స్టైలిష్ స్టార్ అల్లు అర్జున్ గురించి ప్రత్యేకంగా చెప్పాల్సిన అవసరం లేదు. సుకుమార్ దర్శకత్వంలో ఆయన నటించిన ‘పుష్ప’ చిత్రం పాన్ ఇండియా రేంజిలో సరికొత్త రికార్డులు క్రియేట్ చేసింది. 2021లో రూ. 320 కోట్ల గ్రాస్ వసూళ్లను సాధించిన సినిమాగా కొత్త చరిత్ర లిఖించింది. ‘పుష్ప: ది రైజ్‌’ సినిమాలోని నటనగాను అల్లు అర్జున్ జాతీయ ఉత్తమ నటుడి అవార్డుకు ఎంపికయ్యాడు. ఈ ప్రతిష్టాత్మక అవార్డును గెలుచుకున్న తొలి తెలుగు నటుడిగా అల్లు అర్జున్ చరిత్ర సృష్టించాడు. ప్రస్తుతం ఈ బన్నీ ‘పుష్ప: ది రూల్’ మూవీ షూటింగ్‌లో ఉన్నాడు.
బన్నీ వీడియోను షేర్ చేసిన ఇన్స్టాగ్రామ్
ఈ నేపథ్యంలో అల్లు అర్జున్ కు ఓ అరుదైన గుర్తింపు లభించింది. ఆయనకు సంబంధించిన జీవిత విశేషాలతో పాటు ‘పుష్ప2’ షూటింగ్ కు సంబంధించిన వివరాలతో కూడిన ఓ వీడియోను, ప్రపంచంలోని అత్యంత ప్రజాదరణ పొందిన ఫోటో షేరింగ్ ప్లాట్‌ఫామ్ ఇన్‌స్టాగ్రామ్‌తో తన అధికారిక ఖాతాలో షేర్ చేసింది. ఇందులో తన రోజువారి కార్యక్రమాలతో పాటు సినిమా షూటింగ్, కుటుంబంతో గడిపే క్షణాలను పొందుపర్చింది. ప్రస్తుతం ఈ వీడియో సోషల్ మీడియాలో వైరల్ అవుతోంది.
ఇన్ స్టాతో జత కట్టిన తొలి ఇండియన్ హీరో అల్లు అర్జున్
అటు ఇన్‌స్టాగ్రామ్‌తో అధికారికంగా కొలాబరేట్ అయిన తొలి నటుడిగా అల్లు అర్జున్ గుర్తింపు తెచ్చుకున్నారు. ఇప్పటి వరకు ఈ ఘనత ఏ ఇండియన్ స్టార్ కు లభించలేదు. ఇన్స్టాగ్రామ్ బృందం ఇటీవల హైదరాబాద్‌కు వచ్చి అల్లు అర్జున్‌కి సంబంధించిన కొన్ని వీడియోలను చిత్రీకరించింది. సుమారు ఒక రోజంతా ఇన్ స్టా టీమ్ ఆయనతోనే గడిపింది. ఆయన రోజు వారీ జీవిత విశేషాలను వీడియోల్లో బంధించింది. బన్నీ ఈ వీడియోను ఇవాళ ఇన్ స్టా గ్రామ్ పేజీలో షేర్ చేశారు. ఇదే విషయాన్ని వెల్లడిస్తూ నిన్న అల్లు అర్జున్ ఇన్ స్టా వేదికగా ఓ పోస్టు పెట్టాడు. ఆయన పెట్టిన పోస్టు టాలీవుడ్ తో పాటు ఆయన అభిమానులలో ఆసక్తి కలిగించింది. బుధవారం ఉదయం 9 గంటలకు స్పెషల్‌ సర్‌ప్రైజ్‌ ఇవ్వనున్నట్లు అల్లు అర్జున్ వెల్లడించాడు. వ్యక్తిగత విశేషం ఏమైనా చెప్పబోతున్నారా? లేదంటే సినిమా అప్‌డేట్‌ ఇస్తారా? అని సినీ జనాలతో పాటు మూవీ లవర్స్ ఎదురు చూశారు. కానీ, ఇన్ స్టాలో ఆయన వీడియో విడుదల కావడంతో బన్నీ చెప్పిన సర్ ప్రైజ్ ఇదే అని అందరికీ అర్థం అయ్యింది.
ఇన్ స్టాలో బన్నీకి భారీ ఫాలోయింగ్
అల్లు అర్జున్ సౌత్ ఇండస్ట్రీలో మరే హీరోకు సాధ్యం కాని రీతిలో ఇన్ స్టాలో ఫాలోయర్స్ సంపాదించుకున్నారు. ఈయన ఇన్స్టాగ్రామ్ ఖాతాలో ఏకంగా 20 మిలియన్లకు పైగా ఫాలోయర్స్ ఉన్నారు. దక్షిణాది చిత్ర పరిశ్రమలో ఈ రికార్డు అందుకున్న తొలి హీరో ఆయనే కావడం విశేషం. నవంబర్‌ 2017 లో, అధికారికంగా ఇన్‌స్టాలోకి వచ్చాడు అల్లు అర్జున్. అప్పటి నుంచి రోజు రోజుకూ తనకు సంబంధించిన విషయాలను పంచుకుంటూ, అభిమానులను పెంచుకుంటూ వెళ్తున్నాడు.
Read Also: డ్రగ్స్ కేసులో నాకు నోటీసులా? - స్పందించిన వరలక్ష్మీ శరత్ కుమార్
ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial