Sonu Sood: అనుష్క హీరోయిన్ కావడానికి కారణం నేను, అసలు విషయం చెప్పిన పశుపతి!

దక్షిణాది సినిమా పరిశ్రమలో స్టార్ హీరోయిన్ గా కొనసాగుతోంది అనుష్క శెట్టి. అయితే, ఆమె ఇండస్ట్రీలోకి అడుగు పెట్టడానికి కారణం మాత్రం నటుడు సోనూ సూద్. స్వయంగా ఆయనే ఈ విషయాన్ని వెల్లడించారు.

Sonu Sood Recommended Anushka Shetty As The Heroine: అనుష్క శెటి గురించి సినీ అభిమానులకు పెద్దగా పరిచయం అవసరం లేదు. ‘సూపర్’ సినిమాతో తెలుగులోకి అడుగు పెట్టిన ఆమె ఆ తర్వాత టాలీవుడ్ తో పాటు సౌత్ ఫిల్మ్ ఇండస్ట్రీలో స్టార్ హీరోయిన్ గా ఎదిగింది. అయితే, ఆమె ఇండస్ట్రీలోకి అడుగు పెట్టడానికి కారణం మాత్రం నటుడు సోనూ సూద్. ఆయన కారణంగానే ‘సూపర్’ సినిమాలో అవకాశం వచ్చింది. ఈ విషయాన్ని స్వయంగా సోనూ సూదే చెప్పారు. తాజాగా ఓ ఇంటర్వ్యూలో పాల్గొన్న ఆయన అనుష్క సినీ ఎంట్రీ గురించి ఆసక్తికర విషయాలు వెల్లడించారు. 

నా రికమండేషన్ తోనే అనుష్కను తీసుకున్నారు - సోనూ సూద్

“అనుష్క, నేను ముంబైలో ఒకే జిమ్ లో వర్కౌట్స్ చేసేవాళ్లం. అప్పటి నేను ఇండస్ట్రీలో ఉన్నాను. టాలీవుడ్ డైరెక్టర్ పూరి జగన్నాథ్ తో ఫ్రెండ్షిప్ ఉంది. హిందీలో బ్లాక్ బస్టర్ హిట్ అందుకున్న ‘ధూమ్’ సినిమాను బేస్ చేసుకుని తెలుగులో ‘సూపర్’ అనే సినిమా చేయబోతున్నట్లు చెప్పారు. నన్ను, నాగార్జునను సెలెక్ట్ చేశారు. హీరోయిన్ కోసం కొత్త ఆర్టిస్టు కావాలని చూస్తున్నట్లు నాతో చెప్పారు. అప్పుడు నేను అనుష్క గురించి చెప్పాను. నిజానికి నేను అప్పటి వరకు అనుష్కతో ఎప్పుడూ మాట్లాడలేదు. జిమ్ లో కనిపించినప్పుడు స్మైల్ ఇచ్చేది. సినిమాలో ఆ పాత్రకు తను సూట్ అవుతుంది అనిపించింది. అప్పుడే జిమ్ ట్రైనర్ నుంచి ఆమె నెంబర్ తీసుకున్నాను. పూరీ జగన్నాథ్ గారికి చెప్పాను. ఆ తర్వాత అనుష్క సూపర్ సినిమాకు సెలెక్ట్ అయ్యింది” అని సోనూ సూద్ చెప్పుకొచ్చారు.  

అనుష్క నాతో ఫస్ట్ టైమ్ మాట్లాడింది అప్పుడే - సోనూ

‘సూపర్’ సినిమా సెట్ లో అనుష్క తనను చూసి ఆశ్చర్యపోయిందని సోనూ సూద్ చెప్పారు. “’సూపర్’ సినిమా షూటింగ్ అన్నపూర్ణ స్టూడియోలో కొనసాగుతోంది. అనుష్క అక్కడికి వచ్చినప్పుడు నన్ను చూసి షాక్ అయ్యింది. అప్పుడే తను నాతో ఫస్ట్ టైమ్ మాట్లాడింది. “మీరు ఇక్కడ ఏం చేస్తున్నారు?” అని అడిగింది. అప్పుడు డైరెక్టర్ అమెకు అసలు విషయం చెప్పారు. “సోనూ సూద్ మిమ్మల్ని రికమెండ్ చేశారు. ఆయన చెప్పడం వల్లే హీరోయిన్ గా తీసుకున్నాం” అన్నారు. అది విని అనుష్క ఆశ్చర్యపోయింది. ఆ తర్వాత ఫ్రెండ్స్ అయ్యాం. సౌత్ ఫిల్మ్ ఇండస్ట్రీలో కలిసి పలు సినిమాలు చేశాం” అని వివరించారు. 

పలు సినిమాల్లో కలిసి నటించిన అనుష్క, సోనూ

‘సూపర్’ సినిమాలో సోనూ సూద్  అనుష్క శెట్టికి అన్నగా నటించాడు. ఆమె నటించిన తొలి సినిమా సక్సెస్ కావడంతో వరుస అవకాశాలు వచ్చాయి. ‘విక్రమార్కుడు’, ‘లక్ష్యం’, ‘డాన్’, ‘శౌర్యం’ లాంటి వరుస విజయాలతో సక్సెస్ ఫుల్ హీరోయిన్ గా మారింది. ‘అరుంధతి’ సినిమాతో స్టార్ హీరోయిన్ అయ్యింది. ‘అరుంధతి’ సినిమాలో పశుపతిగా సోనూసూద్ అద్భుత నటనతో అందరినీ ఆశ్చర్యపరిచాడు. చాలా కాలం పాటు విలన్ గా నటించిన ఆయన.. గత కొంతకాలంగా తెలుగులో పెద్దగా సినిమాలు చేయడం లేదు. ఆయన చివరగా ‘ఆచార్య’ సినిమాలో కనిపించారు. అనుష్క కూడా ‘బాహుబలి’ తర్వాత సినిమాలు తక్కువగా చేస్తోంది. ఆమె చివరగా ‘మిస్ శెట్టి మిస్టర్ పోలిశెట్టి’ సినిమాలో నటించింది. ప్రస్తుతం క్రిష్ జాగర్లమూడితో కలిసి ‘ఘాటి’ అనే మూవీలో హీరోయిన్ గా చేస్తోంది.