All About Tokenisation : జూలై ఒకటో తేదీ నుంచి టోకనైజేషన్ అమల్లోకి వస్తోంది. ఈ టోకనైజేషన్ అనే మాట తరచుగా వినబడుతోంది. ఇదేమిటో చాలా మందికి తెలియదు. ఈ టోకనైజేషన్‌కు సంబంధించినపూర్తి వివరాలు ఇవి.
క్రెడిట్, డెబిట్ కార్డులు వాడే వారికి కీలకం !
డెబిట్, క్రెడిట్ కార్డులు లేకుండానే ఆన్లైన్ షాపింగ్ చేసేందుకు రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) కొత్త చెల్లింపుల విధానాన్ని ప్రవేశపెట్టింది. అదే ‘టోకనైజేషన్’. ఆన్లైన్ షాపింగ్.. ఫుడ్ ఆర్డర్లు చేసుకోవాలంటే కార్డు ద్వారా డబ్బులు చెల్లిస్తాం. కార్డు ద్వారా డిజిటల్‌ చెల్లింపులు జరిపే ప్రతీసారి 16-అంకెల కార్డు వివరాలు, కార్డు గడువు తేదీని ఎంటర్ చేయాలి. అలా చేయకుండా ఉండటానికి.. ఒక సారి ఎంటర్ చేస్తే అదే రికార్డుల్లో ఉండేలా చేసేదే టోకనైజేషన్.
ఇప్పుడు కూడా ఉంది.. కానీ ఈ టోకెన్ సురక్షితం !
నిజానికి ఇప్పుడు కూడా కార్డును సేవ్ చేసే ఆప్షన్ ఉంది. కానీ డెబిట్ లేదా క్రెడిట్ కార్డు వివరాలను ఒకేసారి సమీకరించి, హ్యాకర్లకు చిక్కకుండా భద్రపరిచే కీవర్డ్‌నే ‘టోకెన్’ అంటారు. కస్టమర్‌ వ్యక్తిగత సమాచారం, కార్డు వివరాలను రెండోసారి అడగకుండా అత్యంత సెక్యూరిటీతో లావాదేవీలను నిర్వహించే ప్రక్రియనే ‘టోకనైజేషన్’గా పిలుస్తున్నారు. ఈ కాంటాక్ట్‌లెస్‌ బ్యాంకింగ్‌ కోసం ప్రతీసారి సీవీవీ నంబర్‌ అవసరం లేదు.
సురక్షితమైన చెల్లింపుల కోసమే !
‘టోకనైజేషన్’ ద్వారా ఆన్లైన్ మోసాలకు చెక్‌ పెట్టొచ్చు. కొనుగోళ్లు జరిపే ప్రతీసారి కార్డు 16 అంకెలను నమోదు చేయడం, సీవీవీని ఎంటర్ చేయడం వల్ల సైబర్‌ నేరగాళ్లు, సైట్‌లోని థర్డ్‌ పార్టీ.. కస్టమర్ల వ్యక్తిగత, ఆర్థిక వివరాలను తస్కరించే ప్రమాదం ఉంది. దీనికి ‘టోకనైజేషన్’తో దీనికి చెక్‌ పెట్టొచ్చు. హ్యాకర్లు టోకెన్ నుంచి కొనుగోలుదారు సమాచారాన్ని సేకరించడం సాధ్యం కాదు. ఆ మేరకు సెక్యూరిటీ ఏర్పాట్లు ఉంటాయి.
టోకనైజేషన్ ఎలా చేసుకోవాలంటే ?
కొనుగోళ్లు జరిపే సైట్‌లో పేమెంట్‌ జరిపేటప్పుడు (చెక్‌-అవుట్‌ పేజీలో) కస్టమర్‌ తొలుత కార్డు వివరాలు నమోదు చేయాలి. సూచించిన టోకనైజేషన్‌ను ఎంపిక చేసుకోవాలి. టోకెన్‌ను ఎంపిక చేసుకొన్న తర్వాత కార్డు వివరాలన్నీ అందులో నిక్షిప్తమవుతాయి. సీవీవీ లేదా ఓటీపీతో మీ లావాదేవీలను అప్రూవ్‌ చేసుకోవచ్చు. మళ్లీ కొనుగోళ్లు జరుపాలనుకొంటే.. కార్డు వివరాలను నమోదు చేయడానికి బదులు ప్రాక్సీ మాదిరిగా ఉన్న ఎన్‌క్రిప్టెడ్‌ టోకెన్‌ను ఎంచుకోవాలి. ఓటీపీ ద్వారా లావాదేవీని పూర్తి చేయొచ్చు. ఒక్క కార్డుకు ఒక్క టోకెన్‌ను జారీ చేస్తారు. టోకనైజేషన్ ప్రక్రియ పూర్తిగా ఉచితంగా లభిస్తుంది. వినియోగదారులు తమకు నచ్చినన్ని కార్డులను టోకనైజ్‌ చేసుకోవచ్చు. దేశీయ కార్డులను మాత్రమే టోకనైజేషన్‌కు తొలుత అనుమతించనున్నారు. జూలై ఒకటి నుంచి ఈ టోకనైజేషన్ అమల్లోకి వస్తుంది.