2000 Rupees Notes: రిజర్వ్ బ్యాంక్ (RBI) 2000 రూపాయల నోట్లను ఉపసంహరించుకున్న తర్వాత, దేశంలో జనం చేసే ఖర్చులు అకస్మాత్తుగా పెరిగాయి. కొవిడ్‌ గుణపాఠంతో పొదుపు నేర్చుకున్న ప్రజలు, పింక్‌ నోట్ల విత్‌ డ్రా తర్వాత విచ్చలవిడిగా ఖర్చు చేస్తున్నారు. క్యాష్ పేమెంట్స్ ట్రెండింగ్‌లోకి వచ్చాయి. 2 వేల నోట్లను దాచినవాళ్లు వాటిని బయటకు తీసి పాత కోర్కెలన్నీ తీర్చుకుంటున్నారు. బలవంతంగా నిద్రపుచ్చిన కోర్కెలను తట్టి లేపుతున్నారు. ఏం కొనాలనిపిస్తే అది కొంటున్నారు. పబ్బులు, సినిమాలు, రెస్టారెంట్లు, షాపింగ్‌ మాల్స్‌, ఈ-కామర్స్ సైట్స్‌లో రష్‌ పెరిగింది.
ఆన్‌లైన్ ఫుడ్ డెలివరీ అగ్రిగేటర్ జొమాటోలో క్యాష్ ఆన్ డెలివరీ ఆప్షన్‌ను ఎంచుకున్న వారిలో దాదాపు 75 శాతం మంది రూ. 2,000 నోట్లతో డబ్బులు చెల్లిస్తున్నట్లు వెల్లడైంది. 2 వేల నోట్లతో జనం చేస్తున్న జల్సాలను స్టేట్ బ్యాంక్ ఆఫ్ ఇండియా ఆర్థిక పరిశోధన విభాగం నివేదిక వెలుగులోకి తీసుకొచ్చింది.
పెట్రోల్ పంపుల్లో పడిపోయిన డిజిటల్ పేమెంట్స్
పెట్రోల్ పంపుల వద్ద నగదు లావాదేవీలు వేగంగా పెరిగాయి. అవసరం ఉన్నా లేకున్నా ట్యాంక్‌ ఫుల్‌ చేయిస్తున్న వినియోగదార్లు బిల్లు చెల్లించడానికి రూ. 2000 నోట్లను ఉపయోగిస్తున్నారు. గతంలో, పెట్రోల్ బంకుల్లో రోజువారీ విక్రయాల్లో 40 శాతంగా ఉండే డిజిటల్ పేమెంట్స్ ఇప్పుడు 10 శాతానికి తగ్గాయని, నగదు విక్రయాలు విపరీతంగా పెరిగాయని ఆల్ ఇండియా పెట్రోలియం డీలర్స్ అసోసియేషన్ (ఏఐపీడీఏ) వెల్లడించింది.
ఏది కొన్నా 'క్యాష్ ఆన్ డెలివరీ' ఆప్షన్‌
SBI రిపోర్ట్‌ ప్రకారం.. ఈ-కామర్స్, ఫుడ్, ఆన్‌లైన్ కిరాణాల్లో ఆర్డర్లు పెట్టి, క్యాష్ ఆన్ డెలివరీని ఎంచుకునే కస్టమర్ల సంఖ్య ఇంకా పెరిగే అవకాశం ఉంది. 2 వేల నోట్లను ఖర్చు చేసి పుణ్యక్షేత్రాలు తిరుగుతున్న పరమ భక్తులు.. దేవాలయాలు & ఇతర మత సంస్థలకు రూ. 2000 నోట్ల ద్వారా విరాళాలు ఇస్తున్నారు. ఈ ధోరణి ఇంకా పెరగవచ్చన్నది స్టేట్ బ్యాంక్ అంచనా.
అప్పుడు అలా - ఇప్పుడు ఇలా
2000 రూపాయల నోట్లను బ్యాంక్ అకౌంట్లలో డిపాజిట్ చేయమని లేదా మార్చుకోవాలని ఆర్‌బీఐ సూచించింది. అయినా.. బంగారం, వజ్రాభరణాలు, ACలు, ఖరీదైన మొబైల్ ఫోన్‌లు, లగ్జరీ ఫర్నీచర్‌ వంటి కన్స్యూమర్ డ్యూరబుల్స్ కోసం పింక్‌ నోట్లను పదేపదే ఉపయోగిస్తున్నారు. రేటెక్కువ అంటూ గతంలో నసిగిన వాళ్లు కూడా ఇప్పుడు సెకండ్‌ థాట్‌ లేకుండా సీరియస్‌గా కొంటున్నారు. ఇళ్లు, స్థలాల వంటి రియల్ ఎస్టేట్ పెట్టుబడుల్లో 2000 రూపాయల నోట్ల కట్టలు చేతులు మారుతున్నాయి. ఈ తరహా ఖర్చులు ఇంకా పెరుగుతాయని ఎస్‌బీఐ రిపోర్ట్‌ అంచనా వేసింది.
స్టేట్ బ్యాంక్ రిపోర్ట్‌ ప్రకారం... దాదాపు రూ. 3.08 లక్షల కోట్లు డిపాజిట్ల రూపంలో బ్యాంకింగ్‌ వ్యవస్థలోకి వస్తాయి. అందులో రూ. 92 వేల కోట్లు సేవింగ్స్‌ అకౌంట్లలో జమ అవుతాయి. ఈ డబ్బులో సింహభాగాన్ని 2 వేల రూపాయల నోట్ల మార్పిడి కోసం జమ చేశారు తప్ప, అకౌంట్లలో ఉంచడానికి డిపాజిట్ చేయలేదు. కాబట్టి, అందులో 60 శాతం మొత్తాన్ని, అంటే దాదాపు రూ. 55,000 కోట్లను ప్రజలు వెనక్కు తీసుకునే అవకాశం ఉంది. ఈ మేరకు వినియోగం పెరగొచ్చని ఎస్‌బీఐ వెల్లడించింది. దీర్ఘకాలంలో ఇది రూ. 1.83 లక్షల కోట్లకు చేరొచ్చని లెక్కగట్టింది. దీనివల్ల వినియోగం పెరిగి ఆర్థిక వ్యవస్థ వేగంగా వృద్ధి చెందుతుందని, ఇదంతా మన మంచికేనని చెబుతోంది.
మరో ఆసక్తికర కథనం: ₹1000 లోపు ధరలో దొరుకుతున్న 7 బ్లూచిప్‌ స్టాక్స్‌
Join Us on Telegram: https://t.me/abpdesamofficial