డయాబెటిస్ ఒక్కసారి ఒంట్లోకి ఎంట్రీ ఇచ్చిందో, మళ్లీ బయటికి వెళ్లడం చాలా కష్టం. ఈ దీర్ఘకాలిక వ్యాధిని తట్టుకోవాలంటే ఆహారపరంగా కూడా చాలా జాగ్రత్తలు పాటించాలి. కొన్ని రకాల ఆహారాలకు దూరంగా ఉంటూ, మరికొన్ని ప్రత్యేకంగా తినాల్సి ఉంటుంది. బ్రౌన్ రైస్, మిల్లెట్స్ వంటకాలు, రాగిజావ వంటివి వారికి చాలా మేలు చేస్తాయి. మిల్లెట్లలో కొర్రలు డయాబెటిక్ రోగులకు చాలా మంచివి. సాధారణ అన్నంతో పోలిస్తే వీటి రుచి అంతగా బాగోదు. అయినా తినాల్సిందే. కాస్త రుచిగా వీటితో కొన్ని వంటకాలు చేసుకోవచ్చు. అలాంటి వాటిలో కొర్రల కిచిడీ ఒకటి.
కావాల్సిన పదార్థాలుకొర్కరలు - ఒక కప్పుపెసరపప్పు - పావు కప్పుఉల్లిపాయ - ఒకటిపచ్చిమిర్చి - రెండుక్యారెట్లు - రెండుబంగాళాదుంప - ఒకటిబీన్స్ - అయిదుటమాటా - ఒకటిఅల్లం వెల్లుల్లి పేస్టు - ఒక స్పూనుఉప్పు - తగినంతనూనె - సరిపడినంత
తయారీ ఇలా1. కొర్రలను నాలుగ్గంటల ముందుగానే నీళ్లలో నానబెట్టాలి. 2. ఉల్లిపాయలు, పచ్చిమిర్చి, బంగాళాదుంపలు, బీన్స్, టమాటా ముక్కలు కోసి పెట్టుకోవాలి. వీటిలో ఉల్లిపాయలు నిలువుగా కోసుకోవాలి. 3. కుక్కర్లో నూనె వేసి ఉల్లిపాయలు, పచ్చిమిర్చి వేసి వేయించాలి. 4. అవి వేగాక క్యారెట్, బంగాళాదుంపలు, బీన్స్ ముక్కలు వేసి వేయించాలి. 5. అవి వేగాక టమోటా ముక్కలు వేయాలి. అల్లం వెల్లుల్లి పేస్టు కూడా చేర్చాలి. 6. బాగా వేగాక నీరు వేయాలి. ఎసరు మరుగుతున్నప్పుడు నానబెట్టుకున్న కొర్రలను వేయాలి. సరిపడినంత ఉప్పు వేసి బాగా కలపాలి. 7. కుక్కర్ మూత పెట్టి మూడు విజిల్స్ వచ్చే వరకు ఉడికించుకుంటే కొర్రల కిచిడి సిద్ధం. 8. తినేముందు కొత్తిమీర చల్లుకుని తింటే టేస్టీగా ఉంటుంది.
పాలిష్ చేసిన బియ్యంతో పోలిస్తే కొర్రలు ఎంతో ఆరోగ్యకరమైనవి. చిరుధాన్యాల్లో ఒకటైన ఇవి చిన్న పిల్లలకు, మధుమేహరోగులకు, గర్భిణులకు మంచి ఆహారం. వీటిలో సకల పోషకాలు ఉంటాయి. మాంసకృత్తులు, కాల్షియం, మెగ్నిషియం, మాంగనీస్ పుష్కలంగా లభిస్తాయి. యాంటీ ఆక్సిడెంట్లు అధికంగా ఉంటాయి. వీటిని నిత్యం తింటే బరువు కూడా తగ్గుతాయి. విటమిన్ బి1 వీటిలో అధికంగా ఉంటుంది. ఇందులో ఉండే ఐరన్ వల్ల రక్తహీనత సమస్య దరిచేరదు. కొన్ని రకాల క్యాన్సర్లు దరిచేరకుండా కాపాడుతుంది.
Also read: సిగరెట్ మానేయలేకపోతున్నారా? ఇవిగో ఈ చిట్కాలు పాటించి చూడండి
Also read: భారతీయ అమ్మాయిలకు బీర్ ఎందుకు నచ్చేస్తోంది? నిజంగానే అది అందాన్ని పెంచుతుందా?