బిగ్ బాస్ సీజన్ 7లోకి కంటెస్టెంట్స్‌గా ఎంటర్ అయిన కొందరికి బయట నుండే పరిచయం ఉంది. కొందరైతే కలిసి పనిచేశారు కూడా. దీంతో బిగ్ బాస్ హౌజ్‌లో గ్రూపిజంలాంటివి జరుగుతున్నాయని ఇతర కంటెస్టెంట్స్ ఆరోపిస్తున్నారు. ముఖ్యంగా గ్రూపిజం అని ఆరోపణలు ఎదుర్కుంటున్న వారిలో ప్రియాంక, అమర్‌దీప్ ముందు ఉంటారు. బిగ్ బాస్ సీజన్ 7 ప్రారంభమయిన మొదట్లో ప్రియాంక, అమర్ చాలా టాస్కులలో అయితే నువ్వు గెలవాలి లేదా నేను గెలవాలి అనే యాటిట్యూడ్‌తో ఉండేవారు. ఇక వీరు బిగ్ బాస్ హౌజ్‌లోకి వెళ్లిన ఆరు వారాల తర్వాత బయట ఉన్న వారి ఫ్యాన్స్‌కు ఒక సర్‌ప్రైజ్ ఇచ్చారు.
ఆఫ్ స్క్రీన్ కపుల్ అనుకున్నారు..
అమర్‌దీప్ హీరోగా, సైడ్ క్యారెక్టర్‌గా చాలా సీరియల్స్‌లో కనిపించాడు. కానీ అన్నింటికంటే తనకు ఎక్కువ ఫేమ్ తీసుకొచ్చిన సీరియల్ ‘జానకి కలగనలేదు’. ఈ సీరియల్ కోసం తను ప్రియాంకతో జతకట్టాడు. ఇందులో అమర్‌దీప్.. రామ పాత్రలో కనిపించగా.. ప్రియాంక సీతగా నటించింది. పైగా ఈ సీరియల్‌లో వారి కెమిస్ట్రీకి కూడా నూటికి నూరు మార్కులు పడ్డాయి. వీరు కేవలం ఆన్ స్క్రీన్ కపుల్ మాత్రమే కాదని.. ఆఫ్ స్క్రీన్ కపుల్ కూడా అని రూమర్స్ కూడా వైరల్ అయ్యాయి. కానీ అనూహ్యంగా మరో సీరియల్ నటి తేజస్విని గౌడను పెళ్లి చేసుకొని ఆ రూమర్స్ అన్నింటికి చెక్ పెట్టాడు అమర్‌దీప్. అయినా కూడా అమర్, ప్రియాంక పెయిర్‌కు ఫ్యాన్ ఫాలోయింగ్ ఏ మాత్రం తగ్గలేదు.
సీరియల్స్ మాత్రమే కాదు.. షోలలో కూడా..
అమర్‌దీప్, ప్రియాంక కలిసి కేవలం ‘జానకి కలగనలేదు’ అనే సీరియల్‌లో మాత్రమే కాదు.. పలు షోలలో, ఈవెంట్స్‌లో కూడా పాల్గొన్నారు. కలిసి డ్యాన్స్ పర్ఫార్మెన్స్‌లు కూడా ఇచ్చారు. అయితే వీరిద్దరు కలిసి చేసిన ఒక ఆల్బమ్ సాంగ్‌కు సంబంధించిన ప్రోమో తాజాగా బయటికొచ్చింది. అసలు వీరిద్దరూ కలిసి ఒక ఆల్బమ్ సాంగ్ చేశారని అమర్‌దీప్ కానీ, ప్రియాంక కానీ బిగ్ బాస్ హౌజ్‌లోకి వెళ్లే ముందు ఒక హింట్ కూడా ఇవ్వలేదు. అలాంటిది సడెన్‌గా ఈ పాటకు సంబంధించిన ప్రోమో విడుదల అవ్వగానే వీరి ఫ్యాన్స్ ఆశ్చర్యపోతున్నారు. తాజాగా విడుదలయిన ఈ పాట ప్రోమో అప్పుడే ట్రెండింగ్‌లోకి వెళ్లిపోయింది.
నల్ల నల్ల మబ్బులా..
‘నల్ల నల్ల మబ్బులా’ అంటూ సాగే ఈ పాట పల్లెటూరి నేపథ్యంలో తెరకెక్కింది. ఇందులో అమర్‌దీప్, ప్రియాంక పల్లెటూరి ప్రేమజంటగా కనిపించారు. రాజ్ నరేంద్ర ఈ పాటను డైరెక్ట్ చేయగా.. మదీన్ ఎస్‌కే దీనికి సంగీతాన్ని అందించారు. కుమార్ కోట లిరిక్స్‌ను సమకూర్చగా.. బాలు ఎస్‌ఎమ్ పాటకు కొరియోగ్రాఫీ చేశారు. ఈ పాటకు సంబంధించిన ప్రోమోలో అమర్‌దీప్, ప్రియాంక తమ క్యూట్ ఎక్స్‌ప్రెషన్స్‌తో ఆకట్టుకోవడమే కాకుండా డ్యాన్స్ కూడా బాగుంది అనిపించేలా చేశారు. అయితే ఇలాంటి ఒక పాట చేసినట్టు కనీసం హింట్ కూడా ఇవ్వకుండా అమర్‌దీప్, ప్రియాంక బిగ్ బాస్ హౌజ్‌లోకి వెళ్లిన తర్వాత దీనిని ఎందుకు రిలీజ్ చేశారు, దీని వెనుక ఇంకేదైనా కారణం ఉందా అని బిగ్ బాస్ ప్రేక్షకులు అనుమానిస్తున్నారు.
Also Read: అమర్‌ను ఆడేసుకున్న ‘బిగ్ బాస్’ - స్పూన్‌తో స్విమ్మింగ్ పూల్‌ను ఖాళీ చేయాలంటూ ఆదేశం
Join Us on Telegram: https://t.me/abpdesamofficial