సునీల్ (Sunil), అనసూయ భరధ్వాజ్ (Anasuya Bharadwaj) ప్రధాన పాత్రల్లో దర్శకేంద్రుడు కె. రాఘవేంద్రరావు సమర్పణలో రూపొందుతున్న చిత్రానికి 'వాంటెడ్ పండుగాడ్' (Wanted PanduGaad movie) టైటిల్ ఖరారు చేశారు. 'పట్టుకుంటే కోటి...' అనేది ఉపశీర్షిక. ఈ చిత్రానికి శ్రీధర్ సీపాన దర్శకత్వం వహిస్తున్నారు. సాయిబాబా కోవెలమూడి, వెంకట్ కోవెలమూడి నిర్మాతలు.
ఉగాది సందర్భంగా 'వాంటెడ్ పండుగాడ్' టైటిల్ వెల్లడించడంతో పాటు సినిమా ఫస్ట్ లుక్ (Wanted PanduGaad Movie First Look) విడుదల చేశారు. అందులో సునీల్, అనసూయ సహా ఇతర ప్రధాన తారాగణం '30 ఇయర్స్' పృథ్వీ, శ్రీనివాసరెడ్డి, 'వెన్నెల' కిషోర్, సప్తగిరి, 'సుడిగాలి' సుధీర్ (Sudigali Sudheer), విష్ణుప్రియ (Vishnupriya), దీపికా పిల్లి తదితరులు ఉన్నారు. కామెడీ ఎంట‌ర్‌టైన‌ర్‌గా సినిమాను రూపొందిస్తున్నారట.
"రాఘవేంద్ర రావు గారితో సినిమా చేయాలనేది నా కల. ఆయనతో పని చేసే అవకాశం రావడం అదృష్టంగా, గౌరవంగా భావిస్తున్నాను" అని అనసూయ పేర్కొన్నారు.
'పుష్ప: ద రైజ్'లో సునీల్, అనసూయ జంటగా కనిపించారు. ఆ సినిమా సక్సెస్ పార్టీలో రాఘవేంద్రరావును కలిసిన అనసూయ... అవకాశం ఇవ్వమని అడిగారట. 'పుష్ప' తర్వాత 'దర్జా' అనే మరో సినిమాలో కూడా సునీల్, అనసూయ కలిసి నటిస్తున్నారు. ఇప్పుడీ 'వాంటెడ్ పండుగాడ్' చేస్తున్నారు.