ప్రస్తుతం అక్కినేని అభిమానులు అందరి దృష్టి నాగ చైతన్య, శోభిత ధూళిపాళ్ళ పెళ్లిపైనే ఉంది. ఈ జంట పెళ్లికి సంబంధించిన అఫీషియల్ అనౌన్స్మెంట్ ఇంకా రాకపోయినప్పటికీ పెళ్లి ఎప్పుడు, ఎక్కడ జరగబోతోంది? అనేది సర్వత్రా ఆసక్తికరంగా మారింది. పెళ్లి వేదికకు సంబంధించి ఎప్పటికప్పుడు సోషల్ మీడియాలో వార్తలు వైరల్ అవుతున్నాయి. ఈ నేపథ్యంలోనే ఈ జంట హైదరాబాద్లోని అన్నపూర్ణ స్టూడియోలో పెళ్లి చేసుకోబోతోంది అంటూ గత కొన్ని రోజుల నుంచి కొత్త రూమర్ చక్కర్లు కొడుతున్న సంగతి తెలిసిందే. మరి అన్నపూర్ణ స్టూడియోలోనే ఎందుకు నాగ చైతన్య - శోభిత పెళ్లి చేసుకోవాలనుకుంటున్నారు? అనే విషయాన్ని తెలుసుకుందాం పదండి.
డిసెంబర్ చివరలో నాగ చైతన్య - శోభిత ధూళిపాళ్ళ డెస్టినేషన్ వెడ్డింగ్ చేసుకోబోతున్నారంటూ రూమర్లు షికార్లు కొట్టిన విషయం తెలిసిందే. కానీ ఆ తర్వాత అన్నపూర్ణ స్టూడియోస్ లోనే చై - శోభిత ఏడు అడుగులు వెయ్యబోతున్నారు అన్న వార్త బయటకు వచ్చింది. అయితే దీనికి ఒక ప్రత్యేకమైన రీజన్ ఉందంటూ టాక్ నడుస్తోంది. నాగ చైతన్య కుటుంబానికి అన్నపూర్ణ స్టూడియోతో ప్రత్యేకమైన అనుబంధం ఉంది. దాన్ని దృష్టిలో పెట్టుకుని ఈ జంట పెళ్లికి ఇదే కరెక్ట్ ప్లేస్ అని డిసైడ్ అయినట్టుగా ఇన్సైడ్ వర్గాల సమాచారం. అక్కడ నాగ చైతన్య తాతయ్య, లెజెండరీ దివంగత నటుడు అక్కినేని నాగేశ్వరరావు ఆశీర్వాదం, ఆధ్యాత్మిక శక్తి ఉందని నాగ చైతన్యతో పాటు అక్కినేని ఫ్యామిలీ భావిస్తుందని తెలుస్తోంది. అందుకే ఇద్దరూ జీవితాంతం కలిసి ఉండడానికి తాతయ్య ఆశీర్వాదాలు కూడా తోడవుతాయనే ఉద్దేశంతో చై, శోభిత అక్కడ పెళ్లి చేసుకోవడానికి రెడీ అవుతున్నారని అంటున్నారు. పవిత్రంగా భావించే ఈ ప్రదేశంలో నాగ చైతన్య, శోభిత దూళిపాళ్లతో తన జీవితంలోని కొత్త అధ్యాయాన్ని ప్రారంభించాలని కోరుకుంటున్నారని తెలుస్తోంది. ఒక్క మాటలో చెప్పాలంటే తన తాత ఆశీర్వాదాలను కోరుతూ అక్కడ పెళ్లి చేసుకోబోతున్నాడు అన్నమాట. పైగా తమ సొంత నిర్మాణ సంస్థ అయిన అన్నపూర్ణ స్టూడియోలో పెళ్లి చేసుకుంటే అతని కుటుంబానికి ఇదొక గౌరవ చిహ్నంగా ఉంటుందని భావిస్తున్నారని టాక్ నడుస్తోంది.
అయితే ఈ విషయంపై ఇంకా ఎలాంటి అఫీషియల్ అనౌన్స్మెంట్ లేదు. మరోవైపు ఈ జంట పెళ్లి వేడుక ప్రైవేట్ గా జరగబోతుందని, కేవలం కుటుంబ సభ్యులు మాత్రమే హాజరు కాబోతున్నారని పుకార్లు షికార్లు చేస్తున్నాయి. కానీ ఇప్పటిదాకా అసలు పెళ్లి ఎప్పుడు, ఎక్కడ అనే విషయంపై అక్కినేని ఫ్యామిలీ క్లారిటీ ఇవ్వలేదు. కాగా ఇప్పటికే అక్కినేని ఫ్యామిలీ శోభితకు అఫీషియల్ గా తమ కోడలి హోదా ఇచ్చారు. ఏఎన్ఆర్ అవార్డ్స్ వేడుకలో మొట్టమొదటిసారి నాగచైతన్య, శోభిత కలిసి కనిపించారు. అలాగే దీపావళి సెలబ్రేషన్స్ ను కూడా అక్కినేని ఫ్యామిలీతో కలిసి జరుపుకుంది శోభిత. ఇదిలా ఉండగా వీరిద్దరి నిశ్చితార్థం ఆగస్టు 8న హైదరాబాద్లో జరిగింది.