TGSRTC launches Cargo parcel service home delivery in Hyderabad : హైదరాబాద్: తెలంగాణ ఆర్టీసీ ప్రయాణికులను క్షేమంగా గమ్యస్థానాలకు చేర్చడం మాత్రమే మరెన్నో సేవలు అందిస్తోంది. త‌మ ప్ర‌త్యామ్నాయ ఆదాయాన్ని పెంచుకునేందుకు లాజిస్టిక్స్(కార్గో) సేవ‌ల‌ను టీజీఎస్ఆర్టీసీ విస్తరించింది. అందులో భాగంగానే రాజ‌ధాని హైద‌రాబాద్ (Hyderabad) లో వేగ‌వంత‌మైన సేవ‌ల‌ను అందించేందుకు హోం డెలివ‌రీ సౌక‌ర్యాన్ని క‌ల్పిస్తున్న‌ట్లు రాష్ట్ర ర‌వాణా, బీసీ సంక్షేమ శాఖ మంత్రి పొన్నం ప్ర‌భాక‌ర్ తెలిపారు. 


నేటి (అక్టోబర్ నెల 27) నుంచి హైద‌రాబాద్ లోని 31 ప్రాంతాలలో పైలట్ ప్రాజెక్టుగా హోం డెలివ‌రీ సేవ‌లు అందుబాటులో ఉంటాయ‌ని పొన్నం ప్రభాకర్ వివ‌రించారు. టీజీఎస్ఆర్టీసీ లాజిస్టిక్స్ సెంట‌ర్స్ నుంచి హైద‌రాబాద్ నగరంలో ఎక్క‌డికైనా హోం డెలివ‌రీ (Home Delivery) చేయవ‌చ్చ‌ని చెప్పారు. రాబోయే రోజుల్లో ఇంటి నుంచి ఇంటి వరకు సేవలు అందించేలా లాజిస్టిక్స్ విభాగాన్ని టీజీఎస్ఆర్టీసీ (TGSRTC) అభివృద్ధి చేస్తోంద‌ని మంత్రి తెలిపారు. ప్ర‌జ‌లంద‌రూ ఆర్టీసీ అందిస్తోన్న ఈ హోం డెలివ‌రీ స‌దుపాయాన్ని ఉప‌యోగించుకోవాల‌ని వినియోగ‌దారుల‌ను మంత్రి పొన్నం ప్ర‌భాక‌ర్ కోరారు.






పార్శిళ్ల హోం డెలివ‌రీ చార్జీలివే!
 
- 0 నుంచి 1 కేజీ పార్శిల్‌కు రూ.50
- 1.01 నుంచి 5 కేజీల‌కు రూ.60
- 5.01 నుంచి 10 కేజీల‌కు రూ.65
- 10.1 నుంచి 20 కేజీల‌కు రూ.70
- 20.1 నుంచి 30 కేజీల‌కు రూ.75
- 30.1 కేజీలు దాటితే.. పైన పేర్కొన్న స్లాబ్‌ల ఆధారంగా ధ‌ర‌లు ఉంటాయి.



Also Read: Telangana Cabinet Decisions: పేదలకు శుభవార్త, దీపావళి కానుకగా ఇందిరమ్మ ఇండ్లు - ఉద్యోగులకు డీఏ: మంత్రి పొంగులేటి




ఐపీఎస్ సజ్జనార్ ఆర్టీసీ ఎండీ అయ్యాక, సంస్థలో పలు మార్పులకు శ్రీకారం చుట్టారు. ముఖ్యంగా ప్రయాణికుల నుంచి వచ్చే ఫిర్యాదులపై త్వరగా స్పందిస్తున్నారు. ఆర్టీసీ సిబ్బందిపై దాడులు జరిగితే తక్షణమే స్పందించి పోలీసులు చర్యలు తీసుకోవాలని కోరుతున్నారు. ప్రత్యేక ఈవెంట్లకు బస్సులను ఏర్పాటు చేయడంలో తనదైన మార్క్ చూపిస్తున్నారు.