Renu Desai: మా వ్యక్తిగత జీవితాల గురించి మాట్లాడ్డానికి మీరెవరు? రేణూ దేశాయ్‌ ఆగ్రహం

Renu Desai: నటీనటుల వ్యక్తిగత జీవితాల గురించి మాట్లాడ్డం మానుకోవాలని రేణూ దేశాయ్ సూచించారు. తమ వ్యక్తిగత జీవితాల గురించి జర్నలిస్టులకు ఏం పని అని ఆమె ప్రశ్నించారు.

Renu Desai On Social Media And Journalism: సినీ నటీనటుల గురించి మీడియాలో తరచుగా గాసిన్స్ వస్తుంటాయి. వారి వ్యక్తిగత జీవితానికి సంబంధించిన పలు విషయాల గురించి వార్తలు ప్రసారం అవుతాయి. వాటిలో కొన్ని వార్తలు నిజానికి దగ్గరగా ఉంటాయి. మరికొన్ని మాత్రం తలాతోకా లేకుండా ఉంటాయి. అంతేకాదు, సదరు నటీనటుల వ్యక్తిత్వాన్ని దెబ్బ తీసేవిగా ఉంటాయి. ఇలాంటి వార్తలపై చాలా మంది స్టార్స్ పలుమార్లు ఆగ్రహం వ్యక్తం చేసిన సందర్భాలు ఉన్నాయి. తాజాగా సినీ తారల వ్యక్తిగత జీవితాలపై పుకార్లు పుట్టించే వారిపై నటి రేణూ దేశాయ్ తీవ్ర ఆగ్రహం వ్యక్తం చేసింది. ఈ మేరకు సోషల్ మీడియాలో ఓ పోస్టు పెట్టింది.

అలాంటి రాతలు మంచిది కాదు- రేణూ దేశాయ్

సినీ నటుల పర్సనల్ లైఫ్ గురించి అడ్డగోలు వార్తలు రాయడం నిజమైన జర్నలిజం అనిపించుకోదని రేణూ దేశాయ్ వెల్లడించింది. ఇలాంటి పద్దతి మార్చుకోవాలని ఆమె సూచించింది. “సినీ తారల పర్సనల్ లైఫ్ గురించి మాట్లాడ్డం కరెక్టా? సమాజానికి, సమాజంలోని శాంతి భద్రతలకు సినీ తారల జీవితాలు ఏమైనా విఘాతం కలిగిస్తున్నాయా? సినిమా రిలీజ్ అయినప్పుడు జర్నలిస్టులు, సినీ విశ్లేషకులు సినిమాలపై తమ అభిప్రాయాలను వ్యక్తం చేస్తుంటారు. వాళ్ల ఒపీనియన్ ను మేము భావ ప్రకటన స్వేచ్ఛగా భావిస్తాం. కానీ, మా వ్యక్తిగత జీవితం గురించి మాట్లాడ్డం సరికాదు” అని వెల్లడించింది.

మా జీవితాల గురించి మీరెందుకు మాట్లాడాలి?- రేణూ దేశాయ్

సోషల్ మీడియా ఉంది కదా అని తమ గురించి లేనిపోని వార్తలను క్రియేట్ చేయడం కొందరికి ఫ్యాషన్ గా మారిందని రేణూ దేశాయ్ మండిపడింది. “కొంత మంది పని లేనివాళ్లు సోషల్ మీడియాలో మా వ్యక్తిగత జీవితాల గురించి అబద్దపు విషయాలు ప్రచారం చేస్తున్నారు. ప్రపంచ వ్యాప్తంగా ఎంతో మంది సృజనాత్మకత కలిగిన వారు ఉన్నారు. వారిలో చాలా మంది సున్నితత్వం కలిగి ఉన్నారు. వారంతా బుక్స్, సాంగ్స్ రాయడం, పెయింటింగ్స్ వేయడం, సినిమాలు తీయడం మానేస్తే ఎలా ఉంటుదో ఓసారి ఊహించుకోండి. అందరి జీవితాల మాదిరిగానే మా వ్యక్తిగత జీవితాల్లోనూ సమస్యలు ఉంటాయి. ప్రేమను ఆస్వాదించిన క్షణాలు, మనసు క్షోభకు గురైన సందర్భాలు ఉన్నాయి. మేమూ జీవితంలో కొన్ని తప్పులు చేస్తాం. ఆయా కారణాలతో ప్రేమలు, పెళ్లిళ్లు, విడాకులు కామన్. నా జీవితం గురించి నేను మాట్లాడ్డం నా ఇష్టానికి సంబంధించిన విషయం. కానీ, సెలబ్రిటీల వ్యక్తిగత జీవితాల మీద కొంత మంది ఊహాగానాలు సృష్టించడం మంచిది కాదు. ఎదుటి వారి సమస్యల గురించి మాట్లాడి సంపాదించుకునే డబ్బులు ఒంటికి మంచిది కాదు అని గుర్తుంచుకోవాలి” అని రేణూ దేశాయ్ ఆగ్రహం వ్యక్తం చేసింది.

రీసెంట్ గా రేణూ దేశాయ్ ‘టైగర్ నాగేశ్వర్ రావు’ సినిమాలో నటించింది. ఈ చిత్రంలో ఆమె హేమలత లవణం పాత్రను పోషించింది. తాజాగా ఓ జర్నలిస్టు ఆమె వ్యక్తిగత జీవితం గురించి ఓ యూట్యూబ్ ఛానెల్ లో కొన్ని వివాదాస్పద వ్యాఖ్యలు చేశారు. ఈ వ్యాఖ్యలను ఇప్పటికే ఖండించిన రేణు, తాజాగా సోషల్ మీడియాలో పోస్టు పెట్టారు.