ఛీర్స్ చెబుతూ...దూసుకుపోతూ...
"మహిళలకు బలం ఉండదు. కష్టమైన పనులు వాళ్లు చేయలేరు" అనే మాటలకు కాలం చెల్లిపోయింది. ఎంత కష్టమైన పనైనా సరే, మహిళలూ పోటీపడి మరీ చేస్తున్నారు. ధైర్యంగా ముందడుగేస్తున్నారు. తమిళనాడుకు చెందిన ఓ మహిళ మరోసారి ఈ నిజాన్ని నిరూపించింది. ఓ భారీ ట్రక్‌ను సులువుగా నడిపేస్తోంది. ఎంతో కాన్ఫిడెంట్‌గా హైవైపే నడుపుతూ కనిపించింది. ఈ వీడియోను ఐపీఎస్ ఆఫీసర్ అవనీశ్ షరన్ ట్విటర్‌లో షేర్ చేశారు. మరో ట్రక్ నుంచి ఓ వ్యక్తి వీడియో తీస్తుండగా లేడీ డ్రైవర్ నవ్వుతూ ముందుకు దూసుకుపోయింది. "నడిపేది మహిళ, పురుషుడా అని ట్రక్ పట్టించుకోదు" అని అవనీష్ షరన్ ట్విటర్‌లో ఈ పోస్ట్‌కి క్యాప్షన్ ఇచ్చారు. ట్విటర్‌లో ఈ వీడియోకు 2 లక్షలకు పైగా వ్యూస్ రాగా, వందలాది రియాక్షన్లు వచ్చాయి. "ఆమె నవ్వులోనే ఆమె ధైర్యం కనిపిస్తోంది" అంటూ ప్రశంసలు కురిపిస్తున్నారు నెటిజన్లు. "మహిళా సాధికారతకు ఈమే అసలైన ఉదాహరణ" అని కామెంట్ చేస్తున్నారు.