TS Police Recruitment: ఆ కానిస్టేబుల్ అభ్యర్థులకు ఊరట, హైకోర్టు ఆదేశాలకు 'సుప్రీం' ఓకే!

హైకోర్టు ఇచ్చిన తీర్పును సమర్థిస్తూ.. కానిస్టేబుల్ మెరిట్ లిస్ట్‌లో తొలివరుసలో ఉన్నవారు ఆ పోస్టు తీసుకోకపోతే తర్వాతి వరుసలో ఉన్నవారికి అవకాశం కల్పించాలని సుప్రీంకోర్టు స్పష్టంచేసింది.

తెలంగాణ రాష్ట్ర పోలీసు నియామక మండలికి సుప్రీంకోర్టు షాకిచ్చింది. కానిస్టేబుల్ ఉద్యోగాలకు సంబంధించి మెరిట్ తొలిస్థానంలో ఉన్నవారు చేరని పోస్టులను మెరిట్‌లిస్ట్‌లో తర్వాతి సానంలో ఉన్నవారితో భర్తీ చేయాలని హైకోర్టు ఆదేశించింది. దీనిపై ప్రభుత్వం సుప్రీంకోర్టుకు అప్పీలుకు వెళ్లింది. అయితే హైకోర్టు ఇచ్చిన తీర్పును సమర్థిస్తూ.. పోలీసు కానిస్టేబుల్ భర్తీ ప్రక్రియ కోసం నిర్వహించిన పరీక్షల్లో మెరిట్ లిస్ట్‌లో తొలివరుసలో ఉన్నవారు ఆ పోస్టు తీసుకోకపోతే తర్వాతి వరుసలో ఉన్నవారికి అవకాశం కల్పించాలని సుప్రీంకోర్టు ఈ మేరకు స్పష్టంచేసింది. ఈ అంశంపై తెలంగాణ పోలీస్ రిక్రూట్ మెంట్ బోర్డు దాఖలు చేసిన అప్పీల్‌ను కొట్టేస్తూ జస్టిస్ సంజయ్ కిషన్ కౌల్, జస్టిస్ అభయ్ ఎస్.ఓక్ ధర్మాసనం నవంబరు 29న తీర్పు చెప్పింది. దీనివల్ల 1,370 మంది అభ్యరులకు ఊరట లభించనుంది.

రాష్ట్రంలో వివిధ 17,156 పోలీస్ కానిస్టేబుల్ పోస్టుల భర్తీకి తెలంగాణ ప్రభుత్వం 2018 మే 5న నోటిఫికేషన్ విడుదల చేసింది. ప్రిలిమినరీ పరీక్ష, ఫిజికల్ ఈవెంట్స్, మెయిన్ పరీక్ష అనంతరం వీటికి సంబంధించిన తుది మెరిట్ జాబితాను 2019 సెప్టెంబరు 24న తుది మెరిట్ జాబితాను టీఎస్‌ఎల్‌పీఆర్‌బీ విడుదల చేసింది. జాబితాకు ఎంపికైన వారందరూ పోలీస్ రిక్రూట్‌ మెంట్ బోర్డు నిర్దేశించిన కటాఫ్ మార్కులు పొందారు. ఇందులో ఎక్కువ అర్హత మార్కులు పొందినవారు ఈ పోస్టుల్లో చేరడానికి రాకపోవడంతో ప్రభుత్వం వాటిని ఖాళీగా ఉంచింది. అయితే మెరిట్ లిస్ట్‌లో తర్వాతి స్థానంలో ఉన్న తమను పరిగణనలోకి తీసుకోలేదంటూ కొందరు అభ్యర్థులు హైకోర్టులో సవాల్ చేశారు. దీనివల్ల 1,370 పోస్టులు భర్తీ కాకుండా మిగిలిపోయినట్లు కోర్టు దృష్టికి తెచ్చారు.

హైకోర్టు తీర్పు ఇలా..
మెరిట్ లిస్ట్‌లో ముందున్నవారు అపాయింట్‌మెంట్ ఆర్డర్ తీసుకొన్న తర్వాత ఆ ఉద్యోగాన్ని వదిలేసి ఉంటే దాన్ని ఖాళీగా భావించి తదుపరి రిక్రూట్‌మెంట్ నోటిఫికేషన్ ప్రకారం భర్తీ చేయాలి తప్పితే, అసలు అభ్యరే చేరని పోస్టును ఖాళీగా ప్రకటించి, దాన్ని మెరిట్‌లిస్ట్‌లో తదుపరి జాబితాలో ఉన్నవారికి ఇవ్వకపోవడం సరికాదని పేర్కొన్నారు. వీరి వాదనతో ఏకీభవించిన హైకోర్టు మెరిట్ లిస్ట్‌లో తొలిస్థానంలో ఉన్నవారు చేరని పోస్టులను మెరిట్‌లిస్ట్‌లో తర్వాతి సానంలో ఉన్నవారితో భర్తీ చేయాలని హైకోర్టు ఆదేశించింది.

సుప్రీంకోర్టు ఏమంది..? 
హైకోర్టు ఇచ్చిన ఆదేశాలను సవాల్ చేస్తూ పోలీస్‌ రిక్రూట్‌మెంట్‌ సుప్రీంకోర్టును ఆశ్రయింది. అత్యున్నత న్యాయస్థానం కూడా హైకోర్టు ఇచ్చిన తీర్పును సమర్తిస్తూ.. పోలీస్ బోర్డు దాఖలు చేసిన అప్పీల్‌ను కొట్టేసింది. హైకోర్టు ఇచ్చిన తీర్పులో జోక్యం చేసుకోవాల్సిన అవసరం కనిపించడంలేదని స్పష్టం చేసింది. ఏదైనా ఉద్యోగ నోటిఫికేషన్ జారీ చేసినప్పుడు మెరిట్‌లిస్ట్‌లో ఉన్నవారు నియామక ప్రక్రియలో పాల్గొని అపాయింట్‌మెంట్ ఆర్డర్ తీసుకున్న తర్వాత చేరకపోతే మాత్రమే దాన్ని ఖాళీ అయిన పోస్టుగా పరిగణించాలని, మెరిట్‌లిస్ట్‌లో తర్వాతి క్రమంలో ఉన్నవారితో భర్తీ చేయకూడదని ముంజా ప్రవీణ్ వర్సెస్ స్టేట్ ఆఫ్ తెలంగాణ కేసులో కోర్టు ఇదివరకే స్పష్టం చేసినందున దాన్నే అనుసరించాల్సిందిగా సుప్రీంకోర్టు ఆదేశించింది. యువత ఉపాధికి ప్రభుత్వ ఉద్యోగాలు ఒక ముఖ్య వనరు అని, అందువల్ల హైకోర్టు ఇచ్చిన తీర్పును సమరిస్తున్నట్లు సుప్రీంకోర్టు స్పష్టం చేసింది.