కోలీవుడ్ స్టార్ హీరో చియాన్ విక్రమ్ నటించిన పాన్ ఇండియా మూవీ 'తంగలాన్'కు ప్రేక్షకుల నుంచి మంచి ఆదరణ దక్కింది. కానీ ఈ సినిమా ఓటీటీ రిలీజ్ విషయంలో మాత్రం అడ్డంకులను ఎదుర్కొంటుంది. ఓ వివాదం కారణంగా ఈ సినిమాపై కోర్టులో కేసు వేసిన సంగతి తెలిసిందే. అయితే తాజాగా ఆ నిషేధాన్ని ఎత్తివేసినట్టుగా తెలుస్తోంది.
'తంగలాన్' వివాదం ఏమిటంటే?
చియాన్ విక్రమ్ హీరోగా, పా రంజిత్ దర్శకత్వంలో రూపొందిన పాన్ ఇండియా యాక్షన్ ఎంటర్టైనర్ 'తంగలాన్'. పాన్ ఇండియా వైడ్ గా రిలీజ్ అయిన ఈ సినిమాలో విక్రమ్ ఐదు విభిన్న పాత్రల్లో కనిపించారు. సినిమాలో విక్రమ్ తో పాటు పశుపతి, మాళవిక మోహనన్, డేనియల్ కాల్టాగిరోన్, హరికృష్ణన్, పార్వతీ తిరువోతు తదితరులు నటించారు. జివి ప్రకాష్ కుమార్ ఈ మూవీకి సంగీతం అందించగా, కర్ణాటక రాష్ట్రంలోని కోలార్ బంగారు క్షేత్రంలో జరిగిన యదార్థ సంఘటనల ఆధారంగా 'తంగలాన్'ను తెరకెక్కించారు. విక్ర, పార్వతి, మాళవిక నటన ఈ సినిమాలో హైలెట్ అని చెప్పవచ్చు. అయితే థియేటర్లలో సక్సెస్ ఫుల్ గా ఆడిన ఈ సినిమా ఓటిటి విషయం వచ్చేసరికి రిలీజ్ ఆగిపోయింది. అయితే తిరువళ్లూరుకు చెందిన ఓ వ్యక్తి ఈ సినిమా ఓటిటి రిలీజ్ పై అభ్యంతరం వ్యక్తం చేస్తూ ప్రజా ప్రయోజన పిటిషన్ దాఖలు చేశారు. ఈ సినిమాలో కొన్ని సన్నివేశాలు వైష్ణవులను కించపరిచే విధంగా ఉన్నాయని, బౌద్ధాన్ని పవిత్రంగా, వైష్ణవాన్ని జోక్‌గా చూపించిన సీన్స్ వల్ల ఓటీటీలో రిలీజ్ చేస్త ఇరువర్గాల మధ్య ఘర్షణకు దారితీసే అవకాశం ఉందని పిటిషన్‌లో పేర్కొన్నారు. అందుకే ఈ చిత్రాన్ని ఓటీటీలో రిలీజ్ చేయకుండా బ్యాన్ చేయాలని ఆ పిటిషన్ లో కోరారు.
బ్యాన్ చేయలేమన్న కోర్టు
తాజా సమాచారం ప్రకారం ఎట్టకేలకు కోర్టు ఈ సినిమాపై నిషేధాన్ని ఎత్తివేసినట్టుగా తెలుస్తోంది. ఎలాంటి అడ్డంకులు లేకుండా ఈ మూవీ ఓటిటిలో రిలీజ్ కాబోతోంది. తాజాగా పిటిషన్‌ను విచారించిన ప్రధాన న్యాయమూర్తి జస్టిస్‌ శ్రీరామ్‌, జస్టిస్‌ సెంథిల్‌ కుమార్ రామ్‌మూర్తి బెంచ్ సినిమా సెన్సార్‌ సర్టిఫికేట్‌ వచ్చాకే రిలీజ్ అయ్యింది కాబట్టి ఓటీటీ రిలీజ్ చేసేందుకు ఎలాంటి అడ్డంకి లేదని పేర్కొంటూ కేసును కొట్టివేసింది. సెంట్రల్ బోర్డ్ ఆఫ్ ఫిల్మ్ సర్టిఫికేషన్ సినిమాను నిశితంగా పరిశీలించిన తర్వాతే సర్టిఫికేషన్ జారీ చేసిందని తెలుపుతూ బ్యాన్ చేయలేమని వెల్లడించింది కోర్టు.
ఓటీటీ రిలీజ్ ఎప్పుడు?
ఇటీవల ఒక కార్యక్రమంలో 'తంగలాన్' నిర్మాత జ్ఞానవేల్ రాజా మాట్లాడుతూ మూవీ నెట్ ఫ్లిక్స్ లో రిలీజ్ కాబోతుందని హింట్ ఇచ్చారు. ఆయన మాట్లాడుతూ దీపావళికి ఈ సినిమాను నెట్ ఫ్లిక్స్ వారు షెడ్యూల్ చేశారని చెప్పుకొచ్చారు. 'తంగలాన్' పెద్ద సినిమా కాబట్టి పండగకు రిలీజ్ చేయబోతున్నారని, అయితే బయట సినిమాకు అడ్డంకులు ఎదురవుతున్నాయి అంటూ వస్తున్న వార్తలు ఆ వాస్తవమని కొట్టి పారేశారు. కానీ ఇంకా ఈ మూవీ ఓటిటి రిలీజ్ డేట్ పై అఫీషియల్ అనౌన్స్మెంట్ రాలేదు.