ఐపీఎల్ 2024లో ముంబై, ఢిల్లీల మధ్య హై స్కోరింగ్ మ్యాచ్ జరిగింది. ఈ మ్యాచ్‌లో ముంబై 29 పరుగులతో ఢిల్లీపై విజయం సాధించింది. ఐపీఎల్ 2024లో ముంబై ఇండియన్స్‌కు ఇదే మొదటి విజయం. మొదట బ్యాటింగ్ చేసిన ముంబై 20 ఓవర్లలో ఐదు వికెట్ల నష్టానికి 234 పరుగులు చేసింది. అనంతరం ఢిల్లీ ఎనిమిది వికెట్ల నష్టానికి 205 పరుగులకు మాత్రమే పరిమితం అయింది. ముంబై బ్యాటర్లలో రోహిత్ శర్మ (49: 27 బంతుల్లో) టాప్ స్కోరర్‌గా నిలిచాడు. టిమ్ డేవిడ్ (45: 21 బంతుల్లో), రొమారియో షెపర్డ్ (39: 10 బంతుల్లో) ఆఖర్లో మెరుపులు మెరిపించారు. ఢిల్లీ బ్యాటర్లలో ట్రిస్టన్ స్టబ్స్ (71 నాటౌట్: 25 బంతుల్లో) మెరుపు ఇన్నింగ్స్‌తో టాప్ స్కోరర్‌గా నిలిచాడు. పృథ్వీ షా (66: 40 బంతుల్లో) అర్థ శతకం సాధించాడు. రొమారియో షెపర్డ్‌కు ప్లేయర్ ఆఫ్ ది మ్యాచ్ అవార్డు లభించింది.