మెగాస్టార్ చిరంజీవి(Chiranjeevi), దర్శకుడు బాబీ(Bobby) కాంబినేషన్ ఓ మాస్ యాక్షన్ ఎంటర్టైనర్ తెరకెక్కుతోన్న సంగతి తెలిసిందే. #MEGA154 అనే వర్కింగ్ టైటిల్ తో ఈ సినిమాను సెట్స్ పైకి తీసుకెళ్లారు. ప్రస్తుతం ఈ సినిమా షూటింగ్ దశలో ఉంది. వచ్చే ఏడాది సంక్రాంతి కానుకగా సినిమాను విడుదల చేయనున్నట్లు ఇటీవల ప్రకటించారు. ఈ సినిమాలో శృతిహాసన్ హీరోయిన్ గా నటిస్తోంది. అలానే మరికొంతమంది స్టార్స్ ను తీసుకున్నారు. నటుడు రవితేజ కీలకపాత్రలో కనిపించనున్నారు. ఇదిలా ఉండగా.. తాజాగా ఈ సినిమాకి సంబంధించిన ఓ అప్డేట్ వచ్చింది. 'గాడ్ ఫాదర్' సక్సెస్ సందర్భంగా పూరి జగన్నాథ్‌తో కలిసి ఓ లైవ్ సెషన్ లో పాల్గొన్నారు చిరంజీవి. ఈ క్రమంలో కొన్ని ఆసక్తికర విషయాలను వెల్లడించారు.
గోదావరి యాసలో చిరు డైలాగ్స్:
ఇదే సమయంలో మెగా154 సినిమా గురించి మాట్లాడారు. ఈ సినిమాలో ఈస్ట్ గోదావరి యాసలో మాట్లాడతానని.. వింటేజ్ స్టఫ్ తో కూడిన మంచి ఎంటర్టైనర్ గా సినిమా నిలుస్తుందని అన్నారు. ఈ సినిమాకి సంబంధించిన టైటిల్, టీజర్ ను దీపావళి సందర్భంగా రిలీజ్ చేస్తామని చెప్పారు. చాలా కాలంగా ఈ సినిమాకి 'వాల్తేర్ వీరయ్య' అనే టైటిల్ ను పెడుతున్నట్లు వార్తలొచ్చాయి. చిరు స్వయంగా ఓ ఈవెంట్ లో ఈ టైటిల్ ను కన్ఫర్మ్ చేశారు. కాబట్టి ఈ టైటిల్ తోనే పోస్టర్స్ అండ్ టీజర్ వదిలే ఛాన్స్ ఉంది. ఈ సినిమా చాలా అల్లరిగా ఉంటుందని ఇటీవల ఓ ఈవెంట్ లో చెప్పారు చిరు. ఈ సినిమా కోసం బాబీ తన కాళ్లకు బాగా పని చెప్పారని.. తన నుంచి ఆడియన్స్ కోరుకునే అంశాలతో 'రౌడీఅల్లుడు' లాంటి అల్లరి సినిమా అవుతుందని చిరు అన్నారు.
బాబీ డైరెక్ట్ చేస్తోన్న 'మెగా154' చిరు, రవితేజ సవతి సోదరులుగా కనిపించబోతున్నారు. గతంలో ఇలాంటి కాన్సెప్ట్ తో తెలుగులో కొన్ని సినిమాలు వచ్చాయి. కానీ వాటికి భిన్నంగా ఈ సినిమా ఉంటుందట. పూర్తి మాస్ అండ్ కమర్షియల్ ఎంటర్టైనర్ గా సినిమాను రూపొందిస్తున్నారు దర్శకుడు. తెరపై చిరంజీవి, రవితేజ మధ్య వచ్చే క్లాష్ సన్నివేశాలు సినిమాకి హైలైట్ గా నిలుస్తాయని చెబుతున్నారు.
ఈ సినిమా కోసం పాటలు పూర్తి చేశారట దేవిశ్రీప్రసాద్. మొత్తం నాలుగు మాస్ సాంగ్స్ కంపోజ్ చేసినట్లు తెలుస్తోంది. చిరంజీవి సినిమాల్లో మాస్ సాంగ్స్ తో పాటు మెలోడీస్ కూడా ఉంటాయి. కానీ ఈ సినిమాలో మాత్రం మెలోడీకి చోటు లేదట. కథ ప్రకారం.. నాలుగు పాటలు ఉంటే.. నాలుగూ కూడా మాస్ సాంగ్స్ అని తెలుస్తోంది. ముఖ్యంగా చిరంజీవి ఇంట్రడక్షన్ సాంగ్ చాలా బాగా వచ్చిందని చెబుతున్నారు. రవితేజ, చిరంజీవి కాంబినేషన్ లో కూడా ఓ పాట ఉంటుందట. అన్ని కమర్షియల్ హంగులతో ఈ సినిమాను తెరకెక్కిస్తున్నారు. ఈ సినిమాలో మలయాళ నటుడు బిజూ మీనన్ ను విలన్ గా కనిపించనున్నారని టాక్.