National Unity Day 2023:
దేశానికే ఆదర్శంగా నిలిచేలా జాతీయ సమైక్య దినోత్సవం సెప్టెంబర్ 17 వ తేదీన ఘనంగా నిర్వహిస్తామని బీఆర్ఎస్ పార్టీ వర్కింగ్ ప్రెసిడెంట్, మంత్రి కేటీఆర్ ప్రకటించారు. రాష్ట్రవ్యాప్తంగా పార్టీ శ్రేణులు ఎక్కడికక్కడ పెద్ద ఎత్తున పాల్గొనాలని పిలుపునిచ్చారు.
ఈ సందర్భంగా మంత్రి కేటీఆర్ మాట్లాడుతూ.... తెలంగాణ భారత సమాఖ్యలో విలీనమైన 17న జాతీయ సమైక్యత దినోత్సవంగా తెలంగాణ రాష్ట్ర ప్రజలు జరుపుకుంటారని చెప్పారు. ఆ రోజు ఘనంగా ఎక్కడికి అక్కడ సంబురంగా నిర్వహించుకోవాలన్నారు. సీఎం కేసీఆర్‌ స్వయంగా హైదరాబాద్‌ నగరంలో జరిగే వేడుకల్లో పాల్గొంటారని తెలిపారు. ప్రభుత్వమే పెద్ద ఎత్తున ప్రతి జిల్లా కేంద్రాలలో నిర్వహించే సంబరాలకు మంత్రులు పాల్గొని జాతీయ జెండాను ఎగురవేస్తారన్నారు. దీంతోపాటు భారత రాష్ట్ర సమితి పార్టీ శ్రేణులు రాష్ట్రవ్యాప్తంగా ఎక్కడికక్కడ జాతీయ సమైక్యతా దినోత్సవాల్లో పాల్గొనాలని కేటీఆర్ కోరారు. సమాజంలో ఉన్న యువత చరిత్రను మర్చిపోవద్దని గుర్తు చేశారు. ప్రస్తుతం చరిత్రను మరచివేసే విధంగా కొన్ని రాజకీయ శక్తులు యువతను ప్రేరేపిస్తున్నాయని ఆరోపించారు. వీటిని తెలంగాణ సమాజం గమనిస్తోందని వాటి బారిన పడకుండా యువత, తెలంగాణ సమాజం ఉండాలని విజ్ఞప్తి చేశారు
చరిత్రను వక్రీకరించే ప్రయత్నం...
జాతీయ సమైక్యతకు ప్రతీకగా నిలిచే సెప్టెంబర్ 17 వ తేదీని వక్రీకరించి రాజకీయ ప్రయోజనాలు, విచ్ఛిన్నకర శక్తులు పాల్పడుతున్నాయని కేటీఆర్ ఆరోపించారు. ఆనాటి చరిత్రతో, పరిణామాలతో సంబంధమే లేని అవకాశవాదులు, చిల్లర రాజకీయాలతో ఉజ్వలమైన తెలంగాణ చరిత్రను వక్రీకరించి మలినం చేసేందుకు ప్రయత్నం చేస్తూనే ఉన్నాయన్నారు. అత్యంత మేధో సంపత్తితో, క్రియాశీలతతో చురుకుగా స్పందించే తెలంగాణ సమాజం.. అదే చైతన్యాన్ని ప్రదర్శించి.. తెలంగాణ జీవనాడిని కలుషితం చేయాలని చూస్తున్న విచ్ఛిన్నకర శక్తుల కుటిల యత్నాలను తిప్పికొట్టాల్సిన అవసరం ఉందని పిలుపునిచ్చారు.
అభివృద్ధి, సంక్షేమం రెండు జోడెద్దులు........
తెలంగాణ రాష్ట్రం ఏర్పడిన తర్వాత గత పది సంవత్సరాల్లో అభివృద్ధి, సంక్షేమం రెండు జోడెద్దులు లాగా ముందుకు వెళ్తూ దేశానికే ఆదర్శంగా నిలుస్తున్నాయని మంత్రి కేటీఆర్ అన్నారు. తెలంగాణ అభివృద్ధిని ఓర్వలేని రాజకీయ పార్టీలు ప్రతి అంశాన్ని రాజకీయం చేసే దుర్బుద్ధితో వ్యవహరిస్తున్నాయని విమర్శించారు. తెలంగాణ ప్రజలు సంబరంగా జరుపుకునే జాతీయ సమైక్యత దినోత్సవంపై కొన్ని పార్టీలు రాజకీయాలు చేసే కుట్రలు చేస్తున్నాయని ఆరోపించారు. ప్రతి అంశానికి మతాన్ని జోడించి సమాజంలో చిచ్చుపెట్టే విచ్ఛిన్నకర శక్తుల కుట్రలను ప్రజలు గమనించి జాగ్రత్తగా ఉండాలన్నారు. 1948 సెప్టెంబర్ 17న సువిశాల భారతదేశంలో తెలంగాణ అంతర్భాగంగా మారిన రోజని, రాచరిక పరిపాలన నుంచి ప్రజాస్వామ్య దశలోకి పరివర్తన చెందిన రోజన్నారు. రాచరిక వ్యవస్థ నుంచి ప్రజాస్వామిక స్వేచ్ఛ వైపు పరివర్తన చెందడానికి యావత్ తెలంగాణ సమాజం అద్భుతంగా కృషి చేసిన మహోజ్వల సందర్భం అందరికీ గుర్తుంటుందన్నారు.
రాష్ట్రంలో కొన్ని రాజకీయ పార్టీలు ప్రతి విషయానికి మతం రంగు పూస్తున్నారని తెలిపారు. వీటివల్ల సమాజం ఏ విధంగానో బాగుపడదని హెచ్చరించారు. అభివృద్ధి చెందుతున్న దేశాలతో పోటీ పడాలి తప్ప... ప్రజలను విచ్చిన్నం చేసే విధంగా రాజకీయాలు చేయొద్దని కోరారు. మనుషులను విడదీసే రాజకీయాలకు ప్రతి ఒక్కరు దూరంగా ఉండాలని యువతను కోరారు.