Bandla Ganesh: హీరోగా మారబోతున్న బండ్ల గణేష్.. ఆ చిత్రం రీమేక్‌తో థ్రిల్ చేస్తారట!

సినీ రంగం నుంచి రాజకీయ రంగంలోకి ప్రవేశించిన బండ్ల గణేష్.. ఇప్పుడు హీరోగా ఎంట్రీ ఇచ్చేందుకు సిద్ధమవుతున్నారు.

ఒకప్పుడు హాస్య నటుడిగా తెలుగు తెరకు పరిచయమైన బండ్ల గణేష్.. ఆ తర్వాత నిర్మాతగా మారిన సంగతి తెలిసిందే. చివరికి రాజకీయ నాయకుడిగానూ తనకంటూ ప్రత్యేకత ఏర్పరుచుకున్నారు. అయితే, ఓ ఇంటర్వ్యూలో బ్లేడుతో పీక కోసుకుంటా అని కామెంట్ చేసి పుణ్యానికి.. బ్లేడు గణేష్ అంటూ నెటిజనులు ట్రోల్ చేశారు. మొత్తానికి ఆ ముద్ర నుంచి ఇప్పుడిప్పుడే బయటపడుతున్న బండ్ల గణేష్.. హీరోగా ఎంట్రీ ఇచ్చేందుకు సిద్ధమైపోతున్నారు. 

ఔనండి.. నిజమే, మన బండ్లన్న హీరోగా కానున్నారు. తమిళ సూపర్ హిట్ సినిమా ‘ఒత్త సెరుప్పు అళపు 7’ చిత్రంలో హీరో పార్గిబన్ పోషించిన పాత్రలో గణేష్ కనిపించనున్నారు. క్రైమ్ థ్రిల్లర్‌గా తెరకెక్కిన ఈ చిత్రంలో కేవలం ఒకే ఒక క్యారెక్టర్ ఉంటుంది. ఈ పాత్రలో పార్తీబన్ ఎంతో చక్కని నటన కనబరిచి విమర్శకుల ప్రశంసలు అందుకున్నాడు. అంతేకాదు.. ఈ సినిమా దర్శకుడు కూడా ఆయనే. 

ఈ సినిమా మంచి హిట్ సాధించడంతో హిందీలో అభిషేక్ బచ్చన్ రిమేక్ చేస్తున్నాడు. తెలుగులో ఈ సినిమాకు వెంకట్ చంద్ర దర్శకత్వం వహిస్తున్నారు. యష్ రిషి ఫిలిమ్స్ పతాకంపై ప్రొడక్షన్ నెంబర్1గా స్వాతి చంద్ర ఈ సినిమాను నిర్మిస్తున్నారు. సెప్టెంబరు నుంచి ఈ సినిమా షూటింగ్ మొదలు కానుంది. ఈ చిత్రానికి అరుణ్ దేవినేని ఛాయాగ్రహకులు. అయితే, బండ్ల గణేష్ తనతంట తానుగా ఈ సినిమాను ఎంచుకోలేదు. దర్శక నిర్మాతలే ఆ పాత్ర కోసం బండ్ల గణేష్‌ను సంప్రదించారట. కథ భిన్నంగా ఉండటంతో బండ్ల గణేష్ కూడా ఇందుకు అంగీకరించారట. మరి బండ్ల గణేష్ ఎంతవరకు మెప్పిస్తాడో చూడాలి. పార్తిబన్ నటించిన ‘ఒత్త సెరుప్పు అళపు 7’ ట్రైలర్‌ను ఇక్కడ చూడండి. 

ట్రైలర్:

ఈ చిత్రం జాతీయ చలనచిత్ర పురస్కారాన్ని (ప్రత్యేక జ్యూరీ అవార్డు) అందుకుంది. ఉత్తమ ఆడియోగ్రఫీ అవార్డును కూడా దక్కించుకుంది. ఒకే వ్యక్తి రచన, దర్శకత్వం వహించడమే కాకుండా, సోలోగా నటించినందుకు ఈ చిత్రాన్ని లిమ్కా బుక్ ఆఫ్ రికార్డ్స్‌‌కు ఎక్కింది. సోలో యాక్ట్‌తో ఈ సినిమా ప్రపంచంలో 13వ చిత్రంగా నిలిచింది. అభిషేక్ బచ్చన్ హీరోగా ఇప్పటికే ఈ చిత్రం రీమేక్ షూటింగ్ మొదలైంది. చెన్నైలో ఈ సినిమాను చిత్రీకరిస్తున్నారు.