Ministry Of Road Transport And Highways Probe: ఎలక్ట్రిక్ టూ వీలర్ కంపెనీ ఓలా ఎలక్ట్రిక్ మొబిలిటీ కష్టాలు పెరుగుతూనే ఉన్నాయి. CCPA (Central Consumer Protection Authority) నుంచి నోటీస్‌ అందిన ఒక్క రోజు వ్యవధిలోనే, కేంద్ర రోడ్డు రవాణా & జాతీయ రహదారుల మంత్రిత్వ శాఖ కూడా ఆ కంపెనీపై ఓ కన్నేసినట్లు తెలుస్తోంది. ఓలా ఎలక్ట్రిక్‌కు వ్యతిరేకంగా దాఖలైన వేలకొద్దీ ఫిర్యాదులపై మంత్రిత్వ శాఖ విచారణ చేపట్టవచ్చని సమాచారం. ఈ వారంలో మంత్రిత్వ శాఖ నుంచి ప్రాథమిక విచారణ ప్రారంభం కావచ్చు.  కస్టమర్ల కంప్లైంట్లపై స్పందించి, ఒక నివేదిక సమర్పించాలని ఎలక్ట్రిక్‌ స్కూటర్ల కంపెనీని ఆదేశించే సూచనలు ఉన్నాయి.


సోషల్‌ మీడియాలో యుద్ధం
ఆఫ్టర్‌ సేల్‌ సర్వీస్‌లకు సంబంధించి ఓలా ఎలక్ట్రిక్‌పై దేశవ్యాప్తంగా విమర్శల తుపాన్‌ చెలరేగింది. సర్వీస్‌లో అలసత్వంపై ప్రశ్నించిన స్టాండప్‌ కమెడియన్‌ కునాల్ కమ్రా (Kunal Kamra) మీద ఓలా ఎలక్ట్రిక్‌ సీఈఓ భవీష్ అగర్వాల్ (Ola Electric CEO Bhavish Aggarwal) దారుణమైన విమర్శలు చేశారు. ఇది, ఓలా కస్టమర్లకు ఆగ్రహం తెప్పించింది. సేవా లోపాలను సరి చేసుకుండా, ప్రశ్నించిన వాళ్లపై ఎదురుదాడి చేయడమేంటంటూ ఆగ్రహంతో ఊగిపోయారు. సోషల్‌ మీడియాలో విపరీతంగా స్పందించారు. ఓలా ఎలక్ట్రిక్‌ సర్వీసుల్లో నిర్లక్ష్యం, జాప్యం, తప్పుడు ప్రకటనలు, తప్పుడు వ్యాపార విధానాలు వంటి ఆరోపణలతో ఆ కంపెనీపై 'నేషనల్ కన్స్యూమర్ హెల్ప్‌లైన్‌'కు 10,000 మందికి పైగా కస్టమర్లు ఫిర్యాదులు చేశారు. ఈ ఫిర్యాదుల నేపథ్యంలో, రెండు రోజుల క్రితం, 'సెంట్రల్ కన్స్యూమర్ ప్రొటెక్షన్ అథారిటీ' (CCPA) ఓలా ఎలక్ట్రిక్‌ మొబిలిటీకి షోకాజ్‌ నోటీస్‌ పంపింది. 


CCPA నోటీస్‌ ప్రకారం, ఓలా ఎలక్ట్రిక్‌ మొబిలిటీ కంపెనీ వినియోగదార్ల రక్షణ చట్టంలోని చాలా నిబంధనలను ఉల్లంఘించింది. పేలవమైన సేవలు, తప్పుడు వ్యాపార ప్రకటనలు, అన్యాయుపూరిత వాణిజ్య పద్ధతులు, వినియోగదార్ల హక్కుల ఉల్లంఘనలు వంటివి ఆ నోటీస్‌లో ఉన్నాయి. CCPA నోటీసుకు ఎలక్ట్రిక్‌ స్కూటర్ల కంపెనీ 15 రోజుల్లోగా సమాధానం ఇవ్వాలి. CCPA నుంచి నోటీస్‌ అందుకున్న విషయాన్ని ఓలా ఎలక్ట్రిక్‌ ధృవీకరించింది. కంపెనీ ఆర్థిక విషయాలపై గానీ, తమ రోజువారీ కార్యక్రమాలపై గానీ ఆ నోటీస్‌ ప్రభావం ఉండదని చెబుతూ ఒక ప్రకటన విడుదల చేసింది.


ట్రాన్స్‌పోర్ట్‌ మినిస్ట్రీ పిడుగు
బిజినెస్ టుడే రిపోర్ట్‌‌ ప్రకారం, తాజాగా, కేంద్ర రహదారి రవాణా & జాతీయ రహదారుల మంత్రిత్వ శాఖ కూడా రంగంలోకి దిగుతోంది. సేవా లోపాలకు సంబంధించి ఓలా ఎలక్ట్రిక్‌ మొబిలిటీ నుంచి వివరణ కోరే అవకాశముంది. నివేదిక కోరడంతోనే సరిపెట్టకుండా, మంత్రిత్వ శాఖ కూడా స్వయంగా ప్రాథమిక విచారణ చేయవచ్చని సమాచారం. మరో 3-4  రోజుల్లోనే ఇది జరగొచ్చని తెలుస్తోంది.


ఒకవైపు వినియోగదార్ల నుంచి ఫిర్యాదులు వెల్లువెత్తుతుండగా, మరోవైపు ఎలక్ట్రిక్ వాహనాల విక్రయాల్లో కంపెనీ వాటా నెలనెలా తగ్గుతూ వస్తోంది. బజాజ్ ఆటో (Bajaj Auto), టీవీఎస్ మోటార్స్‌ (TVS Motors) సేల్స్‌లో దూసుకెళ్తున్నాయి. అవి, ఓలా ఎలక్ట్రిక్ మార్కెట్ వాటాను వేగంగా చేజిక్కించుకుంటున్నాయి. 


ఇన్ని ఒడుదొడుకుల మధ్య, మంగళవారం ట్రేడింగ్ సెషన్‌లో, ఓలా ఎలక్ట్రిక్‌ కంపెనీ షేర్‌ ప్రైస్‌ (Ola Electric Share Price) 5.05 శాతం పెరిగింది. నిన్న (మంగళవారం) ఉదయం స్టాక్ మార్కెట్ ప్రారంభమైన తర్వాత షేర్‌ ధర రూ.86 వరకు పడిపోయింది, అయితే దిగువ స్థాయి నుంచి రికవరీ కనిపించింది, మంచి లాభంలో ముగిసింది.  


మరో ఆసక్తికర కథనం: భార్య పేరు చెప్పుకుని పన్ను భారం తగ్గించుకోవచ్చు - లక్షల్లో డబ్బు ఆదా!