Telugu Recipes: సాయంత్రం అయితే చాలు పిల్లలకు ఏం పెట్టాలని ఆలోచించే తల్లులు ఎంతోమంది. అలాంటి వారికి ఆరోగ్యకరమైన రెసిపీ ఈ పాలపొడి బర్ఫీ. పాలపొడిలో ఎన్నో పోషకాలు ఉంటాయి. వీటితో బర్ఫీ చేసి ఇవ్వడం వల్ల ఆ పోషకాలన్నీ శరీరంలో చేరుతాయి. అంతేకాదు ఈ బర్ఫీలో బాదం, పిస్తా, జీడిపప్పు, కిస్మిస్, యాలకులు వంటివి కలుపుతాము... కాబట్టి ఈ డ్రై ఫ్రూట్స్ లోని పోషకాలు కూడా వారికి అందుతాయి. దీని తయారు చేయడం చాలా సులువు. ఎలాగో ఒకసారి చూద్దాం.
కావాల్సిన పదార్థాలు
పాలపొడి - రెండు కప్పులు
చక్కెర - ఒక కప్పు
జీడిపప్పు - గుప్పెడు
బాదం పలుకులు - గుప్పెడు
పిస్తా - గుప్పెడు
కిస్మిస్ - పది
యాలకులు - మూడు
నెయ్యి - రెండు స్పూన్లు
తయారీ ఇలా
ఇక్కడ తీసుకున్న డ్రైఫ్రూట్స్ అన్నింటిని చిన్నచిన్నగా తరుగుకోవాలి. స్టవ్ పై కళాయి పెట్టి అందులో పంచదార, కప్పు నీళ్లు పోయాలి. తీగ పాకం వచ్చేవరకు మరిగించాలి. తీగపాకం వచ్చినాక మంటను తగ్గించి పాలపొడిని వేసి మెల్లగా కలుపుతూ ఉండాలి. ఉండలు కట్టకుండా చూసుకోవాలి. అందులో బాదం, పిస్తా, కిస్మిస్, జీడిపప్పు, యాలకుల పొడి అన్ని వేసి కలపాలి. ఇప్పుడు ఒక ప్లేటుకు నెయ్యి రాసి ఈ మిశ్రమాన్ని ప్లేట్ అంతా పరుచుకునేలా వేయాలి. పైన పిస్తా, బాదం, జీడిపప్పులతో గార్నిష్ చేస్తే బాగుంటుంది. చల్లారాక వీటిని ముక్కలుగా కోసుకొని ఒక డబ్బాలో పెట్టుకోవాలి. ఫ్రిడ్జ్ లో పెట్టుకుంటే ఎన్ని రోజులైనా ఇవి ఫ్రెష్ గా ఉంటాయి. పిల్లలకు చాలా టేస్టీగా కూడా అనిపిస్తాయి.
పాలను పొడిగా మార్చడం ద్వారా ఈ పాల పొడిని తయారు చేస్తారు. చాక్లెట్ల తయారీలో దీన్ని ఉపయోగిస్తారు. పాలలో ఉండే ఎన్నో పోషకాలు కూడా ఉంటాయి. అమైనో ఆమ్లాలు, ప్రోటీన్లు, విటమిన్లు, ఖనిజాలు లభిస్తాయి. అలాగే కాస్త కొవ్వు కూడా ఉంటుంది. అందుకే దీన్ని అధికంగా తినకూడదు. ఇక ఇందులో వాడే బాదం, జీడిపప్పు, కిస్మిస్, పిస్తా వంటి వాటిలో పోషకాలు చాలా ఎక్కువ. వాటిని అధికంగానే వేసాము కాబట్టి పిల్లలు ఆ నట్స్ ని తింటారు. ఆ నట్స్ ఇచ్చే పోషకాలు అన్ని వారికి అందుతాయి. మానసికంగా, శారీరకంగా ఈ నట్స్ తినడం చాలా ఆరోగ్యకరం. బాదంపప్పుల్లో మన శరీరానికి అవసరమైన అమైనా ఆమ్లాలు ఉంటాయి. ఇన్ఫెక్షన్ నుంచి కాపాడే లక్షణం వీటికి ఉంటుంది. అలాగే గుండెను ఆరోగ్యంగా కాపాడుతాయి. ఫైబర్, కార్బోహైడ్రేట్స్, విటమిన్ ఏ, విటమిన్ బి, విటమిన్ సి, విటమిన్ డి, విటమిన్ ఏ, క్యాల్షియం, మాంగనీస్, పోలేట్ వంటివన్నీ కూడా ఇందులో అధికంగా ఉంటాయి. నట్స్ తినడానికి ఇష్టపడని పిల్లలకు ఇలా బర్ఫీలుగా తయారు చేసి వాటిని అందిస్తే మంచిది. ఈ నట్స్ తినడం వల్ల క్యాన్సర్ కణాలు శరీరంలో పెరగకుండా అడ్డుకోవచ్చు.
Also read: మీరు ఆల్కహాల్ తాగకపోయినా ఈ అలవాట్లతో కాలేయ సమస్యలు వచ్చే అవకాశం
గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.