పచ్చిబఠానీ దోశె రెసిపీ ఇదిగో...

దోశె ఎప్పుడూ ఒకేలా తిని తిని బోరు కొట్టిందా? ఈసారి పచ్చి బఠానీలతో ప్రయత్నించండి.

సరికొత్త రుచి మీకెంతో నచ్చేస్తుంది. పచ్చి బఠానీలు ఆరోగ్యానికి కూడా చాలా మంచివి.

పచ్చిబఠాణీలు - కప్పు శెనగపిండి - అరకప్పు ఉల్లిపాయ - ఒకటి అల్లం - చిన్న ముక్క వెల్లుల్లి రెబ్బలు - అయిదు పచ్చిమిర్చి - మూడు కొత్తి మీర - ఒక కట్ట ఉప్పు - తగినంత నూనె - దోశె వేయడానికి సరిపడా

పచ్చిబఠానీలు, వెల్లుల్లి, అల్లం, ఉల్లిపాయ, పచ్చిమిర్చి, కొత్తిమీర వేసి మెత్తగా రుబ్బుకోవాలి.

ఆ రుబ్బులోకి శెనగపిండి, ఉప్పు వేసి కలపాలి.

దోశె వేసేంత జారుడుగా రాకపోతే రుబ్బులో కాస్త నీళ్లు కలుపుకోవచ్చు.

జీలకర్ర కూడా వేసుకుంటే ఆరోగ్యానికి మంచిది.

ఇప్పుడు స్టవ్ మీద పెనం పెట్టి ఆయిల్ రాసి దోశెను వేసుకోవాలి.

ఈ దోశెను కొబ్బరి చట్నీ, టమాటా చట్నీలతో తింటే చాలా రుచిగా ఉంటుంది.