Best Budget SUVs India: నేటి కాలంలో సొంత కారు అనేది ఒక విలాసం మాత్రమే కాదు, కుటుంబ అవసరంగా మారింది. ముఖ్యంగా భారతీయ రోడ్లపై ప్రయాణించడానికి పటిష్టమైన నిర్మాణం, అధిక గ్రౌండ్ క్లియరెన్స్, అత్యాధునిక ఫీచర్లు కలిగిన ఎస్యూవీల పట్ల మధ్యతరగతి ప్రజల మక్కువ చూపుతున్నారు. తక్కువ ధరలో ఎక్కువ ఫీచర్లు, ముఖ్యంగా మైలేజీని ఆశించే సామాన్యుల కోసం భారత్ మార్కెట్లో ప్రస్తుతం అందుబాటులో ఉన్న నాలుగు అత్యుత్తమ బడ్జెట్ ఎస్యూవీల గురించి చూద్దాం.
భద్రతకు మారుపేరుగా టాటా పంచ్
టాటా మోటార్స్ నుంచి వచ్చిన పంచ్, మైక్రో ఎస్యూవీ సెగ్మెంట్లో విప్లవాత్మక మార్పులు తెచ్చింది. భారతీయ కుటుంబాలు ఈ కారును ఎంచుకోవడానికి ప్రధాన కారణం దీని పటిష్టమైన నిర్మాణ నాణ్యత. టాటా పంచ్ గ్లోబల్ ఎన్క్యాప్ క్రాష్ టెస్టులో ఫైవ్ స్టార్ సేఫ్టీ రేటింగ్ పొందింది. ఇది చిన్న పిల్లు, వృద్ధులతో ప్రయాణించే కుటుంబాలకు గరిష్ట భద్రతను ఇస్తుంది. ఇందుోల ఆరు ఎయిర్బ్యాగ్లు వస్తాయి.
ఇందులో ఏడు అంగుళాల టచ్స్క్రీన్ ఇన్ఫోటైన్మెంట్ సిస్టమ, ఆటోమేటిక్ క్లెమేట్ కంట్రోల్, ఆకర్షణీమైన సన్రూఫ్ ఉన్నాయి. ట్విన్ సిలిండర్ టెక్నాలజీ వల్ల బూట్ స్పేస్ కూడా విశాలంగా ఉంటుంది. 1.2లీటర్ పెట్రోల్ ఇంజిన్తో నడిచే ఈ కారు లీటరుకు సుమారు 20.09 కిలోమీటర్లు మైలేజీని ఇస్తుంది. దీని ప్రారంభ ఎక్స్- షోరూమ్ ధర రూ. 5,64,990గా ఉంది. మైలేజీయే ప్రాణంగా భావించే వారి కోసం సీఎన్జీ వేరియంట్ అందుబాటులో ఉంది. ఇది కేజీకి 26.99 కిలోమీటర్ల మైలేజీని అందిస్తుంది.
టెక్నాలజీలో హ్యుందాయ్ ఎక్స్టర్ టాప్
మధ్యతరగతి కొనుగోలుదారుల అభిరుచులకు అనుగుణంగా హ్యుందాయ్ రూపొందించిన మోడల్ ఎక్స్టర్. ఇది ఆధునిక డిజైన్, అద్భుతమైన ఫీచర్ల కలయిక. ఈ సెగ్మెంట్లో మొదటిసారిగా డాష్క్యామ్, సింగిల్ పేన్ సన్రూఫ్ను హ్యుందాయ్ ప్రవేశపెట్టింది. లాంగ్ జర్నీలలో అలసట కలగకుండా దీని క్యాబిన్ లోపల గాలి వెలుతురు ధారళంగా ఉండేలా డిజైన్ చేశారు.
అన్ని వేరియంట్లలో 6 ఎయిర్బ్యాగ్లను ప్రామాణికంగా అందిస్త భద్రతకు పెద్దపీట వేసింది. 1.2- లీటర్ 4-సిలిండర్ ఇంజిన్ చాలా స్మూత్గా ఉంటుంది. పెట్రోల్ వెర్షన్ 19.4km/l మైలేజీని ఇస్తుండగా, కంపెనీ ఫిట్జెడ్ సీఎన్జీ వెర్షన్ 27.1 km/kg మైలేజిని అందిస్తుంది. దీని ప్రారంభ ధర 5, 79, 900
భారీ ఎస్యూవీగా పేరున్న నిస్సాన్ మాగ్నైట్
తక్కువ ధరలో ఒక పెద్ద ఎస్యూవీ నడుపుతున్నామనే అనుభూతిని నిస్సాన్ మగ్నైట్ కలిగిస్తుంది. దీని బోల్డ్ ఫ్రంట్ గ్రిల్, స్పోర్టీ డిజైన్ రోడ్డుపై ప్రత్యేక గుర్తింపును ఇస్తాయి. 360- డిగ్రీ కెమెరా, వైర్లెస్ ఆండ్రాయిడ్ ఆటో/ ఆపిల్ కార్ప్లే, క్రూయిజ్ కంట్రోల్ వంటి ప్రీమియం ఫీచర్లు ఇందులో ఉన్నాయి. ఐదుగురు సభ్యులు గల కుటుంబం ప్రయాణించడానికి తగినంత లెగ్రూమ్ వెడల్పాటి సీట్లు దీని ప్రత్యేకత. ఇందులో 1.0- లీటర్ పెట్రోల్ ఇంజిన్ 19.35km/l మైలేజీని ఇస్తుండగా, టర్బో పెట్రోల్ వెర్షన్ 20km/l మైలేజీని అందిస్తుంది. దీని ప్రారంభం ధర రూ. 5, 79,000గా ఉంది. అయితే ఇందులో సీఎన్జీ ఆప్షన్ అందుబాటులో లేదని విషయాన్ని గమనించాలి.
మంచి డ్రైవింగ్ అనుభవంతో స్కోడా కైలాక్
సబ్-4 మీటర్ ఎస్యూవీ సెగ్మెంట్లో స్కోడా కైలాక్ ఒక సరికొత్త ప్రమాణాన్ని నెలకొల్పింది. యూరోపియన్ టెక్నాలజీ, డ్రైవింగ్ కంఫర్ట్ కోరుకునే వారికి ఇది సరైన ఎంపిక. భారత్ ఎన్క్యాప్లో 5- స్టార్ రేటింగ్ పొందిన ఈ కారు, గుంత రోడ్లపై కూడా కుదుపులు లేకుండా ప్రయాణించడానికి వీలుగా అత్యుత్తమ సస్పెన్షన్ వ్యవస్థను కలిగింది. 10.1 అంగుళాల ఇన్ఫోటైన్మెంట్ సిస్టమ్, వెంటిలేటెడ్ ఫ్రంట్ సీట్లు, ఎలక్ట్రిక్ సన్రూఫ్ దీని సొంతం. ఇది 1.0 లీటర్ టీఎస్ఐ టర్బో-పెట్రోల్ ఇంజిన్తో వస్తుంది. మాన్యువల్ వెర్షన్ 19.68km/l, ఆటోమేటిక్ వెర్షన్ 19.05 km/l మైలేజీని ఇస్తాయి. దీని ధర 7, 59,000 నుంచి ప్రారంభమవుతుంది.
ఏ కారు ఎవరికి సెట్ అవుతుంది?
మీకు గరిష్ట భద్రత, పటిష్టమైన నిర్మాణం కావాలంటే టాటా పంచ్ లేదా స్కోడా కైలాక్ వైపు మొగ్గు చూపవచ్చు. టెక్నాలజీ, ఎక్కువ ఫీచర్లు, రిఫైన్డ్ ఇంజిన్ కావాలనుకునే వారికి హ్యుందాయ్ ఎక్స్టర్ ఉత్తమమైంది. తక్కువ ధరలో స్లైలిష్ లుక్, 360-డిగ్రీ కెమెరా వంటి ఫీచర్లు కావాలంటే నిస్సాన్ మాగ్నైట్ సరైన ఎంపిక. నగర ప్రయాణాలకు, మైలేజీకి ప్రాధాన్యత ఇచ్చేవారు పంచ్ లేదా ఎక్స్టర్ సీఎన్జీ వెర్షన్లను పరిశీలించవచ్చు.