RRR సినిమా దేశ వ్యాప్తంగా విపరీతమైన ప్రేక్షకాదరణతో ప్రదర్శితం అవుతోంది. అభిమానులు, ప్రేక్షకులే కాకుండా సినీ, రాజకీయ ప్రముఖులు అంతా RRR Movie ని చూస్తూ ఎంజాయ్ చేస్తున్నారు. ఇంకొందరు ఆర్ఆర్ఆర్ సినిమా చూసేందుకు ఎంతో ఆత్రుతగా ఉన్నానంటూ ట్వీట్లు చేస్తున్నారు. ఇంతగా భారతీయ సినీ అభిమానులను ఆర్ఆర్ఆర్ సినిమా ఆకట్టుకుంటోంది. సినిమాపై కొన్ని వర్గాల్లో చిన్నపాటి అభిప్రాయభేదాలు ఉన్నప్పటికీ మొత్తానికి పాజిటివ్ టాక్‌తో ఆర్ఆర్ఆర్ మంచి వసూళ్లు రాబడుతోంది.
తాజాగా RRR Movie ని ములుగు ఎమ్మెల్యే సీతక్క కూడా చూశారు. ఆ సినిమాపై ప్రశంసలు కురిపించారు. ‘ది కశ్మీర్‌ ఫైల్స్‌’ చిత్రాన్ని విమర్శిస్తూ RRRపై ప్రశంసల జల్లు కురిపించారు. ‘‘దేశాన్ని విడదీయాలనకుంటే ‘ది కశ్మీర్‌ ఫైల్స్‌’ చూడండి.. ఏకం చేయాలకుంటే మాత్రం RRR చిత్రాన్ని చూడండి’ అని సీతక్క ట్వీట్‌ చేశారు. సోదరులు తారక్‌, చరణ్‌ అద్భుతంగా నటించారని ప్రశంసించారు. అలాగే ఈ చిత్రానికి అన్ని రాష్ట్రాల్లోనూ పన్ను మినహాయింపు ఇవ్వాలని ఆమె డిమాండ్‌ చేశారు. ప్రస్తుతం ఎమ్మెల్యే సీతక్క చేసిన ట్వీట్‌ సామాజిక మాధ్యమాల్లో వైరల్‌ అవుతోంది. తన అనుచరులతో కలిసి సీతక్క సోమవారం ఈ సినిమా చూశారు.
RRR Movie Collections: 3 రోజుల్లో ఆర్ఆర్ఆర్ వసూళ్లు ఇవీ..
అంచనాలకు తగ్గట్టుగా ఆర్ఆర్ఆర్ సినిమా వసూళ్లు సాధిస్తోంది. తొలి రోజు 230 కోట్ల రూపాయలు కలెక్ట్ చేసిన ఈ సినిమా, ఆ తర్వాత రెండు రోజుల్లో రూ. 270 కోట్లు కలెక్ట్ చేసింది. మొత్తం మీద మొదటి మూడు రోజుల్లో రూ.500 కోట్లు కలెక్ట్ చేసింది.
హిందీలో 'ఆర్ఆర్ఆర్'కు మొదటి రోజు కంటే రెండో రోజు ఎక్కువ వసూళ్లు రావడం గమనార్హం. ఉత్తరాదిన హిందీ, తెలుగు, తమిళ్ వెర్షన్స్ విడుదల అయ్యాయి. నార్త్ ఇండియాలో హిందీ వెర్షన్ మొదటి రోజు రూ.20 కోట్లు వసూలు చేస్తే, రెండో రోజు (శనివారం) రూ.23.75 కోట్లు కలెక్ట్ చేసింది. ఆదివారం అయితే రూ.31.50 కోట్లు కలెక్ట్ చేసింది. మొత్తం మీద మొదటి మూడు రోజుల్లో హిందీ వెర్షన్ వసూళ్లు రూ.74.50 కోట్లు కలెక్ట్ చేసింది. కరోనా తర్వాత హిందీలో సినిమా విడుదలైన తర్వాత మొదటి ఆదివారం ఎక్కువ వసూలు చేసిన సినిమాగా 'ఆర్ఆర్ఆర్' రికార్డు క్రియేట్ చేసింది.
తెలుగు రాష్ట్రాలకు వస్తే... నైజాంలో 'ఆర్ఆర్ఆర్'కు మూడు రోజుల్లో రూ.53.45 కోట్లు, సీడెడ్ (రాయలసీమ)లో రూ.26 కోట్లు, తూర్పు గోదావరిలో రూ. 8.67 కోట్లు కలెక్ట్ చేసినట్టు తెలుస్తోంది. మిగతా జిల్లాలు తెలియాల్సి ఉంది. తెలుగు రాష్ట్రాల్లోనూ 'ఆర్ఆర్ఆర్' భారీ వసూళ్లు సాధిస్తోంది. ఓవర్సీస్ మార్కెట్ వసూళ్లు కూడా బావున్నాయి.