కనకం వాళ్ళని రుద్రాణి అవమానించబోతుంటే కావ్య గట్టిగానే బదులిస్తుంది. రుద్రాణి నువ్వు మహా ఇల్లాలివి నుదుటిన బొట్టు ఉంటుంది కానీ మెడలో తాళి ఉండదు. మీ ఆయన ఎక్కడ ఉన్నాడని మేము అడిగామా? నీ కొడుకులాంటి కొడుకు నాకు ఉంటే నడిరోడ్డు మీద నిలబెట్టి కాళ్ళు చేతులు విరగ్గొట్టి అమ్మేసే వాడినని మీనాక్షి తిడుతుంది. ఇలాంటి అలాగాజనంతో నేను వియ్యం అందుకోవాలా? నెవర్ లగ్నాలు పెట్టుకునేదే లేదు వెళ్లిపోండి ఇక్కడి నుంచి కోర్టుకి ఎక్కండి అక్కడ చూసుకుంటాను. రాహుల్ మంచి లాయర్ తో మాట్లాడు వీళ్ళ మీద చీటింగ్ కేసు పెట్టి లోపల వేయిస్తానని రుద్రాణి సీరియస్ అవుతుంది.
రాజ్: అత్తా ఎవరు ఎవరి మీద చీటింగ్ కేసు పెడతారు. ఈ కళావతికి ముసుగు వేసి పీటల మీద కూర్చోబెట్టి పెళ్లి జరిపించినందుకు మొదట నేను నీమీద పెట్టాలి చీటింగ్ కేసు. పీటల మీద పెళ్లి కూతుర్ని లేవదీసుకుని వెళ్లినందుకు నేను నీ కొడుకు మీద పెట్టాలి చీటింగ్ కేసు. ఈ ఇంట్లో ఎవరు నోరు విప్పినా నీ మర్యాద పోతుంది. రేయ్ నువ్వు ఎక్కడికి లేచావ్ చేసిందంతా చేసి కూర్చో. ఎవరు కాదన్నా అవునన్నా, ఎవరికి ఇష్టం ఉన్నా లేకపోయినా ఈ ఇంట్లో ఉన్న ఒకతను ఆ ఇంట్లో ఉన్న అమ్మాయిని మోసం చేశాడని రుజువు అయ్యింది కాబట్టి పెళ్లి జరిగి తీరుతుంది.
Also Read: యష్, వేద సంతోషం చూసి రగిలిపోతున్న మాళవిక- కూతురి జీవితం గురించి భయపడుతున్న సులోచన
సీతారామయ్య: ఈ పెళ్లి జరిగి తీరుతుంది.
ఎల్లుండి దివ్యమైన ముహూర్తం ఉందని పంతులు చెప్తాడు. తమకి కష్టమని కనకం అంటుంది. కానీ మీనాక్షి మాత్రం పెళ్లికి కావాల్సినవన్నీ తను తీసుకొస్తామని చెప్తుంది. మా ఇంట్లో మా మనవడిగా పెరిగిన రాహుల్ పెళ్లి మా ఖర్చులతో జరిపిస్తామని ఇంద్రాదేవి అంటుంది. తమకు చేతనైనంత వరకు జరిపిస్తామని కృష్ణమూర్తి చెప్తాడు. కానీ ఒక షరతు పెళ్లి సింపుల్ గా ఈ ఇంట్లోనే జరగాలి. లేదంటే మీడియా వాళ్ళు వచ్చి గొడవ చేస్తారు. వీళ్ళు పెళ్ళికి ముందే తొందర పడినట్టు బయట పడుతుందని అపర్ణ చెప్తుంది. కావ్య కూడా నా పెళ్ళిలో జరిగినట్టే ఈ పెళ్ళిలో కూడా గొడవలు జరుగుతాయని అంటుంది. స్వప్న మాత్రం కావ్యని అపార్థం చేసుకుని మనసులో తిట్టుకుంటుంది.
స్వప్న నాకు ఆస్తి రాదని తెలిసినా కూడా పెళ్లికి సిద్ధమయింది. కానీ ఈ పెళ్లి ఎట్టి పరిస్థితుల్లోనూ జరగదని రాహుల్ అనుకుంటాడు. కళ్యాణ్ కి ధాన్యలక్ష్మి ఫోన్ చేసి రాహుల్ కి పెళ్లి ముహూర్తం పెట్టారని ఎల్లుండేనని చెప్పేసరికి సంతోషపడతాడు. వెంటనే అప్పుని ఎత్తుకుని గాల్లో గీరగిరా తిప్పేసి వదిన అనుకున్నది సాధించేసిందని సంబరపడతాడు. స్వప్న పెళ్లి చేయడం కోసం ఇల్లు తాకట్టు పెడదామని కాగితాలు తీసుకురమ్మని కృష్ణమూర్తి చెప్తాడు. కానీ కనకం ఇప్పటికే తాకట్టు పెట్టిన విషయం గుర్తుకు వచ్చి భయపడుతుంది. ఉన్న ఇల్లు కూడా తాకట్టు పెడితే ఉండటానికి నిలువ నీడ కూడా ఉండకుండ పోతుందని కవర్ చేసేందుకు ట్రై చేస్తుంది.
Also Read: కేడీ గ్యాంగ్ మీద కంప్లైంట్ ఇస్తానన్న వసు- తండ్రిని తలుచుకుని బాధపడుతున్న రిషి
కావ్య కాలికి పట్టీలు పెట్టుకుని కావాలని గోల గోల చేస్తూ నడుస్తుంది. రాజ్ ఒప్పుకోకపోయినా కూడా కావ్య బెడ్ మీదే పడుకుంటానని అంటుంది. కానీ రాజ్ మాత్రం ఈ బెడ్ నాదని గొడవ చేస్తాడు. అయినా కావ్య ఏ మాత్రం తగ్గకుండా పడుకుంటుంది. పడుకోమని అంటే నీ పక్కన నేను పడుకునే ప్రసక్తే లేదని వెళ్ళి నేల మీద చాప వేసుకుని పడుకుంటాడు. అది చూసి కావ్య బాధగా తను కూడా కింద పడుకుంటుంది.