Stomach Cancer: ప్రపంచ వ్యాప్తంగానే కాదు భారతదేశంలోనూ క్యాన్సర్ కేసులు వేగంగా పెరుగుతున్నాయి. ముఖ్యంగా కడుపు క్యాన్సర్ కేసులు ఈ మధ్య కాలంలో బాగా పెరుగుతున్నట్లు నిపుణులు గుర్తించారు. ఇది కడుపులో అభివృద్ధి చెందుతుంది. ప్రారంభ లక్షణాలు అస్పష్టంగా ఉండటంతో దీనిని గుర్తించడం చాలా కష్టంగా మారింది.
క్యాన్సర్ అభివృద్ధి చెందుతున్నప్పుడు కడుపులోని ఇతర భాగాలకు సమీపంలో అవయవాలన్నింటికి వ్యాపిస్తుంది. చికిత్స చేయకుండా అలాగే వదిలేస్తే ఇతర అవయవాలకు వ్యాపిస్తుంది. మనదేశంలో కడుపు క్యాన్సర్ కేసులు ఎందుకు పెరుగుతున్నాయో ఇప్పుడు తెలుసుకుందాం.
కడుపు క్యాన్సర్ కేసులు మన దేశంలో ఎందుకు పెరుగుతున్నాయి?
చెడు ఆహారపు అలవాట్లు, ఒత్తిడి, జన్యు పరమైన కారణాలు, జంక్ ఫుడ్, ఫాస్ట్ ఫుడ్ వంటివి ఎక్కువగా తినడం వల్ల మనదేశంలో కడుపు క్యాన్సర్ కేసులు ఎక్కువగా పెరుగుతున్నట్లు నిపుణులు చెబుతున్నారు. అంతేకాదు ప్రత్యేకమైన ఆహార పద్ధతులు, ముఖ్యంగా మసాలా ఫుడ్స్, ఆల్కహాల్ ఎక్కువగా తీసుకోవడం వంటి కారణాలతో కూడా కడుపు క్యాన్సర్ రోగులు పెరుగుతున్నట్లు ఆరోగ్య నిపుణులు భావిస్తున్నారు.
కడుపు క్యాన్సర్ ప్రధానంగా 50ఏళ్లకు పైబడిన వారిలో వస్తుంది. స్త్రీలతో పోల్చితే పురుషుల్లో ఎక్కువగా ఉంటుంది. ధూమపానం, మద్యపానం వంటి జీవనశైలి కారణంగా పురుషులు ఎక్కువగా ఈ కడుపు క్యాన్సర్ బారిన పడుతున్నారు. ఎక్కువగా కారంగా, ఉప్పుగా ఉండే ఆహారాన్ని తినేవారు కడుపు క్యాన్సర్ కు గురయ్యే ప్రమాదం ఎక్కువగా ఉన్నట్లు గుర్తించారు. హార్మోన్ల వ్యత్యాసాలు, జన్యుపరమైన కారకాలు ముఖ్యపాత్ర పోషిస్తున్నాయి. అయితే దీనిపై పూర్తిస్థాయిలో పరిశోధనలు జరగాల్సి ఉందని నిపుణులు చెబుతున్నారు.
కడుపు క్యాన్సర్ లక్షణాలు ఏవిధంగా ఉంటాయి?
- నిరంతరం పొత్తికడుపులో నొప్పి లేదా అసౌకర్యం,
- బరువు తగ్గడం
- ఆకలిని కోల్పోవడం
- మింగడంలో ఇబ్బంది
- వికారం
- వాంతులు
- మలంలో రక్తం
ఇవన్నీ కూడా కడుపు క్యాన్సర్ లక్షణాలు. అయితే ఇవి ప్రారంభం దశలో కనిపించకపోవచ్చు. అయితే మీకు ఏమాత్రం అనుమానం వచ్చినా వైద్యులను సంప్రదించి పరీక్షలు చేయించుకోవడం మంచిది.
కడుపు క్యాన్సర్ లో రకాలు:
రోగనిర్దారణను బట్టి కడుపు క్యాన్సర్ కొన్ని రకాలుగా వర్గీకరించారు
- అడెనోకార్సినోమా
- లింఫోమా
- గ్యాస్ట్రోఇంటెస్టినల్ స్ట్రోమల్ ట్యూమర్స్
చాలా మందిలో కడుపు క్యాన్సర్ చివరి దశలో బయటపడటంతో అధిక మరణాల రేటుకు దారితీస్తుంది. ధూమపానం, ఆల్కహాల్, నైట్రేట్ లు, హెలికోబాక్టర్, పైలోరి ఇన్ఫెక్షన్ వంటి పలు ఎటియోలాజికల్ కారకాలు గ్యాస్ట్రిక్ క్యాన్సర్ కారణమయ్యే కారకాలుగా నిపుణులు అంటున్నారు. ఈ తరహా క్యాన్సర్ చికిత్స కోసం శస్త్ర చికిత్స్ , కీమో థెరపీతో సహా మల్టి మోడాలిటీ చికిత్స అవసరాన్ని బట్టి వైద్యం అందిస్తున్నారు.
నివారణ:
తాజా పండ్లు, కూరగాయలతో సమృద్ధిగా ఉండే సమతుల్య ఆహారం, ప్రాసెస్ చేసిన ఆహారాలను తగ్గించడం, దూమపానం, ఆల్కహాల్ మానేయడం, తరచుగా వైద్య పరీక్షలు చేయించుకోవడం ద్వారా ఈ క్యాన్సర్ నుంచి బయటపడొచ్చు.
Also Read : పాలపొడితో పిల్లలకు నచ్చేలా ఇలా బర్ఫీ చేయండి
గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.