అమ్మాయిల జట్టు అదరగొట్టింది! చరిత్రలో కనీవినీ ఎరగని ఫీట్‌ సాధించింది. ఏడోసారి మహిళల ఆసియాకప్‌ టోర్నీ విజేతగా ఆవిర్భవించింది. షైలెట్‌ వేదికగా జరిగిన ఫైనల్లో శ్రీలంకను చిత్తు చిత్తుగా ఓడించింది. 66 పరుగుల స్వల్ప లక్ష్యాన్ని 2 వికెట్లు నష్టపోయి ఛేదించింది. 8.3 ఓవర్లలోనే మ్యాచ్‌ను ముగించింది. స్మృతి మంధాన (51; 25 బంతుల్లో 6x4, 3x6) అజేయ హాఫ్‌ సెంచరీ సాధించింది. ఇనోకా రణవీర (18*; 22 బంతుల్లో 2x4) లంకలో టాప్‌ స్కోరర్‌. రేణుకా సింగ్‌ (3/5), రాజేశ్వరీ గైక్వాడ్‌ (2/16), స్నేహ్‌ రాణా (2/13) బంతితో చుక్కలు చూపించారు. హర్మన్ ప్రీత్ ఎక్కువ టీ20లు ఆడిన అమ్మాయిగా రికార్డు సృష్టించింది. దీప్తి శర్మకు ప్లేయర్ ఆఫ్ ది సిరీస్ లభించింది.