Manchu Manoj: ఆ తెల్లపిల్ల ఎవరు? నా పెళ్లి ఎక్కడ? నన్ను కూడా పిలవండిరా ప్లీజ్ అంటున్న మంచు మనోజ్

మంచు మనోజ్ రెండో పెళ్లి చేసుకోబోతున్నారంటూ సోషల్ మీడియాలో ప్రచారం జరుగుతోంది. దీనిపై స్పందించిన హీరో ఏమన్నాడంటే..?

మంచు మనోజ్ హీరోగా నటించిన కొన్ని సినిమాలు మంచి విజయాలను అందుకున్నాయి. 'నేను మీకు తెలుసా..?', 'ప్రయాణం', 'వేదం' ఇలా ఆయన నటించిన సినిమాలు విమర్శకుల ప్రశంసలు అందుకున్నాయి. 'బిందాస్', 'మిస్టర్ నూకయ్య' లాంటి సినిమాలు మనోజ్ కి మాస్ ఇమేజ్ ని తీసుకొచ్చాయి. అయితే ఈ మధ్యకాలంలో నటుడిగా ఆయన జోరు తగ్గించారు. ఆయన హీరోగా నటించిన చివరి సినిమా 'ఒక్కడు మిగిలాడు'. ఈ సినిమా విడుదలై దాదాపు నాలుగేళ్లు అవుతోంది. 

మొన్నామధ్య 'అహం బ్రహ్మాస్మి' అనే సినిమా అనౌన్స్ చేశారు. కానీ ఈ సినిమాకి సంబంధించి ఎలాంటి అప్డేట్ రాలేదు. ఇదిలా ఉండగా.. మంచు మనోజ్.. ప్రణతి రెడ్డిని ప్రేమ వివాహం చేసుకున్న సంగతి తెలిసిందే. అయితే ఇద్దరి మధ్య మనస్పర్థలు రావడంతో విడాకులు తీసుకున్నారు. ఆ తరువాత ఎవరి లైఫ్ లో వాళ్లు బిజీ అయిపోయారు. ప్రణతి రెడ్డి అమెరికాకు వెళ్లి అక్కడే సెటిల్ అయిపోయింది. 

ఇక మనోజ్ కొంతకాలం పాటు పాలిటిక్స్ పై ఇంట్రెస్ట్ చూపించారు కానీ మళ్లీ నటుడిగా బిజీ అవ్వాలనుకొని కొత్త సినిమా అనౌన్స్ చేశారు. కొన్ని రోజులుగా.. మనోజ్ రెండో పెళ్లి చేసుకోబోతున్నారంటూ సోషల్ మీడియాలో ప్రచారం జరుగుతోంది. మోహన్ బాబు ఫ్యామిలీకి సమీప బంధువుల అమ్మాయిని మనోజ్ కి ఇచ్చి వివాహం చేయబోతున్నట్లు వార్తలు చక్కర్లు కొడుతున్నాయి. అయితే దీనిపై మంచు మనోజ్ కానీ.. మంచు ఫ్యామిలీ కానీ స్పందించకపోవడంతో.. ఈ తరహా వార్తలు రావడం మరింత ఎక్కువయ్యాయి. 

తాజాగా ఈ వార్తలపై మంచు మనోజ్ ట్విట్టర్ వేదికగా స్పందించారు. తన రెండో పెళ్లి గురించి రాసిన వార్తను షేర్ చేస్తూ.. 'దయచేసి నన్ను కూడా పిలవండి.. పెళ్లి ఎక్కడ..? ఇంతకీ ఆ బుజ్జి పిల్ల, తెల్ల పిల్ల ఎవరు..?' అంటూ తను నటించిన 'పోటుగాడు' సినిమాలో సాంగ్ లిరిక్ ను పోస్ట్ చేశాడు. 'మీ ఇష్టంరా అంతా మీ ఇష్టం' అంటూ సెటైర్ వేశాడు. ప్రస్తుతం సోషల్ మీడియాలో ఈ ట్వీట్ వైరల్ అవుతోంది. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి