Cheating Woman: తక్కువ ధరకే బైక్ కావాలా నాయనా.. హా కావాలి.. అన్నారో అంతే.. మీ ఆశే ఆమెకి బిజినెస్ 

తక్కువ ధరకే.. బైక్ కావాలా అని అడగ్గానే.. కొంతమంది అనుమాన పడతారు.. కానీ చాలా మంది.. ఆశ పడతారు. అదే ఆమెకి బిజినెస్.

చిన్నప్పటి నుంచి ఆమెకు డాక్టర్ కావాలని ఆశ.. డాక్టర్ అయింది. కానీ అది వేరే దారిలో.. బైక్ లు తక్కువ ధరకే ఇప్పిస్తానంటూ.. పథకాలు పెట్టి.. వందల మందిని.. మోసం చేసింది. ఆమె ఎందుకలా చేసింది. మోసం చేయడం ఎలా మెుదలుపెట్టింది? 

తక్కువ ధరకే.. ద్విచక్ర వాహనాలు.. ఇప్పిస్తామంటూ.. కునుకుల పల్లవిరెడ్డి అనే మహిళ కొన్ని స్కీములు ప్రకటించారు. ఇంకేం తక్కువ ధరకే అని చెప్పగానే.. చాలా మందికి ఆశ పుట్టింది. ఆ ఆశే ఆమెకి బిజినెస్ అయింది. వందలాది మంది నమ్మేశారు. డబ్బులు చెల్లించారు. అలా డాక్టర్ కావాలనుకుని ఆమె చీటర్ అయింది. హైదరాబాద్ జవహర్ నగర్ పోలీసులు ఈ కేసును దర్యాప్తు చేస్తుంటే..  ఆసక్తికర విషయాలు తెలిశాయి.
  
మోసం చేయాలని ఆలోచన మీకు ఎలా వచ్చింది అని అడిగారు పోలీసులు.. ఆమె చెప్పిన సమాధానం విని పోలీసులే షాక్ అయ్యారు.  
'ఏ వ్యాపారం చేస్తే బాగుంటుందంటూ అంతర్జాలంలో వెతికా.  ఒక వెబ్‌సైట్‌ను సంప్రదిస్తే ఫ్రాంచైజీ తీసుకోవాలని చెప్పారు. మరో వ్యక్తి పేరుతో సభ్యత్వం తీసుకున్నాను. ఆ తర్వాత వాళ్లు ఎలా మోసం చేస్తున్నారో పరిశీలించేదానిని. కుషాయిగూడ, దమ్మాయిగూడ, పీర్జాదిగూడ.. మరికొన్ని ప్రాంతాల్లో షోరూంలను ప్రారంభించాను.  40 మందితో ప్రత్యేకంగా కాల్‌సెంటర్‌ తెరిచా. 

వెంటనే.. ఎవరూ ముందుకు రాలేదు. వ్యక్తిగత వివరాలను.. అమ్మేసే.. వెబ్ సైట్ల గురించి ఎంక్వైరీ చేశాను. ఒక యాప్ లో రూ.2 వేలు పెట్టి.. 10 వేల ఫోన్ నంబర్లను సంపాదించా. ఆల్ రెడీ పెట్టుకున్న 40 మంది టెలీకాలర్స్ తో కాల్ చేయించా. తక్కువ ధరలకే బైక్స్ అంటూ కొన్ని స్కీములు చెప్పించాను. మాయమాటలు చెప్పి.. షోరూంకి రప్పించా. అక్కడికి వచ్చిన వారికి స్టాంప్ కాగితంపై ఒప్పందం రాసిచ్చా. నమ్మకం కుదిరాక.. మెుదట చేరిన వారే.. మిగతా వారిని చేర్పించారు. వందలమంది సభ్యులుగా చేరారు.' అని ఆమె పోలీసులకు వివరించింది.  బాధితుల సంఖ్య వేలల్లో ఉంటుందని జవహర్‌నగర్‌ పోలీసులు అంచనా వేశారు. రూ.5 కోట్లపైనే వసూలు చేసి ఉండొచ్చని  చెబుతున్నారు. కస్టడీలోకి తీసుకుని విచారించి పూర్తి వివరాలు రాబట్టేందుకు ప్రయత్నం చేస్తున్నారు. 

బురిడీ కొట్టించి.. దోచుకున్న డబ్బులతో విలాస జీవితం గడిపినట్టు పోలీసులు గుర్తించారు. అంతేకాదు.. సెక్యూరిటీ కోసం బౌన్సర్లు కూడా ఉండేవారు. అయితే ఆమెకు డాక్టర్ కావాలనే కల మాత్రం అలానే ఉండిపోయింది. సేవా కార్యక్రమాలను నిర్వహించి.. సోషల్ మీడియాలో ప్రచారం చేయించారు. దీనికోసం ఓ పీఆర్ సంస్థతో కూడా ఒప్పందం కుదుర్చుకున్నారు. ఇక డాక్టర్ ఎలాగైనా.. కాలేకపోయానని.. పేరు పక్కనైనా డాక్టర్ ఉండాలని.. డబ్బులు చెల్లించి.. మధ్యవర్తి సాయంతో డాక్టరేట్ ను కొన్నట్టు పోలీసుల దర్యాప్తులో తెలిసింది.