'గాడ్ ఫాదర్'... ఇప్పుడు చిరంజీవి హీరోగా నటిస్తున్న సినిమాల్లో ఒకటి. ఇందులో ఆయన లుక్ ఎలా ఉంటుంది? అనే ప్రశ్నకు సమాధానం దొరికింది. మలయాళ హిట్ 'లూసిఫర్'కు రీమేక్ ఇది. ఇందులో ముఖ్యమంత్రి హఠాన్మరణంతో ఆయన కుటుంబానికి అండగా నిలబడే అన్నయ్యగా, ప్రజలకు సేవ చేసే ఎమ్మెల్యేగా... అంతకు ముందు డాన్‌గా... రెండు షేడ్స్ ఉన్న పాత్రలో మెగాస్టార్ చిరంజీవి కనిపించనున్నారు. ప్రస్తుతం ముంబైలో చిత్రీకరణ జరుగుతోంది. చిరంజీవి, సల్మాన్ ఖాన్ మీద కీలక సన్నివేశాలు తెరకెక్కిస్తున్నారు.
మలయాళంలో పృథ్వీరాజ్ సుకుమారన్ పోషించిన పాత్రను తెలుగులో సల్మాన్ ఖాన్ చేస్తున్నారు. మోహన్ లాల్ పాత్రను తెలుగులో చిరంజీవి చేస్తున్నారు. కథ ప్రకారం ముంబైలో సల్మాన్ ఎంట్రీ ఉంటుంది. ఆ సన్నివేశాలు ఇప్పుడు తీస్తున్నారు. సల్మాన్‌ను సెట్స్‌కు చిరంజీవి ఆహ్వానించారు. ఆ సమయంలో తీసిన ఫొటో విడుదల చేశారు. అందులో చిరంజీవి లుక్ రివీల్ అయ్యింది. సాల్ట్ అండ్ పెప్పర్ స్టైల్ గడ్డంతో చిరంజీవి కనిపించారు. హెయిర్ స్టైల్ కూడా మారింది. కొంచెం గోల్డెన్ కలర్ హెయిర్ కనిపించింది. సినిమాలో చిరంజీవి ఇదే లుక్ లో కనిపిస్తారని ఊహించవచ్చు. 'భోళా శంకర్' ఫస్ట్ లుక్, ఇప్పుడీ లుక్ చూస్తే... చిరంజీవి లుక్స్ లో మార్పు గమనించవచ్చు.
Also Read: ముంబైలో మెగాస్టార్, బాలీవుడ్ భాయిజాన్‌తో కలిసి!
'గాడ్ ఫాదర్' సినిమాలో నయనతార కూడా నటిస్తున్నారు. చిరంజీవి సోదరి పాత్రలో ఆమె కనిపించనున్నారు. ఈ సినిమాకు తమన్ సంగీతం అందిస్తున్నారు. ఆల్రెడీ ఆయన ట్యూన్స్ కంపోజ్ చేయడం స్టార్ట్ చేశారు. చిరంజీవి, సల్మాన్ ఖాన్ మీద ఓ పాటను తెరకెక్కించడానికి ప్లాన్ చేశారు. ఆ పాటకు స్పెషల్ ట్యూన్ రెడీ చేస్తున్నారట. మోహన్ రాజా దర్శకత్వంలో... కొణిదెల సురేఖ సమర్పణలో ఆర్బీ చౌదరి, ఎన్వీ ప్రసాద్ ఈ చిత్రాన్ని నిర్మిస్తున్నారు.
Also Read: కొణిదెల 'భోళా' శంకర్ - మహాశివరాత్రికి కొత్త లుక్‌తో వచ్చేసిన మెగాస్టార్