Deputy CM Narayana swamy daughter Krupa Lakshmi: విజయవాడ: చీరలు దొంగిలించే ముఠా ఆటలు కట్టించారు ఉపముఖ్యమంత్రి నారాయణస్వామి కుమార్తె కృపా లక్ష్మి. విజయవాడ నగరంలోని ఒక ప్రముఖ వస్త్ర దుకాణంలో చీరలు దొంగిలించిన మహిళను ధైర్య సాహసాలు ప్రదర్శించి పట్టుకున్నారు.
పోలీసులు తెలిపిన వివరాల ప్రకారం..
విజయవాడలో క్లాత్ స్టోర్‌లో చీరలు దొంగిలించే ముఠా ఆట కట్టించారు నారాయణస్వామి కుమార్తె కృపా లక్ష్మి. మాచవరం పోలీసులు తెలిపిన వివరాల ప్రకారం.. విజయవాడ బందర్ రోడ్ లోని పీవీపీ మాల్ సమీపంలో గోలి హ్యాండ్లూమ్స్ లో శనివారం నాడు షాపింగ్ కొరకు వెళ్లారు డిప్యూటీ సీఎం నారాయణస్వామి కుమార్తె కృపా లక్ష్మి. ఈ సందర్భంగా తాను షాపింగ్ చేస్తున్నప్పుడు పక్కనే ఉన్న ఐదుగురు మహిళలు ఖరీదైన చీరలు చూపించాలి అంటూ హడావుడి చేశారు. షాపులో సిబ్బంది ఖరీదైన చీరలు చూపిస్తుండగా ఒక ఐదు చీరలను దొంగిలించారు. ఈ విషయం షాపులో ఉన్న వారు ఎవరూ గమనించలేదు కానీ షాపు యజమాని ఇంటి వద్ద ఉన్న సీసీ కెమెరాలు చూస్తూ ఉండంగా మహిళా దొంగలు చీరలు కాజేస్తున్నట్లుగా గమనించారు. ఈ విషయమై ఫోన్ ద్వారా సిబ్బందికి సమాచారం ఇచ్చే లోపల నలుగురు మహిళలు అక్కడి నుండి వెళ్లిపోయారు
ఈ విషయం తెలుసుకున్న డిప్యూటీ సీఎం నారాయణ స్వామి కుమార్తె కృపా లక్ష్మి బయటకు వచ్చి మహిళా దొంగను చాకచక్యంగా పట్టుకున్నారు. అంతేకాకుండా వెంటనే పోలీసులకు కూడా సమాచారాన్ని అందించారు. సంఘటనా స్థలానికి చేరుకున్న మాచవరం పోలీసులు మహిళా దొంగను అదుపులో తీసుకున్నారు. ఈ సందర్భంగా షాప్ నిర్వాహకులు, షాప్ సిబ్బంది కృపా లక్ష్మి చూపిన ధైర్యాన్ని మెచ్చుకున్నారు. దొంగను పట్టుకోవడానికి ఆమె చూపిన తెగువకు అభినందించారు. విలువైన చీరలు ఎత్తుకు వెళ్ళిన దొంగలు ఎలా పట్టుకోవాలని యజమాని సిబ్బంది ఆలోచిస్తుండగానే మహిళా దొంగలను ముందు నుంచి వారిని గమనించిన కృపా లక్ష్మీ బయటకు వచ్చి ఒక మహిళను గుర్తించి పోలీసులకు అప్పగించారు. చీరలు చోరీ చేసింది మహిళలు కాగా, అందులో ఓ దొంగను పట్టించిన కృపా లక్ష్మీని స్థానికులు, వ్యాపారులు ప్రశంసించారు.