కోలీవుడ్ స్టార్ హీరో విజయ్ ప్రధాన పాత్రలో తెలుగులో ఓ సినిమా రాబోతుంది. చాలా కాలంగా ఆయన తెలుగులో స్ట్రెయిట్ సినిమా చేస్తారని వార్తలొచ్చాయి. ఫైనల్ గా దిల్ రాజు ఈ ప్రాజెక్ట్ ని సెట్ చేశారు. వంశీ పైడిపల్లి దర్శకత్వంలో ఈ సినిమాను రూపొందిస్తున్నారు. ఇందులో రష్మికను హీరోయిన్ గా తీసుకున్నారు. ప్రస్తుతం ఈ సినిమా షూటింగ్ దశలో ఉంది. ఇటీవల ఈ సినిమా స్పాట్ నుంచి కొన్ని ఫొటోలు లీక్ అయ్యాయి. అవి సోషల్ మీడియాలో బాగా వైరల్ అయ్యాయి.
ఇదిలా ఉండగా.. జూన్ 22న విజయ్ పుట్టినరోజు కావడంతో ఒకరోజు ముందుగా ఫస్ట్ లుక్ ని రిలీజ్ చేశారు. ఈ సినిమాకి 'వారసుడు' అనే టైటిల్ ను ఫిక్స్ చేశారు. ఫస్ట్ లుక్ లో విజయ్ స్టైలిష్ గా సూట్ వేసుకొని కనిపించారు. తమిళంలో 'వరిసు' అనే టైటిల్ తో పోస్టర్ వదిలారు.
ఇక ఈ సినిమాలో చాలా మంది పేరున్న నటీనటులను తీసుకున్నట్లు తెలుస్తోంది. కోలీవుడ్ నుంచి ప్రభు, శరత్ కుమార్ లాంటి సీనియర్ ఆర్టిస్ట్ లను రంగంలోకి దించారు. అలానే జయసుధ, ప్రకాష్ రాజ్ లను ఎంపిక చేసుకున్నట్లు కొన్ని రోజుల క్రితం అనౌన్స్ చేశారు. వీరితో పాటు శ్రీకాంత్, సంగీత లాంటి నటులు కూడా ఈ సినిమాలో కనిపించనున్నారు.
కోలీవుడ్ టాలెంటెడ్ కమెడియన్ యోగిబాబుని తీసుకున్నట్లు మొన్నామధ్య ప్రకటించారు. ఈ సినిమాలో విజయ్ పాత్ర చాలా డిఫరెంట్ గా ఉంటుందని చెబుతున్నారు. దళపతి 66వ చిత్రంగా రాబోతోన్న ఈ ప్రాజెక్ట్‌ను తమిళ, తెలుగు భాషల్లో తెరకెక్కిస్తున్నారు. ఈ ఏడాది 'బీస్ట్' సినిమాతో ప్రేక్షకుల ముందుకు వచ్చిన విజయ్ ఆశించిన స్థాయిలో సక్సెస్ అందుకోలేకపోయారు. మరి ఈ సినిమాతోనైనా సక్సెస్ అందుకుంటారేమో చూడాలి!
Also Read : శోభితతో నాగచైతన్య డేటింగ్ - సమంత పుట్టించిన పుకారేనా?
Also Read : తక్కువ అంచనా వేయకండి - బాలకృష్ణ హీరోయిన్‌కు కరోనా