యువ హీరో నవీన్ పోలిశెట్టి సినిమాల్లో తన కామెడీ టైమింగ్ తో ప్రేక్షకులను విశేషంగా అలరిస్తుంటాడు. రియల్ లైఫ్ లోనూ ఎలాంటి మొహమాటం లేకుండా నిజాయితీగా మాట్లాడే నవీన్.. ఎలాంటి సిచ్యుయేషన్నైనా తనకు అనుకూలంగా మార్చుకోగలడు. తాజాగా తన పర్ఫెక్ట్ టైమింగ్ తో కేఏ పాల్ ను కూడా తన సినిమా ప్రచారంలో భాగం అయ్యేలా చేసి, సోషల్ మీడియాలో అందరి దృష్టిని ఆకర్షించాడు పోలిశెట్టి.
నవీన్ పోలిశెట్టి హీరోగా నటించిన 'మిస్ శెట్టి మిస్టర్ పోలిశెట్టి' సినిమా రిలీజ్ కు రెడీగా ఉంది. అనుష్క శెట్టి హీరోయిన్ గా నటించిన ఈ చిత్రం సెప్టెంబరు 7న ప్రేక్షకుల ముందుకు రానుంది. ఈ నేపథ్యంలో నవీన్ తన చిత్రాన్ని జనాల్లోకి తీసుకెళ్లడానికి ఉదృతంగా ప్రచారం చేస్తున్నాడు. ఒక్కడే ప్రమోషన్స్ ను తన భుజాల మీదకు ఎత్తుకొని రెండు తెలుగు రాష్ట్రాల్లో తిరుగుతూ, వాడ వాడలా ప్రేక్షకులని పలకరిస్తూ వస్తున్నాడు. ఈ క్రమంలో వైజాగ్ కు చేరుకున్న జాతిరత్నానికి కేఏ పాల్ ఎదురుపడటంతో అక్కడ ఆసక్తికరమైన సంఘటన చోటుచేసుకుంది.
ప్రజా శాంతి పార్టీ వ్యవస్థాపకుడు KA పాల్ ఆదివారం సాయంత్రం వైజాగ్ బీచ్ రోడ్ లో ప్రయాణిస్తూ, తన కారులోంచి ప్రజలకు అభివాదం చేసుకుంటూ వెళుతున్నారు. అక్కడికి వచ్చిన జనాలు 'సీఎం సీఎం' అని నినాదాలు చేస్తుండగా.. వారికి చేయి అందిస్తూ ముందుకు సాగుతున్నారు. అదే సమయంలో అనుకోకుండా అటుగా వెళ్తున్న నవీన్ పోలిశెట్టి.. ట్రాఫిక్ సిగ్నల్ వద్ద కేఏ పాల్ ను చూసి తన కారు డెక్ లో నుంచి బయటికి వచ్చి హాయ్ చెప్పారు. దీనికి కేఏ పాల్ కూడా స్పందించడంతో ఇద్దరూ కారు మీద నుంచే ఒకరినొకరు చేతులు ఊపుకుంటూ అభివాదం చేసుకున్నారు. నవీన్ ను చూసిన యువకులు సెల్ఫీల కోసం నవీన్ వైపు పరుగులు తీశారు.
విశాఖపట్నం రామకృష్ణ బీచ్ రోడ్ లో అనుకోకుండా ఎదురుపడ్డ నవీన్ పోలిశెట్టి - కేఏ పాల్ సంఘటనను కొందరు అభిమానులు తమ కెమెరాల్లో బంధించి, సోషల్ మీడియాలో షేర్ చేసారు. ఈ వీడియోతో ఇప్పుడు 'మిస్ శెట్టి మిస్టర్ పొలిశెట్టి' హ్యాష్ ట్యాగ్ ట్రెండ్ అవుతోంది. నెట్టింట వైరల్ అవుతున్న ఈ వీడియోపై నెటిజన్స్ ఫన్నీ కామెంట్స్ పెడుతూ ఎంజాయ్ చేస్తున్నారు. మన జాతిరత్నం టైమింగ్ పర్ఫెక్ట్ గా ఉంటదని, ఎలాంటి విషయాన్నైనా తన సినిమా ప్రమోషన్స్ కోసం వాడుకోవడంలో దిట్ట అని వ్యాఖ్యానిస్తున్నారు.
ఇకపోతే 'జాతిరత్నాలు' వంటి బిగ్గెస్ట్ బ్లాక్ బస్టర్ తర్వాత నవీన్ పోలిశెట్టి నుంచి వస్తోన్న 'మిస్ శెట్టి.. మిస్టర్ పోలిశెట్టి' సినిమాపై అందరిలో మంచి అంచనాలున్నాయి. అందులోనూ తనకన్నా సీనియర్ అయిన, వయసులో పెద్దదైన అనుష్క శెట్టితో కలిసి నటిస్తున్న మూవీ కావడంతో అందరిలో ఆసక్తి నెలకొంది. పెళ్లి చేసుకోకుండా పిల్లలు కావాలి అనుకునే ఓ యువతికి.. స్టాండప్ కమెడియన్ అయిన ఓ కుర్రాడికి మధ్య జరిగే కథే ఈ సినిమా అని ట్రైలర్ చూస్తే అర్థమవుతోంది. మహేష్ బాబు దర్శకత్వంలో ఈ రొమాంటిక్ కామెడీ ఎంటర్టైనర్ తెరకెక్కుతోంది. యూవీ క్రియేషన్స్ బ్యానర్ లో వంశీ, ప్రమోద్ నిర్మిస్తున్నారు.
Also Read: 72 ఏళ్ళ వయసులో రజినీ ర్యాంపేజ్ మామూలుగా లేదుగా!
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial