BRS Activist Murder News: నాగర్‌కర్నూల్ జిల్లా పెద్దకొత్తపల్లి మండలం గంట్రావ్ పల్లి గ్రామంలో హత్యకు గురైన మాజీ సైనికుడు, బీఆర్ఎస్ నేత మల్లేష్ యాదవ్ కుటుంబాన్ని కేటీఆర్ పరామర్శించారు. బీఆర్ఎస్ కార్యకర్త మల్లేశ్ హత్యపై పోలీసులు నిష్పక్షపాతంగా విచారణ జరిపించాలని బీఆర్ఎస్ వర్కింగ్‌ ప్రెసిడెంట్‌ కేటీఆర్ (BRS Working President KTR) డిమాండ్ చేశారు. హత్యకు గురైన బీఆర్ఎస్ కార్యకర్త మల్లేశ్ కుటుంబానికి రూ.5 లక్షల చెక్కును కేటీఆర్ అందజేశారు. మల్లేశ్ పిల్లల చదువులు, భవిష్యత్తుకి హామీ ఇచ్చారు. రాజకీయ హత్యని, భూ వివాద హత్యగా చిత్రీకరించకుండా కుటుంబానికి న్యాయం చెయ్యాలని పోలీసులను కేటీఆర్ కోరారు.
తెలంగాణలో తొలి రాజకీయ హత్య..
అనంతరం మాజీ మంత్రి కేటీఆర్ మాట్లాడుతూ.. మల్లేశ్ గతంలో భారత ఆర్మీలో జవాన్ గా సేవలు అందించారు. రాష్ట్రంలో పరిస్థితుల కారణంగా కేసీఆర్ సీఎం కావాలని, హర్షవర్ధన్ ఎమ్మెల్యే కావాలని పార్టీ మద్దతుదారుడు మల్లేశ్ భావించి బీఆర్ఎస్ గెలుపు కోసం పనిచేశారు. హర్షవర్ధన్ నాయకత్వాన్ని బలపరుస్తూ మల్లేశ్ ఎంతగానో శ్రమించారు. కానీ ఇక్కడ, రాష్ట్రంలో బీఆర్ఎస్ దురదృష్టవశాత్తూ ఓడిపోయింది. తెలంగాణలో గతంలో ఎన్నికల్లో ఎన్నడూ లేనట్లుగా హింసాత్మక పరిస్థితి నెలకొందన్నారు. మల్లేశ్ ది తెలంగాణలో తొలి రాజకీయ హత్య అని సంచలన వ్యాఖ్యలు చేశారు. కేసీఆర్ సైతం ఈ విషయం తెలిసి చలించిపోయారని.. పార్టీ తరఫున ఆయన కుటుంబానికి రూ.5 లక్షల ఆర్థిక సాయం చేశామన్నారు. మల్లేశ్ కుటుంబానికి పార్టీ అండగా ఉంటుందని, ఆయన పిల్లల భవిష్యత్తును హామీ ఇచ్చారు.
గెలుపోటములు సహజమని స్థానిక మంత్రికి సూచన..
రాజకీయాల్లో గెలుపోటములు సహజమేనని మంత్రి జూపల్లి కృష్ణారావు గుర్తుంచుకోవాలని కేటీఆర్ అన్నారు. ఈరోజు మీరు గెలిస్తే, రేపు తాము విజయం సాధించవచ్చునని పేర్కొన్నారు. నేతలు, పార్టీల మధ్య పోరాటం, వివాదాలు ఉండవచ్చు.. కానీ మధ్యలో కార్యకర్తల్ని బలి పశువులు చేయకూడదని కేటీఆర్ సూచించారు. బీఆర్ఎస్ హయాంలో 10 ఏళ్లలో ఏనాడూ తాము భౌతిక దాడులకు పాల్పడలేదని, ఫ్యాక్షన్ సంస్కృతిని పెంచాలని తాము భావించలేదన్నారు. కనుక రాజకీయాల కోసం ఏ వ్యక్తిని హత్య చేయడం మంచిది కాదన్నారు. ప్రభుత్వంలో ఎవరున్నా సరే హత్యకు గురైన వ్యక్తి కుటుంబానికి న్యాయం చేయాలని ఈ సందర్భంగా కేటీఆర్ పోలీసులను కోరారు.
కాల్ డేటా బయట పెట్టాలని డిమాండ్ చేశారు. ప్రత్యక్షంగా విచారణ జరిపించి డీజీపీ ఈ కేసులో నిజాలను బయటపెట్టాలని కోరారు. మల్లేశ్ భార్యకు ఉపాధి కల్పించాలన్నారు. రాష్ట్ర వ్యాప్తంగా ఇలాంటి ఘటనలు ఎక్కడ జరిగినా కార్యకర్తల కుటుంబానికి తాము అండగా ఉంటామన్నారు. ఏ ఎజెండా లేకుండా అన్ని వాస్తవాలు ప్రజలకు చెప్పాలని మీడియాను కోరారు. నిజాలు బహిర్గతం చేసేందుకు మీడియా కీలక పాత్ర పోషించాలన్నారు. వ్యక్తి చనిపోయే, వారి స్థానాన్ని ఎవరూ భర్తీ చేయలేరని.. ఈ కుటుంబానికి రాష్ట్ర ప్రభుత్వం, డీజీపీ, జిల్లా ఎస్పీ న్యాయం చేయాలని కోరారు. మల్లేశ్ కుటుంబానికి న్యాయం జరిగే వరకు కుటుంబానికి తాము అండగా నిలుస్తామన్నారు కేటీఆర్.
Also Read: కేసీఆర్ రీ ఎంట్రీ అప్పుడేనా? - తెలంగాణ భవన్ వేదికగానే కార్యకలాపాలు