లోకేష్ కనగరాజ్ దర్శకత్వంలో దళపతి విజయ్ నటిస్తున్న లేటెస్ట్ మూవీ 'లియో'(Leo) పై ఇప్పటికే ఏ రేంజ్ లో అంచనాలు ఉన్నాయో ప్రత్యేకంగా చెప్పనక్కర్లేదు. రీసెంట్ గా విడుదలైన ట్రైలర్ సినిమాపై అంచనాలను పీక్స్ కి చేర్చింది. ఈ ట్రైలర్ చూసిన ఫ్యాన్స్ అయితే కచ్చితంగా ఈ మూవీ లోకేష్ సినిమాటిక్ యూనివర్స్ లో భాగమని చెప్పకనే చెప్పేస్తున్నారు. ఇక 'లియో' ప్రమోషన్స్ లో భాగంగా దర్శకుడు లోకేష్ కనగరాజ్ కూడా ఓ ఇంటర్వ్యూలో 'లియో' మూవీ సినిమాటిక్ యూనివర్స్ లో భాగమని స్పష్టం చేశారు. దీంతో ఈ సినిమాలో లోకనాయకుడు కమల్ హాసన్ సర్ ప్రైజ్ ఎంట్రీ కూడా ఉంటుందని ఊహాగానాలు వినిపిస్తున్నాయి.
లేటెస్ట్ కోలీవుడ్ రిపోర్ట్స్ ప్రకారం, లియో మూవీలో కమల్ హాసన్ వాయిస్ ఓవర్ ఉంటుందట. సినిమా క్లైమాక్స్ లో కమల్ వాయిస్ ఓవర్ వస్తుందని, లియో తర్వాత లోకేష్ సినిమాటిక్ యూనివర్స్ లో విక్రమ్ ఎంట్రీ ఉంటుందని అంటున్నారు. అంటే లియో తర్వాత ఇదే యూనివర్స్ నుంచి 'విక్రమ్ 2' వస్తుందన్నమాట. అంతేకాకుండా కమల్ వాయిస్ మాత్రమే కాకుండా క్లైమాక్స్‌లో విక్రమ్ సర్ప్రైజింగ్ ఎంట్రీ కూడా ఉంటుందని చెబుతున్నారు. ఇదే విషయాన్ని దర్శకుడు లోకేష్ కనకరాజ్ పరోక్షంగా వెల్లడించారు. లియో లో మీరు ఊహించని సర్ప్రైజ్ లు ఉంటాయని వాటిని ఇప్పుడే చెప్పదలుచుకోలేదని అన్నాడు.
దీంతో లియోలో కచ్చితంగా కమల్ ఎంట్రీ ఉంటుందని ఫ్యాన్స్ అంతా భావిస్తున్నారు. ఇక సినిమా రిలీజ్ దగ్గర పడుతుండడంతో లోకేష్ కనగరాజ్ కోలీవుడ్ లో వరుస ఇంటర్వ్యూలు ఇవ్వడం మొదలుపెట్టాడు. ఈ ఇంటర్వ్యూల్లోనే లియోపై రకరకాల హింట్స్ ఇస్తూ సినిమాపై అంచనాలను తారస్థాయికి తీసుకెళ్తున్నాడు. "మరో పది రోజులు ఆగండి మీకే తెలుస్తుంది. సినిమాలో చాలా విషయాలని కావాలనే మేము దాచిపెట్టాం. ప్రేక్షకులు వాటిని పూర్తిగా థియేటర్స్ లో ఎక్స్ పీరియన్స్ చేయాలని అలా చేశాం" అంటూ చిత్ర నిర్మాత కూడా ఓ ఇంటర్వ్యూలో చెప్పుకొచ్చారు. మూవీ టీం సినిమాలో చాలా విషయాలను దాచి పెట్టమని అధికారికంగా స్పష్టం చేస్తుండడంతో కచ్చితంగా అ మూవీలో కమల్ ఎంట్రీ ఉంటుందని కోలీవుడ్ వర్గాల్లో గుసగుసలు వినిపిస్తున్నాయి.
ఇక ఈ మూవీలో విజయ్ కి జోడిగా త్రిష హీరోయిన్ గా నటిస్తోంది సుమారు. 15 ఏళ్ల తర్వాత విజయ్ సరసన త్రిష నటిస్తుండడంతో ఈ జోడిని బిగ్ స్క్రీన్స్ పై చూసేందుకు ఫ్యాన్స్ ఎంతో ఆసక్తిగా ఎదురు చూస్తున్నారు. యాక్షన్ కింగ్ అర్జున్, బాలీవుడ్ నటుడు సంజయ్ దత్, మన్సూర్ అలీ ఖాన్, గౌతమ్ వాసుదేవ్ మీనన్ కీలక పాత్రలో కనిపించనున్నారు. కోలీవుడ్ మ్యూజిక్ సెన్సేషన్ అనిరుద్ రవిచంద్రన్ సంగీతం అందిస్తున్న ఈ చిత్రాన్ని సెవెన్ స్క్రీన్ బ్యానర్ పై లలిత్ కుమార్ భారీ బడ్జెట్ తో పాన్ ఇండియా లెవెల్ లో నిర్మించారు. అక్టోబర్ 19 దసరా కానుకగా ఈ చిత్రం ప్రేక్షకుల ముందుకు రాబోతోంది.
Also Read : విజయ్ అభిమానులకు సారీ చెప్పిన విగ్నేష్ శివన్ - తప్పు తెలుసుకున్నా అంటూ సుదీర్ఘ పోస్ట్!