Narayana & Co Trailer Release : 'లైఫ్ ఈజ్ బ్యూటిఫుల్' మూవీతో టాలీవుడ్‌కు పరిచయమైన నటుడు సుధాకర్ కోమాకుల ఇప్పుడు ‘నారాయణ & కో' మూవీతో ప్రేక్షకుల ముందుకు వస్తున్నాడు. తాజాగా ఈ మూవీ ట్రైలర్ మేకర్స్ రిలీజ్ చేశారు. పాపిశెట్టి ఫిల్మ్ ప్రొడక్షన్స్, సుఖ మీడియా పతాకాలపై పాపిశెట్టి బ్రదర్స్‌ సహకారంతో సుధాకర్ ఈ మూవీని నిర్మిస్తున్నారు. శ్రీనివాస్ గొర్రిపూడి ఈ చిత్రానికి సహ నిర్మాతగా వ్యవహరిస్తున్నారు. చిన పాపిశెట్టి దర్శకత్వం వహిస్తున్నారు.
‘నారాయణ అండ్ కో’ ట్రైలర్‌ను ఇక్కడ చూడండి
'ది తిక్కల్ ఫ్యామిలీ' ట్యాగ్ లైన్ తో తెరకెక్కుతోన్న ఈ సినిమా ట్రైలర్ లో నారాయణ అండ్ ఫ్యామిలీ మెంబర్స్‌ చుట్టూ తిరిగే కథతో ఫన్‌ ఎలిమెంట్స్‌తో ఎంటర్‌టైనింగ్ గా తెరకెక్కించారు. మధ్య తరగతి కుటుంబాన్ని లీడ్‌ చేసే యజమాని నారాయణ పాత్రలో దేవీ ప్రసాద్ ప్రేక్షకులను అలరించనున్నారు. అతని భార్య పాత్రలో సీనియర్ నటి ఆమని నటించారు. ఈ సినిమా మెయిన్ గా దుబాయ్ నుంచి వచ్చిన పిల్లి బొమ్మ చుట్టూ కథ తిరుగుతుందని తెలుస్తోంది.
ఈ కుటుంబంలో పెద్ద కొడుకు సుధాకర్ క్రికెట్ బెట్టింగ్‌ లు చేస్తుంటాడు. చిన్న కొడుకు ఫొటోగ్రాఫర్. దేవీ ప్రసాద్ ఈ సినిమాలో బ్యాంకులో క్యాషియర్ ఉద్యోగిగా కనిపించనున్నాడు. ఇక ట్రైలర్ విషయానికి వస్తే.. ఫుల్ ఫన్‌తో వినోదాన్ని పంచుతుంది. "చైనా వాడు కల్తీ చేయనివంటివి ఉన్నాయంటే అవి చీరలు మాత్రమే"నని ఆమని చెప్పే డైలాగ్ నవ్వు తెప్పిస్తుంది. "న్యాయంగా సంపాదిస్తే డబ్బు నీడనిస్తుంది.. అన్యాయంగా సంపాదించాలని చూస్తే అంతు చూస్తుంది" అంటూ దేవీ ప్రసాద్ చెప్పే మాటలు కూడా ఆడియెన్స్ ను ఆకట్టుకుంటాయి. మొత్తానికి 'నారాయణ అండ్ కో' అఫిషియల్ ట్రైలర్.. వినోదభరితంగా, ఆసక్తిగా ఉందని చెప్పవచ్చు.
'నారాయణ అండ్ కో' చిత్రంలో పూజా కిరణ్‌, యామిని, జయ్‌కృష్ణ, సప్తగిరి, అలీరెజా, శివ, రాగిణి, అనంత్‌ ఇతర నటీనటులు కీలక పాత్రల్లో నటించారు. 2021లో 'కార్తికేయ' టైటిల్ రోల్‌ పోషించిన రాజావిక్రమార్కలో కీలక పాత్రలో నటించాడు సుధాకర్ కోమాకుల. చాలా రోజుల తర్వాత మళ్లీ కామెడీతో నవ్వించేందుకు రెడీ అవుతున్నట్టు తాజా ట్రైలర్‌తో అర్థమవుతోంది. కాగా ఈ చిత్రానికి సురేశ్‌ బొబ్బిలి, డాక్టర్‌ జోస్యభట్ల, నాగవంశి సంగీతం అందిస్తున్నారు.
Read Also : ‘ఆదిపురుష్’ చూసేందుకు ఏకంగా మల్డీప్లెక్స్‌నే బుక్ చేసిన కృతి సనన్ - ఎవరి కోసమో తెలుసా?
Join Us on Telegram: https://t.me/abpdesamofficial