళ్లు మధ్యలో తరచూ మేల్కొనడం, ఉదయం లేవగానే అలసటగా ఉన్నప్పుడు, రోజువారీ పనులపై దాని ప్రభావం ఉందని అనిపించినప్పుడు వైద్య సహాయం తీసుకోవాలంటున్నారు. ఇది మేజర్ కాకముందే సెట్ చేసుకుంటే.. దీర్ఘకాలిక సమస్యల ప్రమాదం వీలైనంత దూరం చేసుకోవచ్చంటున్నారు.
నిద్ర సమస్యలను దూరం చేసుకోవడానికై..
నిద్ర సమస్యను దూరం చేసుకోవడానికి కొన్ని టిప్స్ ఫాలో అవ్వాలి. ప్రతిరోజూ ఒకే సమయానికి నిద్రపోవడం, ఒకే సమయానికి నిద్రలేవడం చేయాలి. నిద్రకు ముందు ఫోన్ చూడకూడదు. కాఫీ, టీని రాత్రుళ్లు తీసుకోకూడదు. పగటి వేళ కూడా తక్కువ మోతాదులో తీసుకోవాలి. రోజూ కనీసం 30 నిమిషాలు వ్యాయామం చేస్తే చాలా మంచిది. రోజుకు కనీసం 7–9 గంటల నిద్ర ఉండేలా చూసుకోవాలి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.