Small Saving Schemes New Interest Rates: సుకన్య సమృద్ధి యోజనలో (SSY) డబ్బులు జమ చేసే ప్రజలకు, నూతన సంవత్సరం (Happy new year 2024) సందర్భంగా కేంద్ర ప్రభుత్వం మంచి గిఫ్ట్‌ ఇచ్చింది. 2023-24 ఆర్థిక సంవత్సరం నాలుగో త్రైమాసికానికి ‍‌(2024 జనవరి - మార్చి కాలం), ఈ పథకం వడ్డీ రేట్లను 8 శాతం నుంచి 8.2 శాతానికి ‍‌(SSY new interest rate) పెంచింది.


3 సంవత్సరాల టర్మ్‌ డిపాజిట్లపైనా వడ్డీ రేటును 7 శాతం నుంచి 7.1 శాతానికి (New interest rate on 3 years term deposit) కేంద్ర ప్రభుత్వం పెంచింది. మిగిలిన చిన్న మొత్తాల పొదుపు పథకాల వడ్డీ రేట్లలో మాత్రం ఎలాంటి మార్పు లేదు, యథాతథంగా కొనసాగించింది. ముఖ్యంగా, పబ్లిక్ ప్రావిడెంట్ ఫండ్ (PPF) పెట్టుబడిదార్లను మరోసారి నిరాశ పరిచింది. 


రెండోసారి పెరిగిన సుకన్య సమృద్ధి యోజన వడ్డీ రేటు (Sukanya Samriddhi Yojana Interest Rate for Jan-Mar 2024)
ఆర్థిక మంత్రిత్వ శాఖకు చెందిన ఆర్థిక వ్యవహారాల విభాగం, 2023-24 నాలుగో త్రైమాసికానికి (Q4 FY24), చిన్న మొత్తాల పొదుపు పథకాల వడ్డీ రేట్లను ‍‌(small savings schemes) సమీక్షించి ప్రకటించింది. స్మాల్‌ సేవింగ్స్‌ స్కీమ్‌లో సుకన్య సమృద్ధి యోజన వడ్డీ రేటును మార్చింది. బాలికల కోసం కేంద్ర ప్రభుత్వం ప్రత్యేకంగా అమలు చేస్తున్న పథకం ఇది. ప్రస్తుత ఆర్థిక సంవత్సరం మొదటి త్రైమాసికంలో (2023 ఏప్రిల్‌-జూన్‌ కాలం) కూడా, సుకన్య సమృద్ధి యోజన వడ్డీ రేటును 7.6 శాతం నుంచి 8 శాతానికి మోదీ ప్రభుత్వం పెంచింది. ఈ లెక్కన, ఈ ఆర్థిక సంవత్సరంలో SSY వడ్డీ రేటును 0.60 శాతం పెంచింది.


వడ్డీ రేట్లలో ఎలాంటి మార్పు లేని పథకాలు
ఆర్థిక మంత్రిత్వ శాఖ సర్క్యులర్ ప్రకారం, 2024 జనవరి 1 నుంచి 2024 మార్చి 31 వరకు పొదుపు డిపాజిట్లపై ‍‌4 శాతం వడ్డీ రేటు వర్తిస్తుంది. 1 సంవత్సరం టైమ్ డిపాజిట్‌పై 6.9 శాతం వడ్డీ, 2 సంవత్సరాల టైమ్ డిపాజిట్‌పై 7 శాతం వడ్డీ, 5 సంవత్సరాల టైమ్ డిపాజిట్‌పై 7.5 శాతం వడ్డీ లభిస్తుంది. 5 సంవత్సరాల రికరింగ్ డిపాజిట్లపై 6.7 శాతం వడ్డీ ఉంటుంది. 


నేషనల్ సేవింగ్స్ సర్టిఫికెట్‌పై ‍‌వడ్డీ రేటు (NSC Interest rate) 7.7 శాతంగా కొనసాగుతోంది. కిసాన్ వికాస్ పత్రలో పెట్టుబడి పెట్టే వారికి 7.5 శాతం వడ్డీ (KVP Interest rate) ఇస్తారు, ఇది 115 నెలల్లో మెచ్యూర్ అవుతుంది. సీనియర్ సిటిజన్ సేవింగ్ స్కీమ్‌పై 8.2 శాతం వడ్డీ (SCSS Interest rate) లభిస్తుంది. పోస్ట్ ఆఫీస్ మంత్లీ ఇన్‌కమ్‌ పథకంలో పెట్టుబడిపై 7.4 శాతం వడ్డీ (POMIS Interest rate) ఆదాయం వస్తుంది. 


PPF ఇన్వెస్టర్లలో నిరాశ
స్మాల్‌ సేవింగ్స్‌ స్కీమ్స్‌లో PPF (Public Provident Fund) బాగా పాపులర్‌ అయింది. దీని మెచ్యూరిటీ అమౌంట్‌కు ఆదాయ పన్ను వర్తించదు. ఈ స్కీమ్‌ వడ్డీ రేటు ఈసారి కూడా మారలేదు, దీనిపై గతంలోలాగే 7.1 శాతం వడ్డీ  (PPF Interest rate) లభిస్తుంది. PPFపై వడ్డీ రేటును 2020 ఏప్రిల్ నుంచి కేంద్ర ప్రభుత్వం మార్చలేదు. 


మరో ఆసక్తికర కథనం: తెలుగు రాష్ట్రాల్లో మారిన పెట్రోల్‌, డీజిల్‌ ధరలు - ఈ రోజు రేట్లు ఇవి