నువ్వు లేకపోతే నేను లేను.. చావైనా బ్రతుకైనా నీతోనే.. నువ్వు లేని జీవితం వ్యర్థం అంటూ సినిమా డైలాగులు కొట్టి పెళ్లి చేసుకొని ఒక పాపకు తండ్రి అయ్యాక మొఖం చాటేశాడు ఓ ప్రభుద్ధుడు. పెళ్లి చేసుకునేందుకు ఆడిన అబద్దాలను నమ్మిన ఆ నవ వధువు కన్నీరు పెట్టుకుని ఇప్పుడు పసి బిడ్డతో న్యాయం పోరాటానికి దిగింది. బిడ్డను చంకనేసుకొని తనకు న్యాయం చేయాలని పోలీసులను ఆశ్రయించింది. ఈ హృదయ విదారక ఘటన వరంగల్ జిల్లాలో చోటు చేసుకుంది.
వరంగల్ జిల్లా వర్ధన్న పేట పట్టణ కేంద్రంలో డీసీ తండాకు చెందిన భూక్యా సుమంత్ అనే యువకుడు.. మూడు సంవత్సరాల క్రితం హైదరాబాద్‌లో ఉండేవాడు. మరోవైపు, కొమురం భీం జిల్లా బెజ్జుర్ మండలం మార్జరి గ్రామానికి చెందిన సుమలత అనే యువతి హైదరాబాద్ లో ఒక ప్రైవేటు ఆసుపత్రిలో పని చేసేది. ఈ క్రమంలోనే వారు ఇద్దరికీ మూడేళ్ల క్రితం పరిచయం ఏర్పడింది. ఆ పరిచయం కాస్తా ప్రేమగా మారింది. ఆ తర్వాత వారు ఇద్దరూ పెళ్లి కూడా చేసుకున్నారు. 2021 ఏడాది జూన్ 23న వారు హైదరాబాద్ ఆర్య సమాజ్‌లో పెళ్లి చేసుకున్నారు.
ఆ తర్వాత కొన్ని రోజులు కాపురం చేశారు. అలా వారికి ఓ పాప కూడా పుట్టింది. ఆ తర్వాత భర్త సుమంత్ మొహం చాటేశాడు. అక్కడి నుండి పరారీ అయిపోయాడు. సుమంత్ జాడ కోసం సుమలత చేయని ప్రయత్నం లేదు. ఫోన్ నెంబర్ ఆధారంగా అతని అడ్రస్ సేకరించిన సుమలత బంధువులతో కలిసి భర్త సొంతూరికి వెళ్లింది. చిన్న పాపను ఎత్తుకొని ఇంటి ముందు ఆందోళనకు దిగింది. విషయం తెలుసుకున్న సుమంత్, తల్లిదండ్రులతో కలిసి ఎక్కడికో పారిపోయారు. అయితే, తనకు, తన బిడ్డకు న్యాయం చేయాలని వర్ధన్నపేట పోలీసులను బాధితురాలు ఆశ్రయించింది.
నా నెంబరు తీసుకొని..
‘‘బాధితురాలు తెలిపిన వివరాల ప్రకారం.. కొన్నేళ్ల క్రితం నేను హైదరాబాద్ అపోలో హాస్పిటల్‌లో పని చేసేదాన్ని. నా ఫ్రెండు నుంచి నా నెంబరు తీసుకొని సుమంత్ నాకు పరిచయం అయ్యాడు. కొద్ది రోజులకి ప్రేమ అన్నాడు. పెళ్లి చేసుకుంటానని నమ్మించాడు. తర్వాత నాకు మత్తు మందు ఇచ్చి నాకు తెలియకుండా నాపై బలాత్కారం చేశాడు. పెళ్లి చేసుకుంటానని నమ్మబలికాడు. అంతకుముందు కూడా నా ఫ్రెండుతో ఇలాగే చేశాడు. ఆ అమ్మాయి క్యారెక్టర్ వేస్ట్ అని చెప్పి నన్ను నమ్మించాడు. పెళ్లి చేసుకుందామని మా ఇంట్లో నుంచి నన్ను తీసుకొచ్చేశాడు.
అప్పటికే మూడు నెలల గర్భవతి అయినా అబార్షన్ చేయించేశాడు. తర్వాత టార్చర్ మొదలైంది. వెళ్లిపో అనేవాడు. వర్థన్నపేట పోలీస్ స్టేషన్‌లో ఫిర్యాదు చేస్తే వారు స్వీకరించలేదు. మళ్లీ హైదరాబాద్‌కు వచ్చేసరికి నాకు రెండు నెలల గర్భవతిని. అప్పుడు నా కాళ్లు పట్టుకొని కేసు పెట్టొద్దని బతిమాలాడాడు. నా చదువు పాడవుతుందని అన్నాడు. ఏడు నెలల గర్భవతి అయ్యేసరికి వాళ్ల ఇంట్లో విషయం తెలిసింది. వెంటనే నన్ను మా ఇంట్లో వదిలేసి తను పారిపోయాడు. పాప పుట్టిన తర్వాత మళ్లీ వచ్చి హైదరాబాద్‌లో ఉందామని తీసుకెళ్లాడు. కొద్ది రోజుల తర్వాత ఇప్పుడు మళ్లీ కనిపించకుండా పోయాడు’’ అని బాధితురాలు వాపోయింది.