'ది ఘోస్ట్' సినిమా ప్లాప్ తర్వాత చాలా గ్యాప్ తీసుకున్న నాగార్జున.. తాజాగా కొత్త సినిమా అప్డేట్ ఇచ్చారు. తన బర్త్ డే సందర్భంగా కొరియోగ్రాఫర్ విజయ్ బిన్నీ దర్శకత్వంలో సినిమా చేస్తున్నట్లు ప్రకటించారు. ఈ మేరకు మూవీ ఫస్ట్ లుక్ తో పాటు గ్లింప్స్ విడుదల చేశారు. ఈ సినిమాకు ‘నా సామిరంగ’ అనే టైటిల్ ఫిక్స్ చేశారు. ఈ మూవీ గ్లింప్స్ లో నాగార్జున ఊర మాస్ లుక్ లో కనిపించారు. గ్లింప్స్ మొదలవగానే విలన్, నాగ్ ను చంపేందుకు రౌడీల మందతో కలిసి ప్లాన్ చేస్తాడు. ఏకంగా 56 మంది రౌడీలను పోగు చేస్తారు. ఈ పండక్కి పని అయిపోవాలి అంటాడు విలన్. వాడి కాలు తీసేయాలా? చెయ్యి తీసేయాలా? ఏకంగా తలే తీసెయ్యాలా? అని అడుగుతారు రౌడీలు. ఇంతకీ ఎవడిని ఏసెయ్యాలో చెప్పమన గానే కింగ్ అంటాడు విలన్. ఆ మాట వినగానే ఒక్కొక్కడికి చెమటలు పడతాయి. హీరో గారు విలన్ల గుంపులోనే ఉండి నవ్వుతూ ముఖం మీద కర్చీఫ్ తీస్తాడు. లోపల ఉన్నది పులులు కాదురా, మేకలు అనే డైలాగ్ తో హీరో రౌడీలను చితకబాదుతాడు. పగిలిన బల్డ్ ఫిలమెంట్ తో బీడీ కాల్చుకుంటూ రఫ్ లుక్ తో కనిపిస్తాడు. ఈసారి పండక్కి ‘నా సామిరంగ’ అంటూ గర్జిస్తాడు.
కొనసాగుతున్న ప్రీ ప్రొడక్షన్ పనులు
ఇక ‘నా సామిరంగ’ సినిమాకు సంబంధించి ప్రీ ప్రొడక్షన్ పనులు కొనసాగుతున్నాయి. 'పొరింజు మరియం జోస్‌' అనే సూపర్ హిట్ మలయాళ చిత్రానికి రీమేక్ గా ఈ చిత్రం రూపొందబోతున్నట్లు తెలుస్తోంది. మూల కథలో మార్పులు చేయకుండా పూర్తి స్థాయిలో తెలుగు నేటివిటీకి తగినట్లుగా దర్శకుడు ఈ చిత్రాన్ని రూపొందించబోతున్నట్లు సమాచారం. అంతేకాదు, ఈ చిత్రంలో హీరోకు ఎంత ప్రాధాన్యత ఉంటుందో, అంతే ప్రాధాన్యత విలన్ కూడా ఉండబోతున్నట్లు టాక్ నడుస్తోంది.
విలన్ గా దర్శకుడు కరుణ కుమార్?
ఈ సినిమాలో ‘పలాస’ దర్శకుడు కరుణ కుమార్ విలన్‌గా నటించనున్నట్లు తెలుస్తోంది. నిజానికి లుక్ పరంగా కరుణ కుమార్ విలన్ పాత్రకు బాగా సెట్ అవుతాడు. అయితే, ఆయన వరుణ్ తో ‘మట్కా’ అనే సినిమా చేయబోతున్నారు. ఈ నేపథ్యంలో ఆ సినిమా సెట్స్ మీదకు వెళ్లే లోగా ఈ సినిమాలో తన క్యారెక్టర్ షూటింగ్ కంప్లీట్ అయ్యేలా ప్లాన్ చేసుకుంటున్నట్లు తెలుస్తోంది. ‘నా సామిరంగ’ సినిమాకు ఎమ్‌.ఎమ్‌ కీరవాణి సంగీతం అందిస్తున్నారు. కాజల్ హీరోయిన్ గా ఓకే అయినట్లు తెలుస్తోంది. పూర్తి వివరాలు త్వరలో వెల్లడి కానున్నాయి. వీలైనంత త్వరగా షూటింగ్ కంప్లీట్ చేసుకుని వచ్చే ఏడాది(2024) సంక్రాంతికి ఈ సినిమాని రిలీజ్ చేయాలని మేకర్స్ భావిస్తున్నారు. మరోవైపు ఇవాళ నాగ్ బర్త్ డే కావడంతో ఆయన నటించిన 'మన్మథుడు' చిత్రాన్ని 4K ఫార్మాట్ లో రీ-రిలీజ్ చేస్తున్నారు.
Read Also: హీరోయిన్‌కు ముద్దు పెట్టిన దర్శకుడు - ఆమె రియాక్షన్ ఇది
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial