సినీ పరిశ్రమలో మల్టీ టాలెంటెడ్ అని గుర్తింపు తెచ్చుకున్నవారు చాలా తక్కువమంది ఉంటారు. సినిమాలోని ప్రతీ క్రాఫ్ట్‌లో ఆరితేరినవారి సంఖ్య చాలా తక్కువే ఉంటుంది. అందులో విజయ్ ఆంటోనీ ఒకరు. యాక్టర్‌గా, డైరెక్టర్‌గా, సింగర్‌గా, లిరిసిస్ట్‌గా, మ్యూజిక్ డైరెక్టర్‌గా, ఎడిటర్‌గా.. ఇలా సినిమాలోని చాలావరకు క్రాఫ్ట్స్‌లో విజయ్ గుర్తింపు తెచ్చుకున్నారు. అలాంటి విజయ్ ఆంటోనీ పర్సనల్ లైఫ్‌లో ఒక విషాదం చోటుచేసుకుంది. తన 17 ఏళ్ల కూతురు ఆత్మహత్య చేసుకుంది. ఈ విషయం కేవలం విజయ్ ఆంటోనీ కుటుంబాన్ని మాత్రమే కాదు.. పూర్తిగా సినీ పరిశ్రమను, ప్రేక్షకులను కూడా కలచివేసింది. దీంతో ఒక సినిమా ప్రమోషన్స్ సమయంలో తన కుటుంబం గురించి విజయ్ ఆంటోనీ చేసిన వ్యాఖ్యలు బయటికొచ్చాయి.
నిర్మాతగా మారిన విజయ్ ఆంటోనీ భార్య..
సినిమాల్లో ఎంత యాక్టివ్‌గా ఉన్నా.. కొందరు నటీనటులు మాత్రం తమ పర్సనల్ లైఫ్ గురించి ప్రేక్షకులతో పంచుకోవడానికి ఎక్కువగా ఇష్టపడరు. అలాంటి వారిలో విజయ్ ఆంటోనీ కూడా ఒకరు. తన భార్య ఫాతిమా విజయ్ ఆంటోనీ కూడా సినిమాల్లో యాక్టివ్ అయిన తర్వాత ఆమె గురించి ప్రేక్షకులకు తెలిసింది. హీరోగా, దర్శకుడిగా విజయ్ ఆంటోనీ సినిమాలను తెరకెక్కిస్తున్న క్రమంలో.. ఫాతిమా.. విజయ్ ఆంటోనీ ఫిల్మ్ కార్పోరేషన్ అనే నిర్మాణ సంస్థను ప్రారంభించి.. తన భర్త నటించిన సినిమాలను స్వయంగా నిర్మించడం మొదలుపెట్టింది. దీంతో ఆమె కూడా సినీ ప్రేక్షకులకు తెలియడం మొదలయ్యింది. కానీ విజయ్‌కు ఇద్దరు కూతుళ్లు ఉన్నా.. వారి గురించి మాత్రం ఎవరికీ పెద్దగా తెలియదు.
భార్య సపోర్ట్ ఉంటుంది..
విజయ్ ఆంటోనీ సన్నిహితులు ఎవరైనా.. తను ఈ స్టేజ్‌లో ఉండడానికి తన భార్య ఫాతిమానే కారణమని అంటుంటారు. పలు సందర్భాల్లో విజయ్ కూడా అదే మాట అన్నాడు. ‘బిచ్చగాడు 2’ మూవీ ప్రమోషన్స్ సమయంలో విజయ్ ఆంటోనీ.. తన భార్య గురించి చేసిన వ్యాఖ్యలు తాజాగా వైరల్ అయ్యాయి. ‘‘ప్రొడక్షన్ విషయంలో నా భార్య నాకు చాలా సపోర్ట్ చేస్తుంది. నన్ను చిన్నపిల్లాడిలాగా చూస్తుంది’’ అంటూ తన భార్య గురించి చెప్పుకొచ్చాడు విజయ్ ఆంటోనీ. తన భార్య మాత్రమే కాదు.. తన పిల్లలు, తన చుట్టూ ఉండేవారు, తనతో పనిచేసే వారు కూడా తన మాట వింటారని, అందుకే తన పనులన్నీ సులువుగా అయిపోతాయని అన్నాడు విజయ్ ఆంటోనీ.
మా నాన్న ఏంజెల్..
తనకు ఇద్దరు కూతుళ్లు ఉన్న విషయాన్ని కూడా విజయ్ ఆంటోనీ బయటపెట్టాడు. తనతో పాటు ‘బిచ్చగాడు 2’లో నటించిన ఒక క్యారెక్టర్ ఆర్టిస్ట్.. ఆ సినిమా షూటింగ్ సమయంలో విజయ్ ఆంటోనీ చిన్న కూతురిని కలిశానని, మా నాన్న ఏంజెల్ అని ఆ అమ్మాయి సంబరపడింది అన్న విషయాన్ని ప్రేక్షకులతో పంచుకున్నాడు. భార్య, పిల్లలతో సంతోషంగా ఉన్న విజయ్ ఆంటోనీ జీవితం ఒక్కసారిగా ఊహించని టర్న్ తీసుకుంది. పర్సనల్ లైఫ్‌లో సంతోషంగా ఉండడంతో పూర్తిగా ప్రొఫెషనల్ లైఫ్‌పై ఫోకస్ చేస్తున్న విజయ్ ఆంటోనీ పెద్ద కూతురు ఆత్మహత్య చేసుకొని చనిపోవడం బాధాకరమని సినీ ప్రముఖులు సానుభూతి తెలియజేస్తున్నారు.
Also Read: నాగార్జున నన్ను దత్తత తీసుకుంటా అన్నారు, ఇప్పుడు గుర్తుపట్టలేదు: నటి యానీ
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial