'ఉప్పెన' సినిమాతో టాలీవుడ్ లో ఎంట్రీ ఇచ్చిన కృతిశెట్టి మొదటి సినిమాతోనే భారీ విజయాన్ని సొంతం చేసుకుంది. తన క్యూట్ లుక్స్ తో యూత్ ని ఫిదా చేసింది. దీంతో ఈ టీనేజ్ బ్యూటీకి వరుస అవకాశాలు వస్తున్నాయి. ఇప్పటికే యంగ్ హీరో నాని సరసన 'శ్యామ్ సింగరాయ్', సుధీర్ బాబు నటిస్తోన్న 'ఆ అమ్మాయి గురించి మీకు చెప్పాలి', నితిన్ హీరోగా చేస్తోన్న 'మాచర్ల నియోజకవర్గం' సినిమాలతో పాటు రామ్-లింగుస్వామి కాంబినేషన్ లో తెరకెక్కుతోన్న సినిమాలో కూడా హీరోయిన్ గా నటిస్తోంది. ఈ సినిమాలతో పాటు నాగార్జున 'బంగార్రాజు' సినిమాలో నాగచైతన్యకు జోడీగా నటించనుంది. ఈరోజు కృతిశెట్టి పుట్టినరోజు వేడుకలు జరుపుకుంటుంది. ఈ సందర్భంగా ఆమె నటిస్తోన్న సినిమాల నుంచి పోస్టర్లను విడుదల చేస్తూ పుట్టినరోజు శుభాకాంక్షలు చెబుతున్నారు మేకర్స్. 

 


 

నాని 'శ్యామ్ సింగరాయ్' సినిమా నుంచి స్పెషల్ పోస్టర్ ను విడుదల చేశారు. విభిన్నమైన కథాకథనాలతో రూపొందిన ఈ సినిమాను రాహుల్ సాంకృత్యాన్ డైరెక్ట్ చేస్తున్నారు. ఇప్పటికే షూటింగ్ పూర్తి చేసుకున్న ఈ సినిమా దీపావళి కానుకగా ప్రేక్షకుల ముందుకు రానుంది. 



 

సుధీర్ బాబు-ఇంద్రగంటి మోహనకృష్ణ కాంబినేషన్ లో వస్తోన్న లేటెస్ట్ సినిమా 'ఆ అమ్మాయి గురించి మీకు చెప్పాలి'. ఈ సినిమా యూనిట్ కూడా  కృతికి బర్త్ డే విషెస్ చెబుతూ ఓ పోస్టర్ ని విడుదల చేసింది. రొమాంటిక్ డ్రామాగా తెరకెక్కుతోన్న ఈ సినిమాలో సుధీర్ ప్రేమించిన అమ్మాయి పాత్రలో కృతిశెట్టి నటిస్తోంది. 



 

రామ్ హీరోగా లింగుస్వామి దర్శకత్వంలో ఓ సినిమా రానున్న సంగతి తెలిసిందే. ఇందులో కూడా కృతినే హీరోయిన్ గా నటిస్తోంది. ద్విభాషా చిత్రంగా తెలుగు, తమిళ భాషల్లో తెరకెక్కుతోన్న ఈ సినిమాను శ్రీనివాస చిత్తూరి నిర్మిస్తున్నారు. ఈరోజు కృతి బర్త్ డే సందర్భంగా ఈ సినిమాలో కృతి ఫస్ట్ లుక్ ను రివీల్ చేస్తూ పోస్టర్ ను వదిలారు. 



 

నితిన్, కృతి శెట్టి జంటగా 'మాచర్ల నియోజకవర్గం' అనే సినిమా తెరకెక్కుతోంది. ప్రస్తుతం స్క్రిప్ట్ పనులు జరుపుకుంటున్న ఈ సినిమా త్వరలోనే సెట్స్ పైకి వెళ్లనుంది. ఈ సినిమాలో సెకండ్ హీరోయిన్ గా నిధి అగర్వాల్ కనిపించనుందని వార్తలు వస్తున్నాయి. రాజశేఖర్ రెడ్డి డైరెక్ట్ చేస్తోన్న ఈ సినిమాను నితిన్ తన సొంత బ్యానర్ పై నిర్మిస్తున్నారు.