మమ్మూటి కొడుకుగా కాకుండా పాన్ ఇండియా హీరోగా తనకంటూ ప్రత్యేక గుర్తింపు తెచ్చుకున్నాడు దుల్కర్ సల్మాన్. భాషతో సంబంధం లేకుండా.. అన్ని రకాల పాత్రల్లో ఒదిగిపోతూ టాలెంట్ హీరోగా రాణిస్తున్నాడు. ఇప్పుడు దుల్కర్ చేతినిండా బోలెడన్ని సినిమాలున్నాయి. దుల్కర్ తెలుగులో నటించిన ‘సీతారామం’ మూవీ ఎంత పెద్ద హిట్ కొట్టిందే తెలిసిందే. ఎప్పుడూ నవ్వుతూ.. నవ్విస్తూ.. చిరునవ్వుతో ఉండే ఆ మోము ఇప్పుడు చిన్నబోయింది. ఏమైందో ఏమో దుల్కార్ చెమర్చిన కళ్లతో తీవ్ర భావోద్వేగానికి గురయ్యాడు. తన బాధను వ్యక్తం చేస్తూ ఇన్‌స్టాగ్రామ్‌లో ఓ వీడియోను పోస్ట్ చేశాడు. ఆ తర్వాత మళ్లీ దాన్ని డిలీట్ చేసేశాడు.
ఇంతకీ ఏమైంది?
‘‘నేను కొంతకాలంగా నిద్రపోవడం లేదు. ఇలాంటి పరిస్థితిని మొదటిసారి ఎదుర్కొంటున్నాను. అన్ని విషయాలు ఒకలా ఉండవు. ఇది నా మనస్సు నుంచి బయటకు పోవడం లేదు. నాకు మరింత చెప్పాలని ఉంది. కానీ, నేను చెప్పలేకపోతున్నా’’ అంటూ దుల్కర్ తన ఇన్‌స్టాగ్రామ్‌లో ఆ వీడియోను పోస్ట్ చేశాడు. ఆ తర్వాత కొన్ని నిమిషాల్లో దుల్కర్ ఆ వీడియోను డిలీట్ చేశాడు. అయితే, అప్పటికే కొందరు అభిమానులు ఆ వీడియోన్ డౌన్లోడ్ చేసేశారు. సోషల్ మీడియాలో ఆ వీడియోను పెట్టి.. దుల్కర్‌కు ఏమైందంటూ ప్రశ్నల వర్షం కురిస్తున్నారు. దుల్కర్‌ను అంతగా బాధపెట్టిన విషయం ఏమిటంటూ కామెంట్లు చేస్తున్నారు. ‘‘బహుశా ఏదో ప్రకటన కోసం దుల్కర్ అలా చేసి ఉంటాడు’’ అని పలువురు అంటున్నారు. అయితే, ఇప్పటి వరకు మీడియాలో దుల్కర్ గురించి ఎలాంటి నెగిటివ్ ఆర్టికల్ రాలేదు. సోషల్ మీడియాలో కూడా పెద్దగా ట్రోల్స్ లేవు. ఈ నేపథ్యంలో ఇంట్లో ఏమైనా సమస్యలున్నాయా? లేదా డిప్రెషన్‌లో ఉన్నాడా అంటూ రకరకాలుగా.. ఎవరి సందేహాలను వారు వ్యక్తం చేస్తున్నారు. ఒక వేళ దుల్కర్ దీన్ని సినిమా ప్రమోషన్ కోసమో, ప్రకటన కోసమో చేసి ఉంటే.. తప్పకుండా నెటిజన్స్ ట్రోల్ చేస్తారు. అనవసరంగా వివాదంలో చిక్కుకుంటాడు.
‘సీతారామం’ సినిమాతో మంచి క్లాస్ హిట్‌ను అందుకున్న దుల్కర్.. ఇప్పుడు ఫుల్ మాస్ అవతారంలో ‘కింగ్ ఆఫ్ కొథా’ మూవీతో వస్తున్నాడు. ఇటీవల విడుదలైన ఈ మూవీ టీజర్ అభిమానుల్లో అంచనాలు పెంచేసింది. అలాగే వెంకీ అట్లూరి రూపొందిస్తోన్న పాన్-ఇండియన్ మూవీకి కూడా దుల్కర్ సైన్ చేశాడు. ఫార్చ్యూన్ ఫోర్ సినిమాతో కలిసి సితార ఎంటర్‌టైన్‌మెంట్స్ ఈ మూవీ నిర్మిస్తుంది. ఈ మూవీని శ్రీకరా స్టూడియోస్ సమర్పిస్తుండగా.. 2024 వేసవిలో విడుదల చేసేందుకు మేకర్స్ ప్లాన్ చేస్తున్నట్టు సమాచారం. ఇంకా పేరు పెట్టని కొత్త ప్రాజెక్ట్ తెలుగు, తమిళం, మలయాళం, కన్నడ, హిందీలో విడుదల కానుంది. మొదటి పాన్-ఇండియా చిత్రంతో వస్తోన్న డైరెక్టర్ వెంకీ అట్లూరి మాట్లాడుతూ.. తాను దుల్కర్ సల్మాన్ సినిమాను డైరెక్ట్ చేయబోతున్నందుకు చాలా సంతోషిస్తున్నానని సోషల్ మీడియా ద్వారా వెల్లడించారు.
Read Also : Skanda Title Glimpse: రామ్, బోయపాటి పాన్ ఇండియా మూవీకి టైటిల్ ఫిక్స్ - గ్లింప్స్ వీడియో అదిరింది!