'లాల్ సింగ్ చడ్డా', 'మాచర్ల నియోజకవర్గం', 'కార్తికేయ 2'... థియేటర్లలో ఈ వారం మూడు సినిమాలు విడుదల అయ్యాయి. ఓటీటీలలో మరికొన్ని వచ్చాయి. లాంగ్ వీకెండ్ క్యాష్ చేసుకోవాలని చూశాయి. అవి పక్కన పెడితే... తెలుగు చలన చిత్ర పరిశ్రమలో ఏం జరుగుతోంది? టాలీవుడ్ లేటెస్ట్ అప్‌డేట్స్‌ ఏంటి? అనే వివరాల్లోకి వెళితే...
రాజమౌళి కాళ్ళు మొక్కిన అనుపమ!
'కార్తికేయ 2' శనివారం థియేటర్లలో విడుదలైంది. కుటుంబ సభ్యులతో కలిసి దర్శక ధీరుడు రాజమౌళి (Karthikeya 2) ప్రసాద్ మల్టీప్లెక్స్‌లో సినిమా చూడటానికి వెళ్లారు. షో కంప్లీట్ అయ్యాక... పార్కింగ్‌లో ఉన్నప్పుడు ఆయన్ను అనుపమా పరమేశ్వరన్ (Anupama Parameswaran) చూశారు. వెంటనే వెళ్లి రాజమౌళి కాళ్ళకు నమస్కరించారు. ఆ విజువల్స్ సోషల్ మీడియాలో వైరల్ అయ్యాయి. 'కార్తికేయ 2'తో విజయం అందుకున్న అనుపమ... త్వరలో సిద్ధూ జొన్నలగడ్డ సరసన 'డీజే టిల్లు 2'లో నటించనున్నారని టాక్ (Anupama Parameswaran In DJ Tillu 2 Movie).
రజనీకి జోడిగా తమన్నా?
సీనియర్ హీరోల సరసన నటించడానికి తనకు ఎటువంటి అభ్యంతరాలు లేవని తమన్నా సినిమాల ద్వారా చెబుతున్నారు. చిరంజీవి, వెంకటేష్ సరసన ఆమె నటించారు. ఇప్పుడు సూపర్ స్టార్ రజనీకాంత్‌కు జంటగా నటించడానికి రెడీ అవుతున్నారని టాక్. 'డాక్టర్', 'బీస్ట్' ఫేమ్ నెల్సన్ దిలీప్ కుమార్ దర్శకత్వంలో సూపర్ స్టార్ ఒక సినిమా చేస్తున్న సంగతి తెలిసిందే. 'జైలర్' టైటిల్ (Rajinikanth Jailer Movie) కన్ఫర్మ్ చేశారు. ఇందులో తమన్నా నటించనున్నారని టాక్. తొలుత ఐశ్వర్యా రాజేష్‌ను అనుకున్నప్పటికీ... ఇతర సినిమాలతో ఆమె బిజీగా ఉండి 'నో' చెప్పడంతో అవకాశం తమన్నా చెంతకు వచ్చిందట!
ఆగస్టు 18న తెలుగులో ధనుష్ 'తిరు'
ధనుష్ కథానాయకుడిగా... నిత్యా మీనన్, రాశీ ఖన్నా కథానాయికలుగా రూపొందిన సినిమా 'తిరు'. తమిళ సినిమా 'తిరుచిత్రాంబ‌లం'కు తెలుగు అనువాదమిది. లేటెస్టుగా ట్రైలర్ విడుదల చేశారు. ఆగస్టు 18న తమిళంతో పాటు తెలుగులోనూ విడుదల చేయనున్నట్లు పేర్కొన్నారు.
Also Read : 'బింబిసార' చూసిన నందమూరి బాలకృష్ణ - బాబాయ్ అండ్ ఫ్యామిలీ కోసం అబ్బాయ్ స్పెషల్ షో
'దిల్' రాజుకు కరోనా?
Dil Raju Down With Fever : ప్రముఖ నిర్మాత 'దిల్' రాజుకు ఫీవర్ వచ్చిందని ఫిల్మ్ నగర్ వర్గాల సమాచారం. గత కొన్ని రోజులుగా తెలుగు ఫిల్మ్ ఇండస్ట్రీ సమస్యలపై ఆయన చర్చలు జరుపుతున్నారు. ఫీవర్ రావడంతో ఆయనకు కరోనా వచ్చిందేమోనని అనుమానాలు మొదలయ్యాయట.
చియాన్ విక్రమ్ హీరోగా, 'కెజియఫ్ 2' హీరోయిన్ శ్రీనిధి శెట్టి (KGF 2 Heroine Srinidhi Shetty) జంటగా నటించిన సినిమా 'కోబ్రా'. ఈ నెల 31న థియేటర్లలో విడుదల కానుంది. ఇందులో 'తరంగణి' పాటను 16న విడుదల చేయనున్నట్లు చిత్ర బృందం ప్రకటించింది. 'మాచర్ల నియోజకవర్గం' చిత్రానికి తొలిరోజు వచ్చిన వసూళ్ళ పట్ల హీరో నితిన్ సంతోషం వ్యక్తం చేశారు. తన కెరీర్ లో బెస్ట్ ఓపెనింగ్స్ అని ఆయన అన్నారు.