ప్రముఖ బాలీవుడ్ నటుడు అనుపమ్ ఖేర్ (Anupam Kher) తాను ఇప్పటికీ రెంట్ ఇంట్లోనే ఉంటున్నట్టుగా వెల్లడించి షాక్ ఇచ్చారు. బాలీవుడ్ ఇండస్ట్రీలోని దిగ్గజ నటులలో అనుపమ్ ఖేర్ కూడా ఒకరు అన్న విషయం తెలిసిందే. మరి ఇలాంటి పాపులారిటీ ఉండి, దాదాపుగా 40 ఏళ్లుగా చిత్ర పరిశ్రమలో నటుడిగా రాణిస్తున్న ఈ సీనియర్ నటుడు ఎందుకు సొంత ఇంట్లో కాకుండా అద్దె ఇంట్లో ఉంటున్నారు? అనే విషయాన్ని తెలుసుకుందాం పదండి.
'కార్తికేయ 2', 'టైగర్ నాగేశ్వర రావు' సినిమాల ద్వారా తెలుగు ప్రేక్షకులకు దగ్గరైన బాలీవుడ్ నటుడు అనుపమ్ ఖేర్. హంగు ఆర్భాటాలు లేకుండా సింపుల్ లైఫ్ జీవించడమే తనకు ఇష్టమని తాజాగా ఓ ఇంటర్వ్యూలో వెల్లడించారు. ఆయన ఈ విషయం గురించి మాట్లాడుతూ తను సొంతంగా ఇంటిని కొనుగోలు చేయకూడదని నిర్ణయించుకున్నాను అంటూ షాకింగ్ విషయాన్ని వెల్లడించారు. అందుకే ఇప్పటికి తాను అద్దె ఇంట్లోనే ఉంటున్నాను అని చెప్పుకొచ్చారు. ఈ విషయం గురించి అనుపమ్ ఖేర్ మాట్లాడుతూ "అసలు ఇంటిని ఎవరి కోసం కొనాలి? ఆ ఇంటికి ఖర్చు పెట్టే డబ్బులు బ్యాంకులో దాచుకుని, ప్రతినెలా అద్దె కట్టుకుంటే బెటర్ అనేది నా ఒపీనియన్. ఎందుకంటే భవిష్యత్తులో ఆస్తుల పంపకం విషయంలో పిల్లల మధ్య గొడవలు వచ్చే అవకాశం ఉంటుంది. అందుకే అలా ఆస్తులను కొనుగోలు చేయడానికి పెట్టే డబ్బులు అలాగే దాచిపెట్టి, ఫ్యూచర్లో పిల్లలకు సమానంగా పంచితే సరిపోతుంది. అప్పుడైతే ఆస్తులు పంపకం విషయంలో ఎలాంటి ఇబ్బందులు ఉండవు" అని వివరించారు. అలా సొంత ఇంటి గురించి ఎంతో మంది కలలు అంటుంటే ఆయన మాత్రం అలాంటి పని తనకు ఇష్టం ఉండదు అంటూ చెప్పుకోచ్చారు.
అలాగే వరుస సక్సెస్ లతో బిజీగా ఉన్న టైంలో తనకోసం ఒక ఇల్లు కొనివ్వమని తన తల్లి కోరిందని, ఆమె కోసమే ఇంటిని కొని తన తల్లి కలను నెరవేర్చాను అని చెప్పుకొచ్చారు అనుపమ్ ఖేర్. తన తండ్రి బ్రతికి ఉన్నప్పుడు తాము అక్కడే ఉండే వాళ్ళమని, కానీ తండ్రి పోయాక ఆ ప్రాంతంలో చాలా తక్కువగా ఉండడం వల్ల దాన్ని ఒక సెంటిమెంట్ గా తన తల్లి భావించిందని అన్నారు. సిమ్లాలోనే ఇల్లు కావాలని ప్రత్యేకంగా తన తల్లి కోరారని అనుపమ్ ఖేర్ ఈ సందర్భంగా తెలియజేశారు. అయితే ఆమె ఏదో బంగ్లా కాకుండా కేవలం సింగిల్ బెడ్ రూమ్ అయితే చాలు అని అడిగిందని, కానీ తాను మాత్రం ఎనిమిది పడకలున్న ఒక ఇంటిని బహుమతిగా ఇచ్చానని తన తల్లి కలను నెరవేర్చిన క్షణాన్ని గుర్తు చేసుకున్నారు. అయితే తన భార్య కిరణ్ కు తన ఆలోచనలతో ఏకీభవించడానికి టైం పట్టినప్పటికీ ఇప్పుడు మాత్రం అర్థం చేసుకుంటుందని చెప్పుకొచ్చారాయన.
అయితే ఇదంతా రతన్ టాటా లాంటి గొప్ప మనుషుల నుంచి పొందిన స్ఫూర్తి అని అనుపమ్ ఖేర్ వివరించారు. రతన్ టాటాకు కోట్లాది ఆస్తి ఉన్నప్పటికీ సింపుల్ గా జీవించేవారని, జీవించడానికి చిన్న ఇల్లు, చిన్న కారు మాత్రమే ఆయనకు ఉండేవని, ఆయనను చూసే తాను ఇలా బ్రతకాలని నిర్ణయించుకున్నానని అనుపమ్ ఖేర్ వివరించారు.