Winter Immunity Boosting Fruits : చలికాలంలో శ్వాసకోశ ఇన్ఫెక్షన్లు, వాపు, శ్వాస తీసుకోవడంలో ఇబ్బందులు వచ్చే ప్రమాదం ఎక్కువగా ఉంటుంది. కాబట్టి సరైన సీజనల్ పండ్లను ఎంచుకోవడం చాలా ముఖ్యం. యాంటీఆక్సిడెంట్లు, విటమిన్ సి, సహజ యాంటీ ఇన్ఫ్లమేటరీ సమ్మేళనాలు, ఫైబర్తో నిండిన అనేక పండ్లు ఊపిరితిత్తులను కాలుష్య కారకాల నుంచి రక్షించడంలో సహాయపడతాయి. మరి బలమైన, ఆరోగ్యకరమైన ఊపిరితిత్తుల కోసం వింటర్లో డైట్లో తీసుకోవాల్సిన పండ్లు ఏంటో చూసేద్దాం.
ఉసిరి
ఉసిరి శ్వాసకోశ ఆరోగ్యానికి అత్యంత శక్తివంతమైన సీజనల్ సూపర్ ఫ్రూట్లలో ఒకటి. విటమిన్ సి, పాలీఫెనాల్స్, యాంటీఆక్సిడెంట్లు పుష్కలంగా ఉండటం వల్ల ఇది ఇన్ఫెక్షన్లు, కాలుష్య కారకాలను, చలి వాతావరణం వల్ల కలిగే చికాకులను దూరం చేస్తుంది. ఊపిరితిత్తులను స్ట్రాంగ్ చేయడానికి హెల్ప్ చేస్తుంది. ఆక్సీకరణ ఒత్తిడిని తగ్గించి.. ఆస్తమా, శ్వాస తీసుకోవడంలో వచ్చే ఇబ్బందులను దూరం చేస్తుంది. ఇది కొల్లాజెన్ ఉత్పత్తికి కూడా మద్దతు ఇస్తుంది. వాయుమార్గాలను బలంగా చేసి.. వాపును తగ్గిస్తుంది. యాంటీ బాక్టీరియల్ లక్షణాలు దగ్గు, సైనస్, జలుబు, గొంతు ఇన్ఫెక్షన్ల ప్రమాదాన్ని తగ్గిస్తుంది. రోగనిరోధక శక్తిని పెంచుతుంది.
దానిమ్మ
దానిమ్మ శీతాకాలంలో తీసుకోవాల్సిన పండ్లలో ఒకటి. దీనిలో పునికలాగిన్స్, ఆంతోసైనిన్స్ వంటి ఊపిరితిత్తులను రక్షించే యాంటీఆక్సిడెంట్లు ఉంటాయి. ఈ సమ్మేళనాలు శ్వాసకోశ మార్గంలో మంటను తగ్గిస్తాయి. కాలుష్యం వల్ల కలిగే నష్టం నుంచి ఊపిరితిత్తుల కణజాలాలను రక్షిస్తాయి. ఊపిరితిత్తులలో రక్త ప్రసరణను పెంచి ఆక్సిజన్ సరఫరాను మెరుగుపరచడానికి సహాయపడుతాయి. విటమిన్ సి అధికంగా ఉండటం వల్ల రోగనిరోధక శక్తి పెరుగుతుంది. దగ్గు, బ్రోన్కైటిస్, ఫ్లూ వంటి శీతాకాలపు ఇన్ఫెక్షన్ల ఫ్రీక్వెన్సీ తగ్గుతుంది.
కివి
కివిలో నారింజ కంటే ఎక్కువ విటమిన్ సి ఉంటుంది. ఇది శ్వాసకోశ ఆరోగ్యానికి మద్ధతు ఇస్తుంది. అధిక యాంటీఆక్సిడెంట్ కంటెంట్ను కలిగి ఉంది. ఊపిరితిత్తుల కణజాలాలలో మంటను తగ్గించడంలో సహాయపడుతుంది. శీతాకాలంలో వచ్చే ఇన్ఫెక్షన్లకు వ్యతిరేకంగా శరీర రోగనిరోధక ప్రతిస్పందనకు కివి మద్దతు ఇస్తుంది. ఆక్సీకరణ ఒత్తిడిని తగ్గించి.. మొత్తం శ్వాసకోశ పనితీరుకు మద్దతు ఇస్తుంది. దీని పుల్లని రుచి.. రిఫ్రెష్ ఫీల్ ఇస్తుంది. ఊపిరితిత్తులకు శక్తివంతమైన రక్షణను అందిస్తుంది.
ద్రాక్ష
ద్రాక్ష ఊపిరితిత్తుల ఆరోగ్యానికి విశేషమైన ప్రయోజనాలు అందిస్తుంది. దీనిలో రెస్వెరాట్రాల్ను ఉంటాయి. ఇది కాలుష్య కారకాలు, మంట వల్ల కలిగే నష్టం నుంచి ఊపిరితిత్తుల కణజాలాలను రక్షించే శక్తివంతమైన యాంటీఆక్సిడెంట్. ఆస్తమా లేదా దీర్ఘకాలిక శ్వాస సమస్యల వంటి పరిస్థితులను తగ్గిస్తుంది. మిమ్మల్ని హైడ్రేటింగ్గా ఉంచుతుంది. వీటిలోని ఫైటోకెమికల్స్ ఆక్సీకరణ ఒత్తిడిని తగ్గించడంలో సహాయపడతాయి. ద్రాక్షలో విటమిన్ సి, పొటాషియం.. రోగనిరోధక శక్తికి మద్దతు ఇస్తాయి.
బత్తాయి
బత్తాయిని చాలామంది సమ్మర్కి మంచిదనుకుంటారు కానీ.. శీతాకాలంలో రిఫ్రెష్ ఇచ్చే సిట్రస్ పండు ఇది. ఊపిరితిత్తులకు అసాధారణమైన ప్రయోజనాలను అందిస్తుంది. విటమిన్ సి, ఫ్లేవనాయిడ్లు, శరీరాన్ని శుభ్రపరిచే యాంటీఆక్సిడెంట్లతో నిండి ఉంటుంది. ఊపిరితిత్తుల కణజాలాలను మంట, కాలుష్యం వల్ల కలిగే నష్టాల నుంచి రక్షిస్తుంది. శ్లేష్మాన్ని వదిలించి.. శ్వాసకోశ మార్గాన్ని శుభ్రపరుస్తుంది. దీని హైడ్రేటింగ్ స్వభావం ఊపిరితిత్తులలోని శ్లేష్మ పొరలకు మద్దతునిచ్చి తేమగా ఉంచుతుంది. చికాకులు తగ్గుతాయి. రోగనిరోధక శక్తిని కూడా పెంచుతుంది.
సీతాఫలం
సీతాఫలం రుచి గురించి ప్రత్యేకంగా చెప్పాల్సిన అవసరం లేదు. అయితే ఇది ఆరోగ్యానికి కూడా మేలు చేస్తుంది. దీనిలో మెగ్నీషియం, విటమిన్ సి, పొటాషియం, సహజ యాంటీఆక్సిడెంట్లు పుష్కలంగా ఉంటాయి. శ్వాసకోశ మార్గంలో మంటను తగ్గిస్తుంది. సులభంగా శ్వాస తీసుకోవడానికి సహాయపడుతుంది. మెగ్నీషియం ఊపిరితిత్తుల కండరాలను సడలించడంలో కీలక పాత్ర పోషిస్తుంది. ఇది శ్వాసలోపం, ఛాతీలో బిగుతు లేదా శీతాకాలంలో వచ్చే ఆస్తమా లక్షణాలను కంట్రోల్ చేస్తుంది. విటమిన్ సి అధికంగా ఉండటం వల్ల రోగనిరోధక శక్తి పెరుగుతుంది. జలుబు, దగ్గు వచ్చే ఫ్రీక్వెన్సీ తగ్గుతుంది. కస్టర్డ్ ఆపిల్ సహజ చక్కెరలు, ఫైబర్ను కూడా కలిగి ఉంటుంది. ఇవి ఎనర్జీ ఇస్తాయి. శరీరాన్ని డీటాక్స్ చేయడానికి హెల్ప్ చేస్తాయి.
కాబట్టి వీటిని రెగ్యులర్గా మీ డైట్లో ఉండేలా చూసుకోండి. అయితే ఆరోగ్యానికి మంచిదని ఏది ఎక్కువ మోతాదులో తీసుకోకూడదు. కంట్రోల్లో తీసుకుంటే చలికాలంలో ఎలాంటి శ్వాస సమస్యలు రాకుండా జాగ్రత్తగా ఉండొచ్చు. బ్రీతింగ్ వ్యాయామాలు కూడా చేస్తే మరీ మంచిది.