Best CNG SUVs Under 10 Lakh Rupees: భారతీయ ఆటోమొబైల్ మార్కెట్లో ఇటీవల పెట్రోల్, డీజిల్ ధరలు పెరగడం వల్ల కస్టమర్ల కొనుగోలు ట్రెండ్స్ మారుతున్నాయి. రోజువారీ ప్రయాణాలు చేసే వారికి ఇంధన ఖర్చులు నెలకు పెద్ద భారంగా మారుతుండటంతో తక్కువ రన్నింగ్ కాస్ట్ ఇచ్చే కార్ల వైపు మొగ్గు చూపుతున్నారు. ప్రస్తుతం దేశంలో ఎస్యూవీ కార్లకు భారీ క్రేజ్ ఉన్నప్పటికీ, పెరుగుతున్న ఇంధన ధరల వల్ల కస్టమర్లు ఎకనామికల్ ఆప్షన్ల కోసం చూస్తున్నారు. ఈ క్రమంలోనే అఫర్డబుల్ సీఎన్జీ ఎస్యూవీలు (CNG SUVs) ముఖ్యంగా కాంపాక్ట్ సెగ్మెంట్ లో మళ్లీ హాట్ టాపిక్గా మారాయి. రూ. 10 లక్షల లోపు బడ్జెట్ ఉన్న వారికి ఇవి ఒక ప్రాక్టికల్ ఛాయిస్గా నిలుస్తున్నాయి. ఫ్యాక్టరీ ఫిట్టెడ్ సీఎన్జీ కిట్ తో వచ్చే కొన్ని బెస్ట్ ఆప్షన్ల వివరాలు ఇక్కడ ఉన్నాయి.
టాటా పంచ్ ,హ్యుందాయ్ ఎక్స్టర్ సీఎన్జీ
ఈ లిస్టులో మొదటిది టాటా పంచ్ సీఎన్జీ (Tata Punch CNG). ఇది స్మార్ట్, ప్యూర్, అడ్వెంచర్, అకాంప్లిష్డ్ వేరియంట్లలో రూ. 6.75 లక్షల నుండి రూ. 10.6 లక్షల (ఎక్స్-షోరూమ్) ధర పరిధిలో లభిస్తోంది. ఇందులో 1.2-లీటర్, 3-సిలిండర్ ఇంజన్ ఉంది. ఇది 74 హెచ్పీ పవర్ ప్రొడ్యూస్ చేస్తుంది. 5-స్పీడ్ మాన్యువల్ లేదా ఏఎమ్టీ గేర్బాక్స్ ఆప్షన్లతో వచ్చే ఈ కార్ కేజీకి 26.99 కిలోమీటర్ల మైలేజ్ ఇస్తుందని కంపెనీ చెబుతోంది. ఇందులో 60 లీటర్ల కెపాసిటీ ఉన్న ట్విన్ సిలిండర్ టెక్నాలజీని ఉపయోగించారు. దీనికి పోటీగా హ్యుందాయ్ ఎక్స్టర్ సీఎన్జీ (Hyundai Exter CNG) అందుబాటులో ఉంది. దీని ధర రూ. 7 లక్షల నుండి రూ. 9.41 లక్షల వరకు ఉంది. ఇందులో 1.2-లీటర్, 4-సిలిండర్ ఇంజన్ ఉంది, ఇది 69 హెచ్పీ పవర్ ఇస్తుంది. కేవలం 5-స్పీడ్ మాన్యువల్ గేర్బాక్స్ తో వచ్చే ఈ కారు కేజీకి 27.1 కిలోమీటర్ల మైలేజ్ ఇస్తుంది.
Read Also: Petrol Price Today:పెట్రోల్, డీజిల్ ధరలు మళ్లీ పెరిగాయా? మీ సిటీలో ఏ రేటు ఉందో చూడండి!
మారుతి ఫ్రాంక్స్, టొయోటా టైజర్..
మారుతి సుజుకి ఫ్రాంక్స్ సీఎన్జీ, టొయోటా అర్బన్ క్రూయిజర్ టైజర్ సీఎన్జీ అనేవి ఒకే ప్లాట్ఫామ్ పై తయారైన కవల కార్లు. టొయోటా-మారుతి సుజుకి భాగస్వామ్యంలో భాగంగా ఒకే ఫీచర్లు, ఇంజన్ ఆప్షన్లతో ఇవి బ్యాడ్జ్-ఇంజనీరింగ్ ప్రొడక్ట్స్గా అమ్ముడవుతున్నాయి. ఫ్రాంక్స్ సీఎన్జీ ధర రూ. 7.79 లక్షల నుండి ప్రారంభం అవుతుండగా, ఇది సిగ్మా, డెల్టా ట్రిమ్స్ లో లభిస్తుంది. టొయోటా టైజర్ మాత్రం కేవలం ఒకే ఒక 'ఇ' వేరియంట్ లో రూ. 8.24 లక్షల ధరకు అందుబాటులో ఉంది. ఈ రెండు కార్లలోనూ 1.2-లీటర్, 4-సిలిండర్ ఇంజన్ ఉపయోగించారు. ఇది 77.5 హెచ్పీ పవర్, 98.5 ఎన్ఎమ్ టార్క్ను అందిస్తుంది. ఇవి 5-స్పీడ్ మాన్యువల్ గేర్బాక్స్ తో వస్తూ కేజీకి గరిష్టంగా 28.51 కిలోమీటర్ల అద్భుతమైన మైలేజ్ ఇస్తాయి.
టాటా నెక్సాన్ ,మారుతి బ్రెజ్జా సీఎన్జీ..
ఈ సెగ్మెంట్ లోనే ఏకైక టర్బో-పెట్రోల్ సీఎన్జీ ఆప్షన్ గా టాటా నెక్సాన్ సీఎన్జీ (Tata Nexon CNG) ప్రత్యేకంగా నిలుస్తోంది. దీని ప్రారంభ ధర రూ. 8.3 లక్షల నుండి ప్రారంభమై టాప్ వేరియంట్లలో రూ. 13.22 లక్షల వరకు ఉంటుంది. స్మార్ట్, ప్యూర్, క్రియేటివ్, ఫియర్లెస్ లాంటి పలు ట్రిమ్స్ లో లభించే ఈ కారులో 1.2-లీటర్ టర్బో ఇంజన్ ఉంది. ఇది 100 హెచ్పీ పవర్ ఇస్తూ కేజీకి 24 కిలోమీటర్ల మైలేజ్ అందిస్తుంది. చివరగా మారుతి సుజుకి బ్రెజ్జా సీఎన్జీ (Brezza CNG) కూడా ఒక మంచి ఛాయిస్. ఇది ఎల్ఎక్స్ఐ, వీఎక్స్ఐ, జెడ్ఎక్స్ఐ వేరియంట్లలో రూ. 9.17 లక్షల నుండి రూ. 11.46 లక్షల ధరలో లభిస్తోంది. దీనిలోని 1.5-లీటర్, 4-సిలిండర్ ఇంజన్ 88 హెచ్పీ పవర్ ఇస్తుంది. 5-స్పీడ్ మాన్యువల్ గేర్బాక్స్ ఉన్న ఈ కారు కేజీకి 25.51 కిలోమీటర్ల మైలేజ్ ఇస్తుంది, దీని సిలిండర్ ట్యాంక్ కెపాసిటీ 55 లీటర్లు.