V Srinivas Goud: తెలంగాణ క్రీడల మంత్రిగా పని చేసిన వి.శ్రీనివాస్ గౌడ్‌కు రాష్ట్ర హైకోర్టులో పరాభవం ఎదురైంది. తనకు ప్రాణహాని ఉందని శ్రీనివాస్ గౌడ్ హైకోర్టును ఆశ్రయించారు. తనకు 4 ప్లస్ 4 గన్ మెన్లను కేటాయించాలని పిటిషన్‌లో కోరారు. తనకు ఆ సెక్యురిటీ ఇచ్చేలా ప్రభుత్వాన్ని ఆదేశించాలని కోరారు. శ్రీనివాస్ గౌడ్ వేసిన పిటిషన్‌ ను మంగళవారం (మార్చి 5) హైకోర్టు విచారణ చేపట్టింది. మాజీ మంత్రి శ్రీనివాస్ గౌడ్ అభ్యర్థనను హైకోర్టు తోసిపుచ్చింది. మాజీ మంత్రి అడిగిన విధంగా గన్ మెన్లను కేటాయించడం సాధ్యం కాదని తేల్చి చెప్పింది.
ప్రతి ఒక్కరికి వారు కోరినట్లుగా భద్రతా సిబ్బందిని కేటాయించడం సాధ్యం కాదని హైకోర్టు పేర్కొంది. శ్రీనివాస్ గౌడ్‌కు గన్‌మెన్లు అవసరమో? లేదో? తెలపాలని హైకోర్టు డీజీపీని ఆదేశించింది. కౌంటర్ దాఖలు చేయాలని హైకోర్టు.. రాష్ట్ర డీజీపీని ఆదేశించింది. తదుపరి విచారణను హైకోర్టు మార్చి 19కి వాయిదా వేసింది.